Ghazab Kiya Tere Wade by Daagh Dehlvi (in Urdu)

۔
     غزل
غضب کیا ترے وعدے پہ اعتبار کیا،
تمام رات قیامت کا اِنتظار کیا۔

ہنسا ہنسا کے شبِ وصل اشک بار کیا،
تسلیاں مجھے دے دے کے بے قرار کیا۔

کسی طرح جو نہ اس بُت نے اعتبار کیا،
مری وفا نے مُجھے خوب شرمسار کیا۔

یہ کس نے جلوہ ہمارے سر مزار کیا،
کہ دل سے شور اٹھا ہاۓ بے قرار کیا۔

نہ آئے راہ پہ وہ عِجز بے شُمار کیا،
شبِ وصال بھی میں نے تو اِنتظار کیا۔

سنا ہے تیغ کو قاتل نے آب دار کیا،
اگر یہ سچ ہے تو بے شبہ ہم پہ وار کیا۔

تجھے تو وعدۂ دیدار ہم سے کرنا تھا،
یہ کیا کیا کہ جہاں کو امیدوار کیا۔

کہاں کا صبر کہ دم پر ہے بن گئی ظالم،
بہ تنگ آئے تو حالِ دل آشکار کیا۔

تڑپ پھر اے دلِ ناداں کہ غیر کہتے ہیں،
اخیر کچھ نہ بنی صبر اختیار کیا۔

یہ دل کو تاب کہاں ہے کہ ہو مآلِ اندیش،
انہوں نے وعدہ کیا اس نے اعتبار کیا۔

ملے جو یار کی شوخی سے اسکی بے چینی،
تمام رات دلِ مُضطرب کو پیار کیا.

بُھلا بُھلا کے جتایا ہے ان کو راز نہاں،
چُھپا چُھپا کے مُحبت کو آشکار کیا۔

نہ اُس کے دل سے مٹایا کہ صاف ہو جاتا،
صبا نے خاک پریشاں مرا غُبار کیا۔

ہم ایسے محوِ نظارہ نہ تھے جو ہوش آتا،
مگر تُمہارے تَغافُل نے ہوشیار کیا۔

ہمارے سینے میں جو رہ گئی تھی آتشِ ہِجر،
شبِ وصال بھی اس کو نہ ہمکِنار کیا۔

رقِیب و شیوۂ الفت خُدا کی قدرت ہے،
وہ اور عشق بھلا تُم نے اعتبار کیا۔

زبانِ خار سے نکلی صدائے بِسمِ اللّہ،
جنوں کو جب سرِ شوریدہ پر سوار کیا۔

تری نگہ کے تصور میں ہم نے اے قاتل،
لگا لگا کے گلے سے چُھری کو پیار کیا۔

جب اُن کو طرزِ ستم آ گئے تو ہوش آیا،
بُرا ہو دل کا بُرے وقت ہوشیار کیا۔

ہوا ہے کوئی مگر اس کا چاہنے والا،
کہ آسماں نے ترا شیوہ اختیار کیا۔

غَضب تھی کثرتِ محفل کہ میں نے دھوکہ میں،
ہزار بار رقِیبوں کو ہمکِنار کیا۔

نہ پوچھ دل کی حقِیقت مگر یہ کہتے ہیں،
وہ بے قرار رہے جس نے بے قرار کیا۔

اسیری دلِ آشفتہ رنگ لا کے رہی،
تمام طُرۂ طَرّار تار تار کیا۔

فسانۂ شبِ غم ان کو اک کہانی تھی،
کچھ اعتبار کیا کچھ نہ اعتبار کیا۔

کسی کے عشقِ نہاں میں یہ بد گمانی تھی،
کہ ڈرتے ڈرتے خُدا پر بھی آشکار کیا۔

کچھ آ گئی داورِ محشر سے ہے امید مجھے،
کچھ آپ نے مرے کہنے کا اعتبار کیا۔

وہ بات کر جو کبھی آسماں سے ہو نہ سکی،
ستم کیا تو بڑا تو نے اِفتِخار کیا۔

فَلک سے طورِ قیامت کے بن نہ پڑتے تھے،
اخیر اب تجھے آشوبِ روزگار کیا۔

بنے گا مہرِ قیامت بھی ایک خالِ سیاہ،
جو چہرہ داغؔ سیہ رو نے آشکار کیا۔

           داغؔ دہلوی



مشکل الفاظ:
     ☆ غضب ۔۔۔ قہر، ستم۔
     ☆ شب ۔۔۔ رات۔
     ☆ وصل ۔۔۔ ملن۔
     ☆ شبِ وصل ۔۔۔ ملن کی رات۔
     ☆ اشک بار ... آنسو برسانا۔
     ☆ تسلیاں ۔۔۔ دلاسہ۔
     ☆ بے قرار ۔۔۔ بے چین۔
     ☆ بُت ... پتھر کی مورت۔
     ☆ اعتبار ۔۔۔ بھروسہ۔
     ☆ شرمسار ۔۔۔ شرمندہ۔
     ☆ جلوہ ... نمائش، دیدار۔
     ☆ سر مزار کیا ۔۔۔ سر پر ڈال دیا۔
     ☆ بے قرار ۔۔۔ بے چین۔
     ☆ عِجز ۔۔۔ منّت سماجت۔
     ☆ بے شُمار ۔۔۔ بے اِنتہا۔
     ☆ شبِ وصال ۔۔۔ ملن کی رات۔
     ☆ تیغ ۔۔۔ تلوار، شمشیر۔
     ☆ آب دار ۔۔۔ بانی سے دھار تیز کرنا۔
     ☆ بے شُبہ ۔۔۔ بے شک۔
     ☆ وعدۂ دیدار ۔۔۔ ریدار کا وعدہ۔
     ☆ جہاں ۔۔۔ دنیا۔
     ☆ امیدوار ۔۔۔ اُمید پانے والا۔
     ☆ دم پر ۔۔۔ جان پر۔
     ☆ بہ تنگ آئے ۔۔۔پریشان ہوۓ۔
     ☆ حالِ دل ۔۔۔ دل کا حال۔
     ☆ آشکار کیا ۔۔۔ ظاہر کیا۔
     ☆ دلِ ناداں ۔۔۔ نادان دل۔
     ☆ غیر ۔۔۔ پراۓ، بے گانے۔
     ☆ اخیر۔۔۔ آخر کار۔
     ☆ صبر اختیار کیا ۔۔۔ صبر کیا۔
     ☆ تاب ۔۔۔ صبر۔
     ☆ مآلِ اندیش ۔۔۔ مال پانے کی اُمید۔
     ☆ اعتبار کیا ۔۔۔ بھروسہ کیا۔
     ☆ دلِ مضطرب ۔۔۔ بے چین دل۔
     ☆ راز نہاں ۔۔۔ چھپا ہوا راز۔
     ☆ آشکار کیا ۔۔۔ ظاہر کیا۔
     ☆ صبا ۔۔۔ خوش گوار ہوا۔
     ☆ خاک پریشاں ۔۔۔ بےکار پریشان۔
     ☆ غُبار ۔۔۔ گرد، دل کی گرد۔
     ☆ محوِ نظارہ ۔۔۔ نظارہ دیکھنے میں گم۔
     ☆ تغافُل ۔۔۔ نظر اندازی۔
     ☆ ہوشیار کیا ۔۔۔ خبردار کیا۔
     ☆ آتِش ۔۔۔ آگ۔
     ☆ ہِجر ۔۔۔ جُدائی۔
     ☆ آتشِ ہجر ۔۔۔ جدائ کی آگ۔
     ☆ شبِ وصال ۔۔۔ ملن کی رات۔
     ☆ ہمکنار کیا ۔۔۔ گلے لگایا۔
     ☆ رقِیب ۔۔۔ مخالف، دُشمن۔
     ☆ شیوہ ۔۔۔ طور طریقہ، ڈھنگ، دستور۔
     ☆ اُلفت ۔۔۔ چاہت، اُنسیت۔
     ☆ خدا کی قدرت ۔۔۔ خدا کی کرامت۔
     ☆ اعتبار ۔۔۔ بھروسہ۔
     ☆ زبانِ خار ۔۔۔ کانٹوں والی زبان۔
     ☆ صدا ۔۔۔ آواز۔
     ☆ صدائے بِسمِ اللّہ ۔۔۔ شُروع کرنے کی آواز۔
     ☆ جنوں ۔۔۔ جنون، پاگلپن۔
     ☆ شوریدہ ۔۔۔ پریشان حال، خستہ حال۔
     ☆ نگہ ۔۔۔ نگاہ۔
     ☆ تصور ۔۔۔ خیال۔
     ☆ طرزِ ستم ۔۔۔ ستم کرنے کا طریقہ۔
     ☆ ہوشیار ۔۔۔ خبردار۔
     ☆ شیوہ ۔۔۔ طور طریقہ، ڈھنگ، دستور۔
     ☆ شیوہ اختیار کیا ۔۔۔ طریقہ اپنا لیا۔
     ☆ غضب ۔۔۔ قہر، سِتم۔
     ☆ کثرتِ محفل ۔۔۔ محفل کی زیادتی۔
     ☆ رقیبوں ۔۔۔ مخالفوں، دُشمنوں۔
     ☆ ہمکنار کیا ۔۔۔ گلے لگایا۔
     ☆ حقِیقت ۔۔۔ سچائی۔
     ☆ بے قرار ۔۔۔ بے چین۔
     ☆ اسِیری ۔۔۔ قید۔
     ☆ دلِ آشفتہ ۔۔۔ حیران پریشان، بکھرا ہوا دل۔
     ☆ رنگ لا کے رہی ۔۔۔ نتیجہ نکلا۔
     ☆ طُرّہ ۔۔۔ انوکھی بات۔
     ☆ طرّار ۔۔۔ زیادہ بات بنانے والا۔
     ☆ طُرّۂ طرار ۔۔۔ بحث تکرار کرنا۔
     ☆ تار تار کیا ۔۔۔ بے کار کیا۔
     ☆ فسانۂ شبِ غم ۔۔۔ رات کے غم کا قصہ۔
     ☆ عشقِ نہاں ۔۔۔ چھپا ہوا عشق۔
     ☆ بد گمانی ۔۔۔ غلط خیال، غلط فہمی۔
     ☆ آشکار کیا ۔۔۔ ظاہر کیا۔
     ☆ داور ۔۔۔ اِنصاف۔
     ☆ محشر ۔۔۔ وہ آسمانی میدان جہاں قیامت کے روز سب کا انصاف کیا جائیگا۔
     ☆ داورِ محشر ۔۔۔۔ آسمانی انصاف۔
     ☆ آسماں ۔۔۔ آسمان، قسمت۔
     ☆ ستم ۔۔۔ ظلم۔
     ☆ اِفتخار کیا ۔۔۔ عزت دی، فخر کرایا۔
     ☆ فلک ۔۔۔ آسمان۔
     ☆ طور ۔۔۔ حالات، حال۔
     ☆ طورِ قیامت ۔۔۔ قیامت کے حالات۔
     ☆ اخیر ۔۔۔ آخر میں۔
     ☆ آشوب ۔۔۔ ہنگامہ، فتنا فساد۔
     ☆ آشوبِ روزگار کیا ۔۔۔۔ فتنے یا فساد کے کام میں لگایا۔
     ☆ مُہر قیامت ۔۔۔ قیامت کی مہر يا ٹھپہ، نمازیوں کے ماتھے پر ماتھا ٹیکنے سے جو کالا نشان پڑتا ہے وہ قیامت کے دِن جنت جانے کی مہر کا کام کریگا۔
     ☆ خالِ سیاہ ۔۔۔ کالی خال یا جلد۔

     ☆ سیہ رو ۔۔۔ بد قِسمت۔
     ☆ آشکار کیا ۔۔۔ ظاہر کیا۔
⚫⚫⚫

---