កំពតៈ ការផលិតអំបិលរបស់កម្ពុជាកំពុងប្រឈមនឹងបញ្ហា ខណៈឆ្នាំនេះមិនទាន់មានការប្រមូលផលនៅឡើយ បើទោះបីរដូវប្រមូលផលបានចាប់ផ្តើមតាំងពីខែមករាមកក្តី។ នេះបើយោងតាមសមាគមផលិតអំបិលកម្ពុជា។
គិតមកដល់ពេលនេះកសិករប្រហែល ២០០ គ្រួសារដែលផលិតអំបិលនៅខេត្តកំពត និងខេត្តកែបមិនទាន់អាចប្រមូលផលអំបិលបានទេ ដោយសារតែភ្លៀងច្រើនក្នុងអំឡុងរដូវប្រាំង។ នេះបើយោងតាមលោក ប៊ុន ណារិន ប្រធានបច្ចេកទេសសហគមន៍ផលិតអំបិលកែបកំពត (KKPC)។
រដូវប្រមូលផលអំបិលត្រូវបានចាប់ផ្ដើមពីខែមករាដល់ខែមេសានៅលើផ្ទៃដីស្រែអំបិលជាង ៥០០០ ហិកតានៅក្នុងខេត្តទាំង ២ នេះ។
លោក ប៊ុន ណារិន បានប្រាប់ភ្នំពេញប៉ុស្តិ៍កាលពីថ្ងៃម្សិលមិញថា ក្នុងអំឡុងរដូវក្ដៅ កសិករអាចប្រមូលផលអំបិលបានរហូតដល់ ១០០ ០០០ តោនត្រឹមពាក់កណ្ដាលខែមីនា។ លោកថ្លែងថា៖ «យើងមិនអាចប្រមូលអំបិលចាប់ពីខែមករារហូតដល់ពេលនេះបានទេ ដោយសារតែភ្លៀងច្រើន។ ឆ្នាំនេះកសិករមិនអាចរកប្រាក់ចំណូលបានទេ ដោយសារការផលិតអំបិលរបស់យើងពឹងលើអាកាសធាតុ»។
ទិន្នន័យបានពីក្រសួងឧស្សាហកម្ម និងសិប្បកម្មបង្ហាញថា ឧស្សាហកម្មនេះរកបានប្រាក់ចំណូលប្រហែល ២២ លានដុល្លារកាលពីឆ្នាំ ២០១៧ ជាមួយនឹងបរិមាណផលអំបិលសរុបបូកទាំងសល់ក្នុងស្តុកមានប្រហែល ១៤៣ ០០០ តោន។
ប៉ុន្តែតម្រូវការអំបិលក្នុងស្រុកប្រចាំឆ្នាំមានប្រហែល ៩០ ០០០ តោន ខណៈអំបិលដែលនៅក្នុងស្តុកមានសល់តែ ៦០ ០០០ តោនប៉ុណ្ណោះ។
លោក ប៊ុន ណារិន បញ្ជាក់ថា៖ «ប្រសិនបើភ្លៀងបន្តធ្លាក់រហូតដល់ខែមេសា យើងនឹងប្រឈមកង្វះអំបិលសម្រាប់ទីផ្សារនៅឆ្នាំនេះ»។ ទោះបីជាភ្លៀងរាំងភ្លាមៗក៏ដោយ ក៏ក្រុមហ៊ុនផលិតអំបិលទំនងជាត្រូវការប្រើប្រាស់ស្ដុកទាំងមូលរបស់ពួកគេដើម្បីឆ្លើយតបតាមតម្រូវការ ដែលយោងតាមលោក ប៊ុន ណារិន នឹងមានន័យថា៖ «មិនមានអំបិលក្នុងស្ដុកសម្រាប់ឆ្នាំក្រោយនោះទេ»។
ប្រតិបត្តិការអំបិលរបស់កម្ពុជាបានកើនឡើងក្នុងរយៈពេលជាច្រើនឆ្នាំថ្មីៗនេះ ដែលបានកើនឡើងដោយចំណាប់អារម្មណ៍របស់អន្តរជាតិលើអំបិលសមុទ្រធម្មជាតិ។
Confirel ជាក្រុមហ៊ុនផលិតអំបិលក្នុងស្រុកដែលល្បីឈ្មោះក្នុងការប្រតិបត្តិការម្រេចកំពតរបស់ខ្លួនបានក្លាយជាក្រុមហ៊ុននាំចេញអំបិលកម្ពុជាដំបូងកាលពីឆ្នាំ ២០១៧ ដែលនាំចេញអំបិល ២០ តោនទៅប្រទេសបារាំងជាការសាកល្បងដែលទំនងជានឹងនាំមុខគេក្នុងការនាំចេញកាន់តែច្រើននៅពេលអនាគត។ នេះបើយោងតាមលោក ហៃ លីអៀង ប្រធានក្រុមហ៊ុន។
លោក លី អៀង បានថ្លែងថាអ្នកទិញនៅប្រទេសបារាំងនឹងចូលមកនៅខែក្រោយ ដើម្បីពិនិត្យមើលកសិដ្ឋានអំបិល ហើយអ្វីៗអាចកាន់តែអាក្រក់សម្រាប់ទីផ្សារនេះនៅពេលអនាគត បើអាកាសធាតុមិនអំណោយផល។ លោកថ្លែងថា៖ «នៅឆ្នាំនេះវាល្អដោយសារតែយើងបានសល់អំបិលនៅក្នុងស្ដុក ប៉ុន្តែយើងនឹងប្រឈមកង្វះអំបិលនៅឆ្នាំក្រោយប្រសិនបើការផលិតអំបិលរបស់យើងមានចំនួនកាន់តែតិចទៅ»៕ LA