我的辭職記（1/4）—誤人子弟終不悔
呢個系列，就講我踏入職場17年（原來都未夠廿年），每一次辭職嘅情況。計埋而家呢份，我做咗7份半工。計成功嘅（即係冇留低嘅）辭職，5次半。爭咁兩次呢？一次畀人掃走，仲有一次係而家呢份。寫咗萬幾字，分四日刊出。夠晒準確，全無保留，早期嘅有埋人工，晚年嘅費事講，驚畀人恥笑。
Facebook 專頁有更多短文: https://www.facebook.com/ivanliresearch
是咁的 ，其實睇咗Quartz篇文（Quartz是好東西）。唔會直譯，但原本想探討下如何辭職。如何辭得優雅，辭得順利，唔好煩到人又唔好煩到自己咁。Dos and Don’ts之類。舊文寫過，畀人炒都要走得靚仔啦，何況自己走？
不過諗真啲，唏，好似我都有口話人無口話自己，啲Don’ts我都好似做過晒（唔係同一份工啦）。咁，到而家都冇穿冇爛，都好似冇一次搞到過街老鼠咁嘅。
想講嘅係，辭職呢啲，好似初夜咁（諗唔到第個比喻）。可能你腦中rehearsal 過好多次，睇過唔少教學 — 但到真係埋牙時，都係一鑊泡的（唔係literally，當自己加藤鷹咩）。但the beauty is，就算你搞到好呢HAIR，最後又係會成功嘅，冇乜咁大不了。畢竟好多人都係咁。
唯一唔係好同嘅，就係初夜得一次（除非你玩「今日仲係處」之類）。辭職可以好多次。正常，就practice makes perfect嘅。
不過事實係，我初夜咗幾次（？），每一次，都仲係咁狼狽。亦每一次都係咁緊張。當然正面啲睇，亦即係次次都好似初夜咁，又緊張又期待又有啲不安咁。仲對個世界好奇，總好過滑晒牙咬住個蘋果問你「出咗未呀？」咁（係邊套戲呢？）
好，正經。我明顯唔係一個有系統嘅人（見過我公司張枱嘅應該知），但我有強迫症，某啲嘢會忽然好有條理。我電腦有個Folder叫Resignation，入面有Resignation2002，Resignation2003之類。正如我有個Folder叫HKIFF（電影節呀）。唔同嘅係，HKIFF就一年一次，但Resignation可以一年幾次。
公開資料啦，做證監會持牌人邊有秘密。我2002年打第一份工，而家係第7份。當中有啲公司畀人買咗要簽過約，或者內部調配嘅唔計啦下。總之用一般人定義就係第7份。星矢圍高達後，而家呢份之前，仲有半份。咁就計7份半。工都有半份？有呀，出一半糧返兩日咁咯。都正式合約正式辭職。
中學兩間（有話你知我最初係教書的？），蕉行，耆英（後來變咗馬來亞耆英，只計一份），東亞病夫／台灣佬（又係收購咗，計一份），星矢圍高達，上一段講嘅半份，而家呢度。就係呢7份半。17年7份半，一份兩年多啲。不過分佈好散，半份嘅只係幾個月，而家呢度亦只係做咗幾個月，而耆英我做咗8年。
以下，我試下回憶返每次點辭職。又，只講真辭職。辭職都有假？有，你擺明混吉跳草裙舞嘅咪假辭。但有時真係未必分得咁清。即係好似一腳踏兩船咁，有啲真係想走唔係想玩嘢但最後畀人留到，有啲其實唔係想走但點知玩大咗都係要走，甚至呢邊走咗嗰邊又唔要你都會有。可以唱返首容祖兒嘅《一拍兩散》（應該講遲咗十年，但，但凡唱呢首歌唱得好投入嘅，多數有呢啲一拖二嘅前科，例如我，咩啫，有男版的）。可以好多情況。我只講我真係走咗嘅情況。成功留效嘅就唔計啦。
第一份工，教書嘛，在某高中書院（唔係莊啟程，唔使估）。人工當然唔高，但亦唔係可恥。萬二蚊，2002年，加上其實好得閒，真係下午三點閃得。當時仲有教夜校添（好有歷史感！），搵下外快。
點解辭職？因為搵到間「正規」嘅中學請我咯，仲係同一個社團。咁根本老校十分理解。人工高一截。當年中學基因改造GM已經差不多兩皮嘢人工，有埋狗肉文憑嘅唔止添（但我冇）。加上，穩定嘛。你有幾可見學校可以炒人？基因改造喎，唔係教學助理。老校絶對係理解，甚至支持，至少表面上係。況且新老校又係同佢同社團，正所謂今晚再相逢，一定好順利。
留意返，當年係2003年（教咗一年嘛），沙士。所以提早停課。糧一路出，我放咗個好長嘅暑假，仲記得巴士碌咗落屯門公路。嗰時窮（萬二蚊都唔窮？），但高興。因為未識一年去幾次日本。
教第二間學校，就威咯。留意我做基因改造，兩皮嘢人工。之後我轉咗去蕉行，由教育界轉投銀行界。佢老味丫，呀標哥（蕉行老細）同我講萬三人工，HR都可以壓到落一萬二千五。我真係唔係怪佢壓價，但大佬，好心啦。五百蚊。「所以你明點解我而家寫文都明踩暗串HR」。標哥知道後十分勞氣，可能只係扮，但最後都係一萬二千五。唔止，更正嘅係，之後嗰年，由於我表現理想，加咗兩百蚊畀我。
在我結婚前，每一個約會嘅女仔，都會問一個問題：就係點解我唔教書走去做銀行。非關人工，因為其實好多女都唔知當時我咁低人工，我亦唔會講自己人工（高就話啫，咁低，好意思講咩）。因為真係一個大轉變，轉行，由一個好穩定嘅行業，轉投金融界。嗰幾年見工亦都一定有人問。
到底點解？其實我到呢刻都唔係好肯定，有機會再講。個故事其實同「安雅」有關（蘇永康個安雅，唔係愛爾蘭ENYA）。
我同呢個老校辭職，就大檸樂好多了。此人甚為出名，事隔多年都仲係我地師生吹水嘅話題，亦係而家啲Secrets Group嘅常客。有人當佢係暴君，躁狂症（幾明顯），但不否定佢能力。總之，就係一個好暴怒的老校，回想返，佢似做科網CEO多啲。
所以不幸地，你見我而家也文也武，當年咪又係鶉鵪一隻，見到佢已經怕咗佢氣場啦。結果搞到好遲我先敢講，甚至係去到最後一刻。
點最後一刻？就係七月頭，放暑假前。老校開個大會，分封諸侯咁（津校老校係土皇帝嘛）。邊個升做乜乜主任（其實十分無聊），邊個轉去乜組，大約嗰啲。想當年，呀老校其實真係睇得起我，阿丕嫂對我好客氣（唔好以為幸福必然，有人係畀佢當面屌，話下年唔使見到你真開心），仲升我做……數學科副主任添。And I was like WTF……副主任，使唔使整個助理副主任一 助理副主任二？唔止，佢之前仲用「附加數學科科主任」去利誘我添。事隔十幾年我都仲識笑。兩班我教晒，即係自己同自己開會。
結果，真係好sloppy，sloppy過snoopy。我係在電梯入面辭職的！教員室在頂樓呀。當日電梯中，好似我，同校，同埋另一個女老師。我發現件事真係不能再拖，等佢宣佈咗我再講好似仲衰。唯有硬著頭皮講。嚇到女老師唔知講乜（又，此女老師，相傳佢同老校有姦情，如是我聞，其實全校都知，我指全校都知呢個傳聞，無從證實）。
結果老校只係瞄一瞄我，話「預咗啦」。果然不形於色。打後我補返信畀佢呢啲就公式嘢啫。時為2004年夏天（都話7月）。我拎住成堆試卷去旺角百老匯睇陳慧琳套「大事件」。然後直落酒吧睇歐洲國家盃德國對荷蘭，賽前預德國好西點知踢落又唔太西，幸運咁打開紀錄，但冤枉來瘟疫去，雲尼斯特萊壓住禾恩斯，盡顯身型優勢，完場前追和。雖然好想打爆電視（當年仲好有火），但真係好波，「而打後兩場就唔好再講了」。同邊個睇？自己睇。改完卷返學校。有學生發現啲卷好大陣煙味。年少真好。你自己睇返啲日子，全部對得返，對我嚟講好似昨日嘅事。
後記：仲有後續，少講教書生涯（因為太耐，同埋好似冇乜人想知），今次講開講埋。咁你知，暑假啲老師在教員室要執位的，有人嚟有人走嘛。咁我呢啲無主孤魂，又趕住放假（東歐嘛，係得暑假先有得放咋），咪將啲嘢質晒入垃圾袋，搵個友好同事代為保管。
某日，我不在場嘅情況下，老校巡教員室。發現我啲遺物，仲見到我同我學生嘅合照，就在個垃圾袋中（大佬呀，乜七都放晒入去啦）。
佢同某搣時講：嘿，學生合照都就咁垃圾咁掉，咁絶情嘅，呢啲男人唔多適合付託終身喎。
係喎，本人就係追求該搣時的。不過當其時一早食咗檸檬啦（呢個應該都係我走嘅原因之一，但主要都係安雅。唔好忘記，如果我只係想逃避佢，咁我轉校得啦，使乜咁大披咳做蕉行）。所以老校講嘅嘢根本唔會改變結果。我只係覺得佢咁都有得抽水，堅係好嘢。
後後記：呢篇文我就Dedicate畀呢個學生！係呀，仲有睇我啲文的！
仲有，同枱另一學生（左邊），當年愛徒之一。後來就做我證婚人！點解？事隔8年後，我在悉尼結婚。忽然又醒起，呢個學生好似在悉尼讀大學喎。於是我就真係就咁PM佢：喂，李蛇呀。聽講你在悉尼讀大學喎。呢個星期日得唔得閒？呀冇，我結婚呀，嚟幫我簽紙，請你食飯。
就係咁。至於食飯（其實係食Pancake，廿四小時的，唔知而家仲係咪），我地就都係講返上面啲故事。
記住，四部曲，應該每日貼一篇
第二集在此:
Facebook 專頁有更多短文: https://www.facebook.com/ivanliresearch
