Она тилим

Ҳумо қанотида сеҳрли мактуб – 
Кекса Нуҳ йўллаган ўғли Ёфасга.
Бир зот эҳтиром-ла кафтида тутиб, 
Сайёҳ сўзларингни “солди қафасга” – 
Устоз Қошғарийдан мерос “Девон”им, 
Она тилим, онажоним.

Сен –“Ирқ битиги”дан келган башорат, 
Бобо Афросиёб сўйлаган калом.
Кўзга суртар экан ҳарфинг, ишоранг,
Йўллуғ Тегин кўксин чулғаган илҳом.
Тўнюқуқ, Култегин, Билга хоқоним – 
Она тилим, онажоним.

Яссавий бағридан таралган ҳикмат, 
Не бахт, садо берди ҳар бир япроқда.
Гўё мудраб ётган туркона журъат 
Порлади Алишер ёққан чироқда. 
“Беш достон” аршидан боққан Туроним – 
Она тилим, онажоним. 

Уйғонди Югнакий тортган фиғонлар
Тинглаб дунё чеккан фарёд сасини. 
Уруш оловини ёққан нодонлар 
Тингласин Хос Ҳожиб таронасини. 
Башар дардларига бўлган дармоним – 
Она тилим, онажоним...

Хира тортмагайми қадимий излар,
Йилда бир бор сўраб қўйсам кўнглингни.
Эриб бораётир кафтимда сўзлар –
Кечир ташбеҳларга нўноқ ўғлингни.
Онам алласидан бунёд қўрғоним –
Она тилим, онажоним!  

Шодмон Сулаймон