被炒記：到嗰日你先知被炒，你個人都幾失敗
Facebook 專頁有更多短文: https://www.facebook.com/ivanliresearch
未知生，先知死。未教你贏，先教你輸。未學搵工未學跳草裙舞，首先同你討論下畀人炒。畀人炒呢啲嘢呢，我又有經驗。2014年2月18日，星期二，我就畀耆英證券（當時已被馬拉仔收購）兜咗，即走。唔止我一個，一班人。就係嗰個派信賠錢然後你交電話交卡，即時有人睇住你執嘢走嘅場面。
要知道其實香港仲有（應該少咗）好多公務員或pseudo公務員，或者職場幸運精蟲，成世都未畀人炒過。佢地同你講被人炒，同啲未被人中出即飛過嘅幸福少奶奶教你失戀點療傷一樣，紙上談兵。
畀人炒，真係好似畀人飛咁。多數人遲早都會一次。被炒被飛嘅，往往會諗自己做錯啲乜，當初如果我點點點，肯千依百順，聽佢話，滿足佢啲變態要求，係咪就冇事。冇用的，好多時真係你冇做錯乜，亦唔一定係對方咩損失。就只係運氣唔好，天要落雨娘要嫁人咁，不能被免。
所以冇畀人炒過嘅，我只係話係幸運精蟲，唔係代表點叻。神版友（希望佢唔好介意我踢爆佢）係我心中嘅勁人，但一樣畀人炒過。佢好似引述過，某勁人都話過，真勁人一生中總要畀人炒（但唔係你畀人炒就勁人，基本邏輯）。你仲堅持話勁人唔會畀人炒？Steve Jobs都係畀人炒的，你勁過佢？好，咁你唔使睇落去。
畀人炒都有兩種，未必咁clear cut。第一種係真係你個人嘅不幸（或錯），例如你好廢，或者老細好廢，或者大家都唔廢但八字唔夾，或者你唔小心被人祭旗，或者成為政治鬥爭下嘅犧牲品。呢啲可能可以避免。
但另一種，大規模嘅炒人。Restructuring 又好downsize又好cut fat又好redundancy又好lay off 又好，都係一句，咪大屠殺。就好難避免啦。有啲你成間公司都摺咗，你有乜嘢好講？入啲生意好穩陣嘅大公司？鬼唔知咩。「雷爆爆煲前都好穩陣架」。金融行業啲跨國公司，久唔欠就成個regional office 連根拔起，有啲公司玩法係做遊牧民族咁，好景時貴一貴都搶人，快手攻佔，唔對路時成個香港公司鏟起，你點避？除非你做公務員啦下。
蔡東豪嘅名句係，公司踏上裁員之路，九成九都係有人最初做錯決定—但最初做決定嘅人，同有權力炒人嘅，多數係同一班人—咁唔通炒咗自己咩。所以畀人炒好難避免。更得意係有時公司鍾意炒高人工嘅，一個人工頂幾個，換後生嘅取代你。但有時公司就炒初級員工，只睇人頭數。好難捉路。當然理論上高人工係危險啲，但冇理由為咗唔畀人炒唔加人工下話？你畀人炒都拎住個高啲嘅底薪出去，畀人再減都有啲筆化。
我認為應付畀人炒，好簡單，就係事先做足準備。首先，＄。王爾德話齋，年青時我以為金錢最為重要，現在老了，發現果然如此。點解啲人畀人炒咗一年兩年開始意志消沉？主要都係冇錢。換著有幾球嘢在手？你見啲人唔會愁的。幾時都儲定啲錢，不過新一代未必入耳。
另外，老生常談了，可以的話，都係高位畀人炒開心啲，碌到去啲肥上瘦下有份參加或見證分餅仔嘅位先畀人炒。本人當年（公開資料啦）都做到耆英嘅證監會RO之一（負責人員，到底負乜責呢？我都唔係好知），即係RO唔係好大粒，一間公司可以好多個，但重點在邊？重點係，好多時RO嘅通知期長啲！因為公司驚啲RO齊齊起身做唔到嘢。所以唔少都會要求你份約改到三個月通知。亦都唔少公司係你去到某個職級（內部職級，唔係印VP量化寬鬆水鳩街外人呃蝦條嗰啲)，就要你三個月通知。好定唔好？「視乎你飛公司定公司飛你咯」。咁對於一心諗住做廢柴老樹盤根槪人（例如當時嘅我），就梗係三個月好，因為一炒就賠三個月嘛！最好半年通知添呀。的確，當年我一拎就拎住一大舊錢走（三個月再加你啲年假仲有遣散費仲有額外醒多小小報答你多年乜乜），就真係都可以即時去返次......老撾嘅。
更重要嘅係，唔該，唔好得罪咁多人。呢度唔係話你唔得罪人就唔會畀人炒，唔係的，好好先生都會畀人炒，正如啲職場psychopath 往往都有得留低。
我意思係，金融機構呢，好多時炒人都係即走的。大公司有的是錢（所以你以為真係只係為慳成本？係為向股東交代呀），賠你一個月或三個月，即時掃走你。保安或Admin 睇住你執嘢，返到個位電腦已經用唔到。呢啲咁嘅場面，正係我畀人炒時遇到嘅。
但有樣嘢唔同。我見有啲小妹妹喊晒口咁，有啲係原來當日先知。又恕我冷血一句：去到派信果下你先知自己畀人炒，你都真係冇乜朋友，幾失敗。我？一早乜都執晒返屋企，咩公司電話醫療卡門卡拎定出嚟，三秒就行出門口同（已成為）舊同事落樓下飲奶茶啦。唔該，咁大個人，被人飛都有啲格調，唔好喊晒口甚至要驚動實Q。
請循其本。大公司炒人，其實係一件幾複雜嘅事。之前大老細要同啲分部老細講，分部老細要同部門主管講。HR又要開會，又要準備晒啲信呀，支票呀，搵房開會呀，分分鐘仲要總壇飛幾件嘢過嚟。咁大壇嘢，會滴水不漏？不可能啦。去到派信果下你先知自己畀人炒，你都真係冇乜朋友，幾失敗。
最重要係，你老細，即係直屬上司，部門主管或小頭目，唔會唔知咯。搞清楚，你老細未必係推你去死嗰個，可能係，但亦可能唔係。可能係最高層指明要你死。你老細想保都保唔住。亦都唔好幻想老細會講「你炒佢咁炒埋我啦」，睇少啲電視。又或者你老細根本都唔想保你，甚至插多兩刀—但，以上點都好，都係一個重點：你老細唔會唔知！
大老細總冇可能話畀你老細知，就郁咗佢下面啲人，即係你。你老細未必有權反對，但至少大老細會知會佢。（如果你老細咁失敗，咁又返返起點，即係你都失敗，因為你跟啲咁嘅大佬）。咁你老細可能係交你個名上去嗰個，但基本職場倫理，會提早話你知（我係老細我都會），等你有準備。當年老馮都有好早話我知我幾時死，等我有足夠時間執公司嘅嘢走，減咁啲無謂開支，同埋開始聯絡啲獵頭，等等。你老細明知你畀人炒，都唔話你知，你個人都幾失敗。
畀人炒之後應該點算好？搵工咯，仲可以點？坊間都好多人教你點做。但多數講就易。唔好離開職場太耐？咁我七十歲先去南美呀可。唔好意志消沉？你試下一年搵唔到工睇你有冇咁口響。唔好求其有工就返自願減人工？好難講。我當年都係好快咁減咗人工返新工，二月中被炒三月去完老撾四月頭已經返新工，但係咪後悔呢？都唔知。可能等耐啲有份好啲嘅工，但可能越等越衰，因為一般而言離職人士嘅價值，同啲窩輪差不多，有時間值損耗。俗啲講句就係見你大半年冇工開「壓你價」。但呢啲係比較情緒嘅講法：現實係公司幾時都係想「壓你價」，點解你大半年冇工開佢特別會壓？因為你多數會低頭咯。呢啲同過年加二加三同一道理。
最後，他日如果你要炒人，做交人嗰個。其實都唔使咁複雜，好簡單，公事公辦，nothing personal（講完呢句實畀人打，因為人人都take it personal）。你作為公司嘅代理人，即係為虎作倀者，你考慮嘅就係公司嘅利益。我係己婚人士，都話你知，你唔使考慮你同事係咪剛結咗婚買咗樓仔細老婆嫰—大佬冇人拎支槍叫佢中出架。否則你會對未結婚嘅同事唔公平，同埋令到好多同事結婚買樓。一切就係工作表現vs佢幾錢人工，你一把年紀出去好難搵工？唔關我事，我冇理由因為咁郁個做得好地地嘅後生仔。好冷血？係架。想唔冷血嘅，裁走自己咯。有人咁做的。《馬賽好人 The Snows of Kilimanjaro》呢套戲，就講個阿頭玩抽簽，放埋自己名入去。點知抽中自己，就真係自己走。你係咁做嘅，唔止馬賽好人，波圖都好人。
Facebook 專頁有更多短文: https://www.facebook.com/ivanliresearch
