下個月就係無綫台慶，三大台慶劇近日曝光，睇完《廷禧攻略》同《再創世紀》就有得睇，分別係《跳躍生命線》、《是咁的，法官閣下》同《兄弟》！咦，無咗上年講到好行嘅《大帥哥》嘅？
登入 瀏覽本網站，可獲取積分換領專屬優惠
點擊查看專屬優惠
《跳躍生命線》（預料10月初開播）
呢套係由人氣王馬德鐘、「小鮮肉」何廣沛同「上位小花」劉佩玥等孭飛嘅時裝醫療劇，仲有陳瀅、張曦雯同羅天宇等 「故事圍繞救護員爭分奪秒救人嘅生涯，反映呢個行業對受助者嘅幫助同陪伴。
「馬神」演救護總隊，繼飛虎同機師之後再有制服Look！
陳瀅同劉佩玥勁Sweet，相信開播又再谷行人氣！
劇集講馬德鐘因為老婆（李佳芯飾演）被粗心大意嘅司機醉駕致死，導致佢以後極度痛恨任意妄為嘅人，後來何廣沛於機緣之下做咗佢下屬。
兩個男人透過唔同救護案件，於救護工作中互相支援。
其實同之前嘅《棟仁的時光》都撞咗少少橋，不過呢套就比較集中講救護服務
仲有香港消防處全力協助拍攝，好多真實個案題材之外，仲於消防及救護學院同救護站實地取景。
《是咁的，法官閣下》（預料10月尾開播）
黃智賢第三次演律師喇！今次係佢繼《四個女仔三個BAR》同《完美叛侶》之後再做大狀嘅劇集，但呢部劇已經冇陳凱琳份叫「師傅」。
換上同樣係港姐冠軍，仲堅係大學讀Law出身嘅麥明詩上陣。
二人會有感情發展！
劇集仲有關禮傑同首次做女一嘅王君馨，好耐冇於無綫劇現嘅車婉婉都有份演法官大人，另外有梁烈唯、黎振燁、王梓軒同李國麟等等，故事主要講及黃智賢同前妻王君馨，以及另一大律師主角關禮傑嘅複雜關係，同時帶出新紮律師嘅慘況。
《兄弟》（預料11月初開播）
上年憑《踩過界》威到盡贏得視帝嘅王浩信終於有新作品，仲係台慶重頭劇！佢今次與楊明同埋勁打得嘅伍允龍拍檔出演警匪懸疑劇，故事講佢哋三個親兄弟因97年金融風暴而各散東西，長大後重聚，但就發現成頭家散晒嘅原因埋藏極大陰謀。
套劇唔係清一色「棒棒堂」，女主角就有剛剛於《特技人》日見夜見嘅朱晨麗。
仲有江嘉敏同劉穎鏇，同埋有好多親切面孔，包括久未露面嘅林韋辰同石修，張武孝（大AL）更加係事隔38年再回巢無綫拍劇
而且劇組仲分別去咗英國同菲律賓取景，相信畫面都會有驚喜！
張衞健回巢都變倉底貨？《大帥哥》呢？
無綫去年重金禮聘離巢21年嘅張衛健，擔正有關軍閥割據時代嘅劇集，講佢出演嘅無用伍長，點憑古惑頭腦同三寸不爛之舌闖，與三個兄弟洪永城、徐榮同埋李嘉闖天下，仲有大台力捧嘅蔡思貝做女主角。
發布會亦搞到好盛大，不過套劇上年9月已經煞科，話就話後期製作需時，要等到今年播，但當個個都以為係台慶劇時，竟然到而家都未有影！
曾經有傳《大帥哥》會緊接《延禧攻略》播出，就連無綫同翡翠衛星台「TVBJ」都分別於YouTube上載過片頭同廣告。
後期應該已經搞掂晒，但仍然未知幾時有得睇。