សៀមរាបៈ សាលារៀនទាំងរដ្ឋ និងឯកជន និងគ្រឹះស្ថានបណ្ដុះបណ្ដាលបច្ចេកទេស វិជ្ជាជីវៈនៅក្នុងក្រុងសៀមរាបត្រូវបានបិទទ្វារបណ្ដោះអាសន្នចាប់ពីថ្ងៃសៅរ៍តទៅ បន្ទាប់ពីបុរសអាយុ ៣៨ ឆ្នាំម្នាក់ត្រូវបានរកឃើញមានផ្ទុកវីរុសកូវីដ ១៩ ហើយមនុស្សសរុប ៤៧ នាក់ផ្សេងទៀតកំពុងស្ថិតក្រោមការពិនិត្យតាមដានពីក្រសួងសុខាភិបាល។
ក្រសួងអប់រំ យុវជន និងកីឡាបានចេញសេចក្ដីប្រកាសព័ត៌មានកាលពីថ្ងៃសៅរ៍ជម្រាបជូនដល់គណៈគ្រប់គ្រងគ្រឹះស្ថានសិក្សា លោកគ្រូ អ្នកគ្រូ បុគ្គលិកអប់រំ មាតាបិតា អាណាព្យាបាល សិស្សានុសិស្ស និងសាធារណជនទាំងអស់ថា គ្រឹះស្ថានសិក្សាសាធារណៈទាំងរដ្ឋ និងឯកជនទាំងអស់នៅក្រុងសៀមរាប ខេត្តសៀមរាបត្រូវបិទទ្វារផ្អាកការសិក្សាបណ្ដោះអាសន្នចាប់ពីថ្ងៃទី ៧ មីនាតទៅរហូតដល់មានការជូនដំណឹងជាថ្មី។
ស្រដៀងគ្នានេះក្រសួងការងារ និង បណ្ដុះបណ្ដាលវិជ្ជាជីវៈបានប្រកាសអំពីការផ្អាកបណ្ដោះអាសន្ននូវការបណ្ដុះបណ្ដាលនៅតាមគ្រឹះស្ថានអប់រំបណ្ដុះបណ្ដាលបច្ចេកទេស និង វីជ្ជាជីវៈ និង មជ្ឈមណ្ឌលបណ្ដុះបណ្ដាលនៃទីភ្នាក់ងារជ្រើសរើសឯកជនដែលស្ថិតក្រោមឱសានវាទក្រសួងការងារនៅក្រុងសៀមរាប ខេត្តសៀមរាបផងដែរ។
វិធានការនេះធ្វើឡើងបន្ទាប់ពីក្រសួងសុខាភិបាលកាលពីល្ងាចថ្ងៃសៅរ៍បានប្រកាសថា បុរសម្នាក់អាយុ ៣៨ ឆ្នាំដែលមានប្រវត្តិប៉ះពាល់ផ្ទាល់ជាមួយជនជាតិជប៉ុនអាយុ ៤០ ឆ្នាំមានផ្ទុកវីរុសកូវីដ ១៩ នោះក៏មានវីរុសកូវីដ ១៩ ដែរ។
សេចក្ដីប្រកាសព័ត៌មានរបស់ក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា៖ «វិធានការនេះជាការចូលរួមទប់ស្កាត់ការរីករាលដាលនៃជំងឺរលាកផ្លូវដង្ហើមធ្ងន់ធ្ងរកូវីដ ១៩ បន្ទាប់ពីមានការរកឃើញករណីមេរោគនេះនៅលើបុរសជនជាតិខ្មែរ ១ រូបដែលប៉ះពាល់ផ្ទាល់ជាមួយជនជាតិជប៉ុនមានផ្ទុកមេរោគកូវីដ ១៩ ហើយបានចាកចេញពីខេត្តសៀមរាបទៅកាន់ប្រទេសជប៉ុនកាលពីពេលថ្មីៗនេះ»។
បន្ថែមពីលើវិធានការបិទសាលារៀន និងគ្រឹះស្ថានបណ្ដុះបណ្ដាលជាបណ្ដោះអាសន្ននេះក្រសួងទាំង ២ ក៏បានស្នើឲ្យសិស្សានុសិស្សមាតាបិតាលោកគ្រូអ្នកគ្រូ និងសាធារណជនទាំងអស់ចូលរួមទប់ស្កាត់ការរីករាលដាលនៃមេរោគនេះដោយអនុវត្តឲ្យបានខ្ជាប់ខ្ជួននូវវិធានការដែលក្រសួងអប់រំ និងក្រសួងសុខាភិបាលបានដាក់ចេញ។
លោក រស់ សុវាចា អ្នកនាំពាក្យក្រសួងអប់រំ បញ្ជាក់ពីម្សិលមិញថា ការបិទសាលារៀនបណ្ដោះអាសន្ននោះធ្វើឡើងតែសម្រាប់សាលាដែលស្ថិតនៅក្រុងសៀមរាបប៉ុណ្ណោះមិនមែននៅទូទាំងខេត្តនោះទេ។
លោកនាយករដ្ឋមន្ត្រី ហ៊ុន សែន បានបញ្ចេញមតិទៅលើការលើកឡើងមិនត្រឹមត្រូវលើបណ្ដាញសង្គមរបស់អ្នកលេងហ្វេសប៊ុកម្នាក់ដែលថា ការបិទសាលាធ្វើឡើងនៅទូទាំងខេត្ត ដោយលោកថា ការបិទសាលារៀនគឺសម្រាប់តែក្រុងសៀមរាបប៉ុណ្ណោះ។
លោកសរសេរថា៖ «គោលដៅនៃការបិទ គឺដើម្បីការពារកុមារដែលមិនចេះវិធីការពារខ្លួន។ សង្ឃឹមថា មាតាបិតា អាណាព្យាបាល ខិតខំឲ្យកូនចៅខិតខំរៀននៅផ្ទះក្នុងរយៈពេល ការបិទសាលាបណ្តោះអាសន្ននេះ»។
កាលពីល្ងាចថ្ងៃសៅរ៍ លោករដ្ឋមន្ត្រីក្រសួងសុខាភិបាល ម៉ម ប៊ុនហេង បានធ្វើសន្និសីទព័ត៌មានប្រកាសអំពីករណីបុរសម្នាក់នៅខេត្តសៀមរាប បានឆ្លងវីរុសកូវីដ ១៩ ដែលជាមនុស្សម្នាក់ក្នុងចំណោម ៤ នាក់ដែលមានប្រវត្តិប៉ះពាល់ផ្ទាល់ជាមួយជនជាតិជប៉ុនម្នាក់មានផ្ទុកមេរោគនេះ។
លោកថ្លែងថា៖ «រហូតដល់ម៉ោង ១២:៥០ នាទីថ្ងៃទី ៧ ខែមីនា ឆ្នាំ ២០២០ ក្រសួងទទួលបានលទ្ធផលពីវិទ្យាស្ថានប៉ាស្ទ័រកម្ពុជាវិញថា បុរសម្នាក់អាយុ ៣៨ ឆ្នាំដែលជាអ្នកប៉ះពាល់ផ្ទាល់ជាមួយបុរសជនជាតិជប៉ុនអាយុ ៤០ ឆ្នាំហើយមានវីរុសកូវីដ ១៩ នោះមានលទ្ធផលវិជ្ជមានវីរុសកូវីដ ១៩»។
លោកបន្តថា មនុស្ស ៣ នាក់ដែលរួមមានស្រី ២ នាក់ និងប្រុស ១ នាក់ទៀតត្រូវបានរកឃើញលទ្ធផលអវិជ្ជមានកូវីដ ១៩ នៅត្រឹមថ្ងៃធ្វើតេស្ត។ លោកថា ក្រុមគ្រូពេទ្យបង្អែកខេត្តសៀមរាបកំពុងតែបន្តតាមដានដោយយកចិត្តទុកដាក់បំផុតលើសុខភាពមនុស្សទាំង ៣ នាក់នេះនៅក្នុងរយៈពេល ១៤ ថ្ងៃទៀត»។
យោងតាមសេចក្ដីប្រកាសព័ត៌មានចេញផ្សាយកាលពីល្ងាចថ្ងៃសៅរ៍ក្រសួងសុខាភិបាលបញ្ជាក់ថា មានមនុស្សសរុប ៨ នាក់ដែលជាអ្នកមានប្រវត្តិប៉ះពាល់ផ្ទាល់ជាមួយជនជាតិជប៉ុន ដែលមានផ្ទុកកូវីដ ១៩ ក្នុងនោះរួមមានបុរសដែលបានឆ្លងអាយុ ៣៨ ឆ្នាំ ស្ត្រី ២ នាក់ បុរសម្នាក់ ស្ត្រីជនជាតិជប៉ុនម្នាក់ និងក្រុមគ្រួសាររបស់បុរសអាយុ ៣៨ ឆ្នាំ។ អ្នកដែលធ្លាប់បានប៉ះពាល់ទាំងនេះត្រូវបាននាំមកនៅបន្ទប់ដាច់ដោយឡែកនៅមន្ទីរពេទ្យបង្អែកខេត្តសៀមរាប។ ក្រៅពីនេះនៅមានអ្នកប៉ះពាល់ដោយប្រយោល ៤០ នាក់ផ្សេងទៀត។
ក្រសួងសុខាភិបាលបញ្ជាក់ថា សំណាកនៃអ្នកដែលធ្លាប់ប៉ះពាល់ផ្ទាល់ និងដោយប្រយោលទាំងអស់ត្រូវបានយកទៅធ្វើតេស្តនៅវិទ្យាស្ថានប៉ាស្ទ័រកម្ពុជា។ មនុស្ស ៣ នាក់ដែលបានប៉ះពាល់ផ្ទាល់ជាមួយជនជាតិជប៉ុនត្រូវបានធ្វើតេស្តដោយមានលទ្ធផលអវិជ្ជមាន។
ក្រសួងសុខាភិបាលបានអំពាវនាវជាថ្មីឲ្យអ្នកធ្វើដំណើរដែលចេញទៅ ឬត្រឡប់ពីតំបន់ ឬប្រទេសដែលមានការចម្លងវីរុសកូវីដ ១៩ នេះត្រូវមានការប្រុងប្រយ័ត្នខ្ពស់បំផុតដោយត្រូវចេះថែរក្សាសុខភាពផ្ទាល់ខ្លួនដោយអនុវត្តនូវវិធានការសាមញ្ញៗដូចដែលក្រសួងបានចេញផ្សាយ។ លើសពីនេះទៀត បើពួកគេមានរោគសញ្ញាដូចជា គ្រុនក្ដៅ ក្អក និងពិបាកដកដង្ហើមជាដើមទាំងក្នុងអំឡុងពេលធ្វើដំណើរ និងក្រោយពេលធ្វើដំណើរត្រូវទៅជួបវេជ្ជបណ្ឌិតនៅមន្ទីរពេទ្យរដ្ឋ និងប្រាប់ពីប្រវត្តិធ្វើដំណើរ និងរោគសញ្ញាដែលកើតមាន។
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង CDC បានបញ្ជាក់ថា គិតត្រឹមល្ងាចថ្ងៃសៅរ៍ បុរសអាយុ ៣៨ ឆ្នាំដែលមានផ្ទុកវីរុសកូវីដ ១៩ នោះមានសុខភាពល្អ និងមិនមានរោគសញ្ញានោះទេ។ ដោយឡែកអ្នកប៉ះពាល់ផ្ទាល់ ៤ នាក់ទៀត និង ៤០ នាក់ប៉ះពាល់ប្រយោលជាមួយអ្នកជំងឺជនជាតិជប៉ុនដែលតម្រូវឲ្យនៅដោយឡែកពីគេចំនួន ១៤ ថ្ងៃ និងដើម្បីតាមដានសុខភាពនោះពួកគាត់ពុំទាន់មានរោគសញ្ញាអ្វីដែរ។
លោកថ្លែងថា កម្ពុជាកំពុងធ្វើកិច្ចការនេះយ៉ាងយកចិត្តទុកដាក់ដោយសហការយ៉ាងជិតស្និទ្ធជាមួយអាជ្ញាធរដែនដី មន្ត្រីអង្គការសុខភាពពិភពលោក WHO មជ្ឈមណ្ឌលប្រយុទ្ធនឹងជំងឺឆ្លងសហរដ្ឋអាមេរិក USC-DC និងវិទ្យាស្ថានប៉ាស្ទ័រកម្ពុជា IPC។
លោក លី សូវ៉ាន់ បានសរសេរបង្ហោះលើហ្វេសប៊ុករបស់លោកពីម្សិលមិញថា បើបងប្អូនសាធារណជនមានរោគសញ្ញាក្តៅខ្លួន ឬមានរោគសញ្ញាផ្លូវដង្ហើម និងទើបធ្វើដំណើរមកពីប្រទេសដែលមានឆ្លងជំងឺ COVID-19 ឬប៉ះពាល់ជាមួយអ្នកមានជំងឺបង្កឡើងដោយមេរោគ COVID-19 ក្នុងអំឡុងពេល ១៤ ថ្ងៃមុនចេញរោគសញ្ញាសូមអញ្ជើញទៅពិគ្រោះជំងឺនៅមន្ទីរពេទ្យខ្មែរ-សូវៀតនៅភ្នំពេញ និងនៅគ្រប់មន្ទីរពេទ្យខេត្តនៅបណ្តាខេត្តទាំងអស់នៅទូទាំងប្រទេស។
លោកបន្តថា៖ «ក្នុងករណីគ្រូពេទ្យពិនិត្យឃើញថា ចូលករណីសង្ស័យដែលតម្រូវឱ្យយកវត្ថុ ឬតម្រូវឱ្យសម្រាកពេទ្យអ្នកជំងឺទាំងនេះនឹងមិនមានការបង់ថ្លៃធ្វើតេស្តរកមេរោគ COVID-19 នឹងតម្លៃព្យាបាលទេ ដែលបញ្ជាក់ថាមានវិជ្ជមាន COVID-19 ។ ការអនុវត្តនេះនឹងធ្វើឡើងទាំងជនជាតិខ្មែរ និងជនជាតិបរទេសទាំងអស់។ ព័ត៌មានបន្ថែមសូមទាក់ទងលេខ ១១៥»។
លោកវេជ្ជបណ្ឌិតក្រុស សារ៉ាត់ ប្រធានមន្ទីរពេទ្យបង្អែកខេត្តសៀមរាបបដិសេធអត្ថាធិប្បាយអំពីករណីបុរសអាយុ ៣៨ ឆ្នាំ និងអ្នកផ្សេងទៀតដែលត្រូវដាក់ឲ្យនៅដោយឡែកនៅមន្ទីរពេទ្យនេះ ដោយលោកបង្វែរសំណួរឲ្យសួរទៅក្រសួងសុខាភិបាល។
លោកស្រី ឱ វ៉ាន់ឌីន អ្នកនាំពាក្យក្រសួងសុខាភិបាលបានថ្លែងកាលពីម្សិលមិញថា លទ្ធផលធ្វើតេស្តទៅលើសមាជិកគ្រួសាររបស់បុរសវ័យ ៣៨ ឆ្នាំដែលឆ្លងវីរុសកូវីដ ១៩ គឺរកពុំឃើញមានឆ្លងវីរុសនេះទេ។
ស្របពេលជាមួយគ្នានេះព្រឹត្តិការណ៍អង្គរសង្ក្រាន្តក៏ត្រូវបានលុបចោលផងដែរ។ នេះបើតាមការបញ្ជាក់របស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីថ្ងៃសៅរ៍។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងប្រធានគណៈកម្មការរៀបចំព្រឹត្តិការណ៍អង្គរសង្ក្រាន្តបានសរសេរនៅលើហ្វេសប៊ុករបស់លោកពីម្សិលមិញថា៖ «ដោយសារតែការវិវត្តចុងក្រោយនៃស្ថានភាពជំងឺកូវីដ ១៩ នៅខេត្តសៀមរាប និងស្របតាមការណែនាំរបស់សម្ដេចនាយករដ្ឋមន្ត្រី ហ៊ុន សែន ព្រឹត្តិការណ៍សង្ក្រាន្តដែលគ្រោងនឹងរៀបចំឡើងនៅខេត្តសៀមរាប ដើម្បីត្រៀមចូលរួមអបអរសាទរបុណ្យចូលឆ្នាំថ្មីប្រពៃណីជាតិយើងខាងមុខនេះនឹងត្រូវលុបចោលជាស្ថាពរ»៕