សាធារណរដ្ឋកូរ៉េបានក្លាយជាដៃគូពាណិជ្ជកម្មធំជាងគេទី១៤ របស់កម្ពុជាក្នុងឆ្នាំ២០២២ ខណៈដែលទំហំពាណិជ្ជកម្មទ្វេភាគីបានកើនដល់ ៧៨០លានដុល្លារ កើនឡើង ០,៦ភាគរយ។

ស្ថិតិពាណិជ្ជកម្ម និងការពិតរបស់ក្រសួងពាណិជ្ជកម្មកម្ពុជា-កូរ៉េ បានឱ្យដឹងនាសប្ដាហ៍មុនថា កម្ពុជាបាននាំចេញទំនិញមានតម្លៃ ២៣៤ លានដុល្លារទៅកាន់ប្រទេសកូរ៉េកាលពីឆ្នាំមុន កើនឡើង ២០,៤ ភាគរយ ធៀបនិងរយៈពេលមួយឆ្នាំ ខណៈការនាំចូលធ្លាក់ចុះ ៦ ភាគរយមកត្រឹម ៥៤៥ លានដុល្លារ។

កម្ពុជាបានទទួលការអនុគ្រោះពន្ធលើការនាំចេញទៅកាន់ប្រទេសកូរ៉េ តាមរយៈកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ កិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និងប្រព័ន្ធអនុគ្រោះទូទៅក្រោមក្របខណ្ឌ អង្គការពាណិជ្ជកម្មពិភពលោក (WTO) ។

របាយការណ៍បង្ហាញថា ផលិតផលសំខាន់ៗរបស់កម្ពុជាដែលនាំចេញទៅប្រទេសកូរ៉េមានដូចជា ស្បែកជើង សម្លៀកបំពាក់ ឧបករណ៍អគ្គិសនី និងអាលុយមីញ៉ូម ខណៈដែលការនាំចូលសំខាន់ៗរួមមានយានយន្ត ភេសជ្ជៈ ស្បែកសត្វ និងស្បែក ម៉ាស៊ីន និងឧបករណ៍អគ្គិសនី និងក្រណាត់ប៉ាក់។

កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដែលចូលជាធរមានកាលពីខែធ្នូឆ្នាំមុន មានតួនាទីសំខាន់ក្នុងការជំរុញអ្នកវិនិយោគពីកូរ៉េកាន់តែច្រើនមកបណ្តាក់ទុននៅព្រះរាជាណាចក្រកម្ពុជា ដើម្បីនាំចេញទៅកាន់ប្រទេសកូរ៉េ។ ជា វណ្ណៈ – AKP