我的辭職記（2/4） — 一個黐膠線的少年
呢個系列，就講我踏入職場17年（原來都未夠廿年），每一次辭職嘅情況。計埋而家呢份，我做咗7份半工。計成功嘅（即係冇留低嘅）辭職，5次半。爭咁兩次呢？一次畀人掃走，仲有一次係而家呢份。寫咗萬幾字，分四日刊出。夠晒準確，全無保留，早期嘅有埋人工，晚年嘅費事講，驚畀人恥笑。
第一集在此：
Facebook 專頁有更多短文: https://www.facebook.com/ivanliresearch
講遠咗，但我相信大家唔介意的。前事講咗我點樣同兩個老校辭職，一次好順利，一次相當狼狽。不過都係嗰句，老校二號都係欣賞我嘅，都係愛才嘅。聽講有啲（佢心中的）廢柴辭職都畀佢玩一輪，唔接你封信，話冇收過，或者直頭避開你咁。嘻。
講返，因為安雅，我由教書佬，變咗做返中環嘅Central Wanker（留意安雅同蘇永康出事係2002年，時間上啱的）。一萬二千五人工，翌年因為表現良好，加薪兩百。然後個小插曲係我幾乎又教返書，甚至太古城地利亞請咗我（因為有教書嘅舊同事搭路 — 拿，記住，識人好過識字）。兩皮人工。我就真心係返去辭職。獲得標哥挽留，喝令人事部（班撚樣）加我人工，Match個屙化。結果加到18500。
點解Match個屙化係18500唔係20000？比三秒你諗下，你諗到就好有潛質做HR!
哦，該人（亦係當年將我由13000壓到12500嗰位，信我，做HR嘅男人係變態的）同我娓娓道來：因為，蕉行係出13個月糧的（的確係咁），20000*12 = 18500*13，simply arithmetic, you see ？（佢冇咁講，我講的）
我就真係好似對手入你一個世界波咁，拍手，好嘢，真係好撚嘢。我唔係朗尼式拍手諷刺（唔知點解覺得佢拍手特別串！），係真係覺得好嘢。（當然如果佢話我知，拿，每個月仲豪咗40蚊畀你，我應該會好似朗尼踩C朗春袋咁對佢）（放心，當年未有呢幕）
但最重要嘅係，我無心（真係無心）之下，就咁跳咗第一次草裙舞（我發毒誓我真係冇諗住扭計，當時都唔知有得咁玩）。嗰日之後我諗咗好多嘢，忽然開咗竅，知道金融界係咩一回事。當然之前睇書都知，但，你睇龍虎豹同做愛都係兩回事，係咪？
嗰次我第一次意識到，嘩，原來咁撚樣都得的！
嘩，原來咁撚樣都得的！
影響好深，之後再講。無論如何，加咗人工嘅我，相當滿意。喂，咁樣一下差不多加50%人工喎。原來咁撚樣都得的。當然諗真啲，都係畀人忽悠咗。話就話18500 X 13 啫，但，做得到年尾先係。做唔到年尾嘅，冇得普娃他，一個仙都冇的。
但算啦。我相當滿意，拎咗多餘嘅錢去溝女（唔通去建設社會？），好似尹光筆下嘅志華咁，好比心機工作。加50%人工喎，當然有動力。
直到我遇到占士咖啡。舊文寫過，占士咖啡，耆英證券請我嘅鬼佬。
長話短說，耆英證券請分析員。我人無恥則無敵，唔多識股票，但厚面皮照寄，佢又照請我（教訓：唔好因為你唔到要求唔寄，大把人更加廢，況且公司廣告一定講到要你十樣全能，實則你識兩樣都請）。
直到今日，我都可以理直氣壯咁講，做股票分析員，真係我當時（當時啦）嘅夢想。雖則我都唔係好知做乜，但，型嘛。況且，講過啦，我在港大精算 — 勁呀可？ — 但我second 撈華，點會入到咩德意志高盛之類做青衣？
然後，以為唔會再有機會做分析員，死咗條心。忽然有人請喎，雖則係耆英，但都叫做（當年）中下游球隊丫。
但當然，唔好扮清糕。最重要係，$。年少時我以為錢好緊要，而家老咗，發現果然如此。耆英當時好似劃一價，占士咖啡請人，兩萬五，話知你港大精算second 撈華定濕鳩大學second lower（同我同期有位仁兄，後來佢撈到好掂，好撚掂）。一律兩萬五。
我在蕉行其實冇乜不滿。但加35%人工，兼且做到自己想做嘅嘢，其實都真係義無反顧，甚至舞都唔諗住跳（其實果時都係未純熟，第一次係被跳啫）。
嗰次辭職，都算順利。標哥當然唔多認同我。其實講下，我在蕉行，係做炒房嘅。炒乜？外匯啦，債券啦，money market 啦咁（所以你啲網友走嚟同我講拆息，只能講句阿叔做拆息時你閪毛都未撚出）。
標哥係行內都有啲名氣（其實主要因為佢好撚火爆，有機會再講，加埋老校二號，兩個都好躁狂，所以我一早見慣火山）（不過又講，標哥火爆，但唔會鬧同事，佢只會自己掟嘢，電話都掟爛過幾個。當然係公司電話。）。佢就係一個梁錦松（梁錦松亦係做炒房），dealer仔性格，講眼光講反應。當然不屑咩股票分析呢啲咁悶蛋嘅嘢。可以理解的。但佢係個好老細，佢不同意，但冇阻我，冇畀說話我聽。in good terms，後來仲耐唔耐飲下茶，直到佢退休。當時我走都有同事，嘿，女同事，仲係隔離部門嘅女同事，幾個一齊請我食飯。嗰時以為好平常，後來就發現之後都冇發生過。原來當時都係想撮合我同某人，可惜本人已名花有主
呢次係辭得好順利嘅。時為2006年復活節。我睇埋電影節就去咗耆英證券。一做就係8年。講過啦，最開心，最唔開心嘅日子，都在呢間公司。但當然埋單依然係相當感恩。真係呢，結婚買樓都係靠佢。8年喎，做金融，一間公司做到8年，都唔易。
記住，四部曲，應該每日貼一篇
第三集呢度
我的辭職記（3/4） —對家出幾多我出幾多！
其實我最初都有懷疑自己。但都係選擇相信自己，證明自己 — 果然就證明咗係唔得。有啲人就係頂多踢歐霸，去到歐聯就腳軟。講冇用，踢過就知。…
medium.com
Facebook 專頁有更多短文: https://www.facebook.com/ivanliresearch
