Aah ko chahiye by Mirza Ghalib (in Urdu)

        غزل

آہ کو چاہیے اِک عُمر اثر ہونے تک،
کون جیتا ہے تری زُلف کے سر ہونے تک۔

دام ہر موج میں ہے حلقۂ صد کامِ نہنگ،
دیکھیں کیا گُزرے ہے قطرے پہ گُہر ہونے تک۔

عاشقی صبر طلب اور تمنّا بیتاب،
دل کا کیا رنگ کروں خونِ جگر ہونے تک

ہم نے مانا کہ تغافل نہ کرو گے لیکن،
خاک ہو جائیں گے ہم تم کو خبر ہونے تک۔

پرتوِ خُور سے ہے شبنم کو فنا کی تعلیم،
میں بھی ہوں ایک عنایت کی نظر ہونے تک۔

یک نظر بیش نہیں فُرصتِ ہستی غافل،
گرمئ بزم ہے اِک رقصِ شرر ہونے تک۔

غمِ ہستی کا اسدؔ کس سے ہو جُز مرگ علاج،
شمع ہر رنگ میں جلتی ہے سحر ہونے تک۔ 
       مرزا غالب

مشکل الفاظ:

     ☆ آہ— بددُعا۔
     ☆ سر— جیتنا۔
     ☆ دام— جال، پھندا۔
     ☆ موج— لہر۔
     ☆ حلقۂ — دائرہ۔
     ☆ صد کام —  سو منہ۔
     ☆ نہنگ— مگرمچھ۔
     ☆ حلقۂ صد کامِ نہنگ— مگرمچھوں کے سو منہ کا گھیرا۔
     ☆ قطرا—  ٹکڑا۔
     ☆ گُہر— موتی۔
     ☆ عاشقی— محبت۔
     ☆ طلب— ضرورت، مانگنا۔
     ☆ بیتاب—  بے چین۔
     ☆ خونِ جگر— جگر کا خون۔
     ☆ تغافل—  نظر انداز۔
     ☆ پرتو— سورج۔
     ☆ خُور— کرن، جھلک۔
     ☆ پرتوِ خُور— سورج کی کرن۔
     ☆ شبنم—  اوس۔
     ☆ فنا—  ختم۔
     ☆ عنایت—  مہربانی۔
     ☆ یک نظر—   ایک نظر۔
     ☆ بیش نہیں— زیادہ نہیں، بہت نہیں۔
     ☆ فُرصتِ ہستی—  زندگی کی فرست۔
     ☆ غافل—  لاپرواہ، بےخبر۔
     ☆ بزم— محفل۔
     ☆ گرمئ بزم—  محفل کی گرمی۔
     ☆ رقص— ناچ۔
     ☆ شرر— انگارہ۔
     ☆ رقصِ شرر—  انگارے کا ناچ۔
     ☆ غمِ ہستی—  زندگی کا غم۔
     ☆ جُز— سوائے۔
     ☆ مرگ— موت۔
     ☆ جُز مرگ—  سوائے موت۔
     ☆ شمع—  موم بتی۔
     ☆ سحر— صبح۔