at17因爭歌而誤會　Ellen一句「乜說話呀」感動二汶

再到二汶的時間，她突然感性：「其實我想講，我真係無乜想講，除咗一句說話，多謝你喺艱難嘅時候冇放棄過我。」Ellen淡淡地回應一句：「乜說話呀。」這句說話看似平淡，卻內藏一個故事，二汶憶述：「最近我哋大家都做緊自己隻碟，因為大家都solo嘅關係，所以大家需要爭歌。有一日我聽返以前嘅Demo，有首歌叫《愛斯基摩》。我覺得歌名旋律都好熟，所以我諗呢首歌應該係我自己作嘅，我就打算擺入隻碟度。我打俾盧凱彤問佢『嗰隻叫《愛斯基摩》嘅歌係咪我作㗎？』佢話『唔係呀，係我寫㗎。』我繼續講『咁就啱啦，你可唔可以俾我呀？ 』佢沉默咗一陣『你俾一日時間我諗。』當時我個心碎一下，拆咗夥之後佢真係同我爭歌，佢竟然要諗。第二日佢打返俾我『林二汶，隻歌你攞去用啦。』事後佢同我講返，原來隻歌佢已經放咗入新碟個Song List度，佢要特登抽返出嚟搵第二隻歌塞入去，結果佢要改變晒成個計劃去就我。而當時佢都係同我講咗一句『乜說話呀。』多謝你盧凱彤！」

唱至Encore前的完場曲《我們的序幕》，林二汶一手把盧凱彤的手握住，向觀眾致謝。看得在場觀眾相當激動，連顏卓靈亦不禁大叫:「at17！Encore！」難得平安夜開騒，at17又怎會如此容易讓演唱會結束。時值晚上10時20分，at17換上一身聖誕服裝，與合唱團共同步出，合唱出一連串聖誕歌《White Christmas》、《I Saw Mommy Kissing Santa Claus》及新歌《Girls Girls Girls》。二人在台上興奮得大叫：「Merry Christmas！」頓時令聖誕氣氛更濃烈，盧凱彤更即興表演beatbox，全場不斷送上拍手尖叫聲。