“திராவிடக் கட்சிகள், பெண்களை ஒதுக்கி வைத்திருக்கின்றன!”

கட்சிக் கூட்டங்கள், போராட்டங்கள், தொலைக்காட்சி விவாதங்கள் எனப் பரபரப்பான அரசியல் பணிகளுக்கு இடையேயும் உள்ளாட்சித் தேர்தல் வேலைகளிலும் கவனம் செலுத்திவருகிறார் மார்க்சிஸ்ட் கம்யூனிஸ்ட் கட்சியின் மாநிலக் குழு உறுப்பினரும், சட்டமன்ற முன்னாள் உறுப்பினருமான தோழர் பாலபாரதி. அனைத்து தோழர்களைப்போல் எப்போதும் சந்திக்கக்கூடிய எளிய பெண்மணியான அவரிடம் பேசினோம்.

. “அநேகமாக பெண்கள் கட்டுப்பெட்டியாக வீட்டுக்குள் அடக்கப்பட்ட காலகட்டத்தில் இயக்கத்தில் நீங்கள் சேர்ந்திருக்கக்கூடும். ஒரு பெண்ணாக இருந்துகொண்டு கம்யூனிஸ்ட் கட்சியில் இணைந்து பணியாற்றவேண்டும் என்ற ஆர்வம் எப்போது, எப்படி ஏற்பட்டது?’’

. “என் பள்ளியும் ஆசிரியரும்தான் காரணம். நம்மைச் சுற்றி என்ன நடக்கிறது என்ற சமூக விழிப்பு உணர்வை ஆசிரியர் ஆ.சுப்பிரமணியன்தான் எனக்குள் ஏற்படுத்தினார். மின்னல், இடிச்சத்தம் எப்படி உண்டாகின்றன என்ற விஞ்ஞான விளக்கத்தில் ஆரம்பித்து, ஏன் நாம் மட்டும் `அர்ஜுனா காப்பாத்து’ என்று சொல்லிக்கொண்டிருக்கிறோம் என்ற மூடநம்பிக்கை வரை அனைத்தையும் எடுத்துச் சொல்லிப் புரியவைத்தார். அப்போதெல்லாம் கட்சி பற்றியோ அல்லது மாணவர் அமைப்பு பற்றியோ எனக்கு எதுவும் தெரியாது. ஆனாலும், ‘நம்மைச் சூழ்ந்திருக்கும் வறுமையைப் போக்க சமூக மாற்றம் ஒன்றே வழி’ என்று அவர் அன்றைக்குச் சொன்ன அந்தச் சிந்தனைதான் இப்போது வரை எனக்குள் ஆழப் பதிந்திருக்கிறது.

1985-ம் ஆண்டில் நான் சத்துணவுத் திட்டத்தில் வேலை பார்த்துக்கொண்டிருந்தேன். அப்போதுதான் கட்சியில் ‘இந்திய ஜனநாயக இளைஞர் கூட்டமைப்பு’ (DYFI) ஆரம்பிக்கப்பட்டது. அதன் வழியாகத்தான் கட்சிக்குள் வந்து சேர்ந்தேன்.’’

. “குடும்பத்தினரின் ஆதரவு கிடைத்ததா?”

. “அப்பா காங்கிரஸ்காரர். ஒரு தேர்தல் பிரச்னையில் ஏற்பட்ட அசம்பாவிதத்தில் தாக்குதலுக்குள்ளாகி இறந்துபோனார். அம்மா விவசாயம் செய்துவந்தார். இந்தச் சூழலில்தான் பணியில் இருந்து கொண்டே நான் கட்சிப்பணியிலும் ஈடுபட்டுக் கொண்டிருந்தேன். என் அண்ணனும் சத்துணவுப் பணியில் இருந்துகொண்டே கட்சியிலும் உறுப்பினராக இருந்ததால், என்னைப் புரிந்து கொண்டார். எதிர்ப்பு எதுவுமில்லை.”

. “தினம் ஒரு போராட்டக்களம் என்ற வகையில், ஒரு பெண்ணாக என்னென்ன சிரமங்களைச் சந்திக்கிறீர்கள்?’’

. “எறும்பில் ஆரம்பித்து யானை வரை எல்லோரது வாழ்க்கையுமே போராட்டம்தான். எனவே, தனிப்பட்டப் பிரச்னைகளைப் பற்றி தோழர்களாகிய நாங்கள் அதிகம் சிந்திப்பதில்லை. இருப்பினும், நமது ஆணாதிக்கச் சமூக அமைப்பில், பெண் தோழராக வெளியூர் போய் வருவதில் நிறைய சிரமங்கள் இருக்கின்றன. கட்சிக் கூட்டங்களுக்குச் சென்று வரும் சமயங்களில், இயற்கை உபாதையைக் கழிப்பதற்கான நல்ல கழிவறைகூட நம் ஊர் பேருந்துநிலையங்களில் இருக்காது. வெளியூர்களில் இரவு 8 மணிக்குமேல் ஒரு பெண் தனியாகச் செல்லும்போது ஏற்படும் அனுபவங்கள் என்னவென்பது பெண் தோழராகிய எங்களுக்குத்தான் தெரியும். மற்ற அரசியல் கட்சியினரோ அல்லது எங்கள் இயக்க ஆண் தோழர்களோகூட இந்த அனுபவத்தைப் பெற்றிருக்க வாய்ப்பில்லை.

இரவில் கட்சிக் கூட்டங்கள் முடிந்து ஊர் திரும்புவதற்காக பஸ் ஸ்டாண்டில் வந்து காத்திருக்கும் நேரத்தில், அங்கு இருக்கும் எல்லோருடைய பார்வையும் எங்கள்மீதே பதிந்திருக்கும். வித்தியாசமான அந்தப் பார்வையை நம் பெண்கள் அனைவருமே எதிர்கொண்டிருப் பார்கள்; அவர்களில் நானும் ஒருத்தி. மிகப்பெரிய மனப்போராட்டமும் சிரமமுமாகவே அந்நேரம் கழியும். பஸ் வந்து அதில் ஏறி உட்கார்ந்து ஒரு புத்தகத்தை எடுத்துப் படிக்க ஆரம்பித்த பிறகுதான் புது மனுஷியாகவே மாறுவோம்.’’

. “தமிழ்நாட்டையே உலுக்கிய மதுரை தோழர் லீலாவதி படுகொலையின்போது உங்கள் குடும்பத்தினரின் மனநிலை என்ன?”

. “1997-ல் அந்தப் படுகொலை நிகழ்வின்போது மாதர் சங்கத்தின் மதுரை மாநகர் மாவட்டப் பொறுப்பாளராக நான் இருந்தேன்; லீலாவதி பொருளாளராக இருந்தார். அவரது மரணத்தால் எழுந்த பேரதிர்ச்சி, கொஞ்சம் பேருக்கு பயத்தையும் ஏற்படுத்தியது. ஆனாலும், எங்களைப் போன்ற தோழர்கள் இந்தப் பிரச்னையின் பின்னணி குறித்து தொடர்ந்து பிரசாரம் செய்துவந்தோம். இதனால், பலருக்கும் பயம் அகன்று துணிச்சல்தான் வந்தது. அந்தக் காலகட்டத்தில் பிறந்த குழந்தைகளில் நிறைய பேருக்கு ‘லீலாவதி’ பெயரையே சூட்டினார்கள் மக்கள். என் குடும்பத்தில்கூட எல்லோருக்குமே இதுபற்றிய பக்குவப்பட்ட நிலை இருந்ததால் யாரும் பயப்படவுமில்லை; என்னைப் பயமுறுத்தவுமில்லை!’’

. “முழுநேர கட்சிப் பணிக்காகவே திருமணம் செய்துகொள்ளாமல் இருந்துவிட்டீர்களா?’’

. “என் குடும்பத்திலிருந்தே இந்தச் சமூக அமைப்பை தொடர்ந்து கவனித்துவருகிறேன். ஓய்வின்றி வீட்டுவேலைகளைப் பார்த்துவந்தார் என் அம்மா. நான் திருமணம் செய்துகொண்டால் நானும் அவரைப்போல்தானே மாறியாக வேண்டும். தவிர, வீட்டுக்கு வந்த மருமகள் கட்சிப் பணிக்குச் செல்வதை எந்தக் குடும்பத்தில் அனுமதிப்பார்கள்? முற்போக்குச் சிந்தனையுடைய தோழரை திருமணம் செய்துகொண்டால் கட்சிப் பணி செய்வதில் இடையூறு இருக்காதுதான். ஆனால், கிராமத்துச் சூழலில் உள்ள என் குடும்பத்தினர் அதை அனுமதிக்க மாட்டார்கள். நான் கட்சிப் பணிக்குச் செல்ல என் குடும்பத்தினர் எந்தத் தடையும் விதிக்கவில்லை.

அதனால், அவர்களுக்கு நாமும் சிரமங்களைக் கொடுக்க வேண்டாமே என நினைத்ததும் திருமணம் செய்துகொள்ளாததற்கு ஒரு காரணம்.’’

. “நீங்கள் முன்னெடுத்த மறக்க முடியாத ஒரு சம்பவம்?’’

. “நான் எம்.எல்.ஏ ஆவதற்கு முன்பே நடந்த சம்பவம் இது. திண்டுக்கல்லில் டாக்டர் பவானி என்பவர் திடீரென ஒருநாள் சயனைடு சாப்பிட்டு இறந்துவிட்டதாகச் செய்தி கிடைத்து. ‘ஒரு மருத்துவரே தற்கொலை செய்துகொண்டாரா?!’ என்று எங்களுக்கு சந்தேகம். போய்ப் பார்த்தோம். அவர் தற்கொலை செய்துகொள்ளவில்லை. அவரின் டாக்டர் கணவராலேயே கொலை செய்யப்பட்டிருக்கிறார் என்ற விவரம் தெரிய வந்தது. சடலத்தை எடுக்கவிடாமல் போராட்டம் நடத்தி, அவரின் கணவரை கைதுசெய்யவைத்தோம். ஆனாலும்கூட, திண்டுக்கல் நீதிமன்றத்தில் அவர் விடுதலையாகிவிட்டார். பிறகு உயர் நீதிமன்றத்தில் வழக்கு தொடர்ந்து, நீண்ட வருடங்களாக வழக்கு நடந்துவந்தது. கடந்த சில வருடங்களுக்கு முன்பு தான் அவருக்கு தண்டனையும் கிடைத்தது.’’

.இந்திய கம்யூ.,களின் 100 - எவற்றைப் புறந்தள்ளுதல், கைவிடுதல் அவசியம்?. “கம்யூனிஸ்ட் இயக்கத்தில் பெண்களின் பங்களிப்புக் கான வாய்ப்புகள் எவ்வாறு இருக்கின்றன?”

. “கம்யூனிஸ்ட் இயக்கத்தில் மட்டும்தான் பெண்கள் அமைப்புரீதியாக ஒன்றுதிரள்கிறார்கள். மாதர் சங்கத்தில் இணைந்து போராடும் பெண்கள், கம்யூனிஸ்ட் இயக்கத்தின் உறுப்பினர் ஆகிவிடுகிறார்கள். பிறகு, கமிட்டி உறுப்பினராகத் தேர்வுசெய்யப்படுகிறார்கள். பல இடங்களில், இடைகமிட்டி செயலாளர்களாகவும் இருக்கிறார்கள். பெண்களுக்கான பாதுகாப்பு இயக்கமாகவும் கம்யூனிஸ்ட் கட்சிதான் இருக்கிறது. எந்த ஒரு பிரச்னையையும் பெண்கள் துணிச்சலாக முன்னெடுத்துக்கொண்டு போராடுவதன் பின்னணியில் அமைப்பு வலுவாக இருக்கிறது. ஆண்கள் நாற்காலியிலும் பெண்கள் தரையிலும் அமர்வது மாதிரியான சமத்துவ மின்மை இங்கே கிடையாது.’’

. “திராவிடக் கட்சிகளும் ஆண் - பெண் சமத்துவம் மற்றும் பெண்கள் முன்னேற்றத்தைத்தானே முன்னெடுக் கின்றன?’’

. “பெண் விடுதலை, பெண் உரிமை பேசும் திராவிட இயக்கங்களில், வெறும் உறுப்பினர்களாக மட்டுமே பெண்கள் இருக்கிறார்கள். சுயமாகவோ சுதந்திரமாகவோ தாங்கள் சார்ந்திருக்கும் அமைப்புரீதியான ஒரு போராட்டத்தை அவர்களால் முன்னெடுக்க முடியாது. சிதம்பரம் - பத்மினி வழக்கு, வாச்சாத்தி பிரச்னை, நாலு மூலைக் கிணறு பிரச்னை என, சமூகத்தில் பெண்களுக்கு எதிரான வன்முறைப் பிரச்னைகளை கையில் எடுத்துப் போராடும் கட்சியாக கம்யூனிஸ்ட் கட்சி மட்டுமே இருக்கிறது. தி.மு.க, அ.தி.மு.க அல்ல.

சமத்துவம் என்பது ஒரு வார்த்தையோ அல்லது ஒரு நாற்காலியை இழுத்துப் போட்டுக்கொள்ளும் விஷயமோ அல்ல. பிரச்னைகளை எடுத்துப் போராடுவதற்கான துணிச்சலை திராவிட இயக்கங்களால் பெண்களுக்குக் கொடுக்க முடியவில்லை என்பதே உண்மை.

பெண்ணுரிமை பேசும் திராவிட ஆட்சிகள் நடைபெறும் தமிழ்நாட்டில், ஏன் இவ்வளவு வன்முறைகள் நடைபெறுகின்றன. காரணம், அமல்படுத்துகிற அரசியல் அமைப்புகளில் உள்ள கோளாறுதான். கட்சியில் பெண்களின் எண்ணிக்கையை வெறும் இடஒதுக்கீடாக மட்டுமே பார்க்கக் கூடாது. நடைமுறை இயக்கப் பணிகளில் அந்தப் பெண்கள் எங்கே இருக்கிறார் கள் என்றுதான் பார்க்க வேண்டும். அப்படிப் பார்க்கும்போது, திராவிடக் கட்சிகளில் பெண்களை ஒதுக்கித்தான் வைத்திருக்கிறார்கள். ஆண் தலைவர்கள்தான் அங்கே முன்னிலைப் படுத்தப்படுகிறார்கள்.’’

. பெண்ணுரிமை பேசுகிற திராவிட ஆட்சிகள் நடைபெறுகிற தமிழ்நாட்டில், ஏன் இவ்வளவு வன்முறைகள் நடைபெறுகின்றன. காரணம்... பாலபாரதி . “தோழர் பாலபாரதியின் ஆசை மற்றும் பொழுதுபோக்கு என்ன?’’

. “காலையில் டீக்கடையில் அமர்ந்து பேப்பர் படித்துக்கொண்டே டீ சாப்பிட வேண்டும்; நள்ளிரவு 12 மணியளவில் பெண் தோழர்களுடன் மெரினா கடற்கரையில் காலார நடந்து விவாதித்த படியே நகரை வலம் வரவேண்டும் என ஆசை. இரவு நேரத்தில் நகரம் எப்படி இருக்கிறது என்பதைப் பார்ப்பதில் எனக்கு ரொம்பவே ஆர்வம் உண்டு. திரைப்படங்கள் விரும்பிப் பார்ப்பேன். சமீபத்தில்கூட ‘அசுரன்’ படம் பார்த்தேன்.’’

வருகிறார் ‘டெல்லியார்’... தமிழகத்தில் ‘புதிய தர்பார்’!

இஸ்ரோவுக்கு நாங்குநேரியில் இடம் ஒதுக்குமா தமிழக அரசு?

‘ஆபரேஷன் டால்பின் நோஸ்’... சிக்கிய கடற்படை வீரர்கள்!

டெங்கு பாதிப்பை மறைக்கிறதா தமிழக அரசு?

ஓ... இதுதான் நம்பர் ஒண்ணா..? - கழிவறை இல்லை... போக்குவரத்து வசதியில்லை... சாலையெங்கும் குப்பைகள்...

இணைய முடக்கம்... இந்தியா நம்பர் ஒன்!

மிஸ்டர் கழுகு: ரஜினியிடம் நெருங்கும் ராமதாஸ்...

கழுகார் பதில்கள்