![](https://c10.patreonusercontent.com/4/patreon-media/p/post/34020476/23cba98ddaf8411f95701f7e93ca0a4a/eyJ3Ijo2MjB9/1.png?token-time=1719360000&token-hash=nb_sTakHs6-rZzIsWkQz3vjLX80A2iG1DlYJJ8yVy5w%3D)
#26
「我都知美國嘅PhD係最辛苦最難讀嘅,所以我好明白你點解會咁諗啊。只係,就算真係讀咗幾年讀唔到,我都唔覺得會浪費啊。」
「……吓?PhD只讀到一半畢唔到業,真係冇地方用得著架喎?」
「點講呢……其實我覺得,冇嘢係真係會浪費架。你以為冇用,只係你而家呢一刻嘅判斷啫,唔代表將來冇用,更加唔代表真係冇價值呀。」
她的手停止掙扎,似乎陷入了沉思mode。
難得她願意想我說話,我連忙在腦裡組織語言,慢慢解釋自己的想法︰
「即係我覺得,所有經驗都有佢嘅意義,所有經歷都有佢嘅價值。你以為冇用,可能只係因為嗰啲價值未顯現出嚟啫。」
黑暗中傳來她的恥笑︰
「你講埋呢啲eternal truth梗係冇得反駁架,但係,實際應用唔係咁簡單嘅事囉。我又唔係無名大嗰種天才,我真係唔敢講自己可以創造到任何有價值嘅嘢。你會咁講,只係因為你唔知我想做嘅研究……」
「你指暗能量應用於穿梭時空方面?我覺得並唔係咩天馬行空嘅嘢嚟呀。」
她的手抖動了一下︰
「咦?你點會知……」
「有幾難估呀?你指導教授係歐陽,咁已經超過70%機會係暗能量相關啦。而且,之前喺研究室講起時空穿梭嘅相關研究嗰陣,你對眼發晒光喎。」
「邊、邊有你講得咁誇張呀?」
我彷彿能想像到她臉紅的模樣,不禁笑了︰
「我唔覺得研究穿梭時空係幾咁超現實嘅事啊。我都係做緊啲差唔多嘅嘢咋嘛。發明時光機一直都係你嘅夢想啊,你唔需要覺得唔好意思呀?應該要為自己一步步接近夢想而自豪先係。」
.
我以為這樣的鼓勵會令她高興,但她卻完全靜默下來,只有細碎的腳步聲繼續徘徊在我身邊。
轉眼間,我們已登上4樓。那扇該死的門還在VeeVee地叫個不停,華小姐再次用雙手塞住耳朵。
那隻手從我掌心抽離的一刻,才感覺到四周空氣異常乾燥寒冷。
如此沉默地走了兩層,噪音稍為減弱,華小姐放低塞住耳朵的手,輕聲說︰
「我唔係好明……」
「哦?邊方面?」
「明明研究緊啲咁冇可能嘅事,點解你可以一啲自我懷疑都冇?點解你……可以咁自信?」
這當然啊!
我做研究的楔機就是為了製造機會再次接近你,現在我基本達成目標了吧?那還有什麼好不滿的?
但這樣說一定會被她鄙視吧。我笑一笑︰
「可能係我覺得,科學就係咁樣卦。」
「……點樣?」
我伸手輕拍她的頭︰
「點講呢?我都係一個好平凡好平凡好平凡嘅人,可能我做嘅所有嘢,都冇辦法為科技帶來重大突破;但係就算我嘅研究唔成功,我起碼發現咗邊個方法係唔work。咁樣未來從事同類研究嘅人,就可以多個參考,起點就可以離目標更近。喺我嘅認知入面,人類科學從來都係咁樣前進架啦。希格斯玻色子都係好多量子物理學家用咗好幾十年先發現到架。」
.
看她沒反抗我的動作,我再次在黑暗中牽起了她的手︰
「你有冇聽過,如果身為一個平凡嘅人,就更應該去做科學研究?因為我哋現有嘅科學,都係由以前無數個平凡嘅科學家逐少逐少鋪出嚟。可以成為一份子,係光榮嚟。」
華小姐噗哧一聲笑了︰
「我真係未見過有人好似你咁欣賞自己嘅平凡囉。」
「你……係咪覺得我好天真?」
「呵,唔知呢?」
她突然搖一搖我的手︰
「喂,你睇下!嗰度有啲光,係咪出口嚟?」
我向上望去,的確看到淡淡的光芒,似乎描繪出一扇門的形勢。
「唔……呢棟樓得8層,應該差唔多到天台啦。」
「好嘢!希望度門冇鎖到啦!」
她甩開我的手跑上去,門一推之下發出VeeVee叫聲,卻還是輕易開了。
.
「你睇下,外邊好光呀!」
華小姐的聲音聽起來非常興奮,一馬當先地跑出天台。
「喂,你慢啲啦!小心整到呀!」
「唔怕喎,外邊有燈呀嘛。」
她像看見遊樂場的小孩那樣興奮地跑出天台外︰
「太好啦,終於返到嚟現代世界!」
我跟在她身後,跨過地上一排排水管,再看看四周漆黑的樓宇︰
「咁奇怪?但我明明記得呢個天台應該冇燈,而家我哋係全zone停電喎……」
「唔係燈邊有咁光喎?係呢,你講個出口喺邊?我哋快啲走啦!」
她踏著磚地清晰的影子前進,我回頭望了一眼,忍不住伸手拉住華小姐。
「真係唔係燈嚟,你望下上面?」
她轉身抬頭,一輪巨大的圓月掛在天台水箱上,潔亮的光芒潤白了她的臉。
她似要接住月光那樣張開雙臂,眼裡盡是光彩︰
「……月光……估唔到香港嘅月光都有咁光!我一直覺得香港光害咁勁唔會睇到月光架!」
「應該都係因為停咗電先見到啫。」
「嗯,我都估係。我哋喺MIT嗰時呢,每到中秋節,無名大都會叫晒全個department上天台燒嘢食架!雖然嗰度個天好清,月亮都好大又好光,不過都要自己拉幾盞戶外燈。呢度好似仲光過嗰邊咁喎,好犀利呀。」
她仰望月亮高興地回憶著往事,我伸手輕輕一拉,把她拉進自己懷裡。
「喂、你……」
「可唔可以唔好提佢住?至少而家呢一刻,唔好提。」
她扭動了一下身體,卻發現無法掙開我,乾脆定在我胸前默不作聲。
雙臂環抱著她的上半身,懷中溫暖的感覺異常充實。
而她頭髮上傳來淡淡花果的清香,又顯得相當虛幻。
我有點頭暈,把她抱得更緊︰
「我……每次聽到你講其他男人,我都好嬲。我唔係嬲你,係嬲點解呢幾年陪住你嗰個唔係我……」
她深深吸了一口氣,卻始終沒有說話。我只能繼續說︰
「我知,係我錯。會考嗰年,我唔應該放開你。陪你留學、陪你讀書、陪你一齊做研究,我全部都可以架!係咪只要當初我做得好啲,係咪只要會考放榜嗰日我冇放開你……而家喺你身邊嘅人,係咪應該會係我?」
.
她的聲音低低在我胸前徘徊,彷彿有點沙啞︰
「你,諗得太簡單啦……就算冇嗰件事,都可能會有其他問題……所以,呢種假設冇論理基礎,亦都冇意義……我哋……比起成日諗住以前點,更加應該珍惜多啲而家眼前嘅……」
「係有意義架。」
「嗯……?」
我按住她的肩膀,細細凝視她在月光下紅彤彤的臉︰
「我以前都成日覺得自己做埋好多冇用嘅嘢,全部嘢都錯晒。但係,後來我先慢慢明白,冇嘢係冇意義,亦都冇嘢會係浪費。我相信,就算我地分開呢七年,都一定有佢嘅意義所在。」
我深深吸一口氣,全身發燙︰
「對我嚟講,呢七年就係俾我發現,你對我究竟有幾咁重要。」
月光之中,她錯愕地注視我,我彷彿能從她的眼眸裡看到自己的影子︰
「你記唔記得自己喺海邊講過——感情真係好脆弱。只要用一啲距離加埋時間,再重要嘅人都會變得陌生?我就係想話俾你知,唔係咁。真正重要嘅感情,真係可以穿越時間同空間。」
她眼裡彷彿蘊含千言萬語,最後卻只是輕輕別開臉︰
「……但即使係咁,我哋都返唔到……」
「返得到!」
她被我嚇到,抬起頭凝視我。
「只要你想,只要你相信我,我就可以帶你返去。」
「……你意思係……回到過去?」
「係。」
「……有、有咩可能?」
她輕輕推開我,懷疑的表情彷彿說我是個騙子。
我望望天上的圓月,只覺得現在不拚到盡,就不會再有第二次這麼好的魔法時刻。
於是我再牽起她的手︰
「星期六朝早11點,我喺我哋相遇嗰間自修室門口等你。到時,我會證明俾你睇。」
「吓……?」
「我,會一直等到你嚟。」
.
(…待續)
= = = = = =
//2021年7月18日追加//
2021年書展,終於自資出版咗《時光機》
自資出版成本高,少量印刷,只想俾返個結局大家
可以到我嘅書店購買︰
https://morningrays.boutir.com/
希望大家會珍惜呢本得來不易嘅《時光機》
希望大家鍾意呢個結局
Q: 同patreon版有咩分別?
A: 出書前有編輯過,內容精簡啲好睇啲,更具收藏價值
Q: 書版有冇特別篇?
A: 篇幅所限,未能收錄,抱歉