啱啱過咗嘅周末,當大家都注視歐洲國人杯,英格蘭再次落空之際,地球另一邊,世上三大共產主義大國之一,古巴出現由1959年卡斯特羅發動政變建國超過六十年罕見嘅全國性(仲要係反政府)示威,要求改革及總統下台,”down with dictatorship”。
坦白講,以畫面靚為標準嘅話,從新聞或者網絡嘅片段所見,以國際新聞認知嘅「全國性示威」嘅規模比較,古巴今次嘅示威唔算得上係極之人多勢眾,就首都夏灣拿黎講,「只係」得幾千人响總統府外聚集。
不過意義就非常重大。因為古巴憲法「反革命」活動(counter revolutionary)係刑事罪行,只要任何行為違反「國家社會主義或者古巴人民建立社會主義與共產主義或原則」就係犯罪(”contrary to the existence and objectives of the socialist state or the Cuban people to build socialism and communism.”)。所以從來都唔會有大型示威活動,因為代價太大。
而對上一次過千人嘅大型示威,已經係差唔多三十年前(1994年)。當時因為最大靠山蘇聯解體,令古巴陷入經濟、能源同糧食係做咩啊危機。因為當時無網絡資訊,加上新聞限制,國內其他地區根本唔知首都發生咩事,示威嘅訴求主要係經濟民生,最後不了了之。而隨著經濟改革,配合透旅遊業發展,之後已經無「大規模」示威活動。
今次令古巴人民企出黎,可以話係因為政治、經濟、文化同民生嘅完美風暴,所以特別令人關注。
大家都知由卡斯特羅時代開始,美國就對古巴進行禁運,去到列根就加強國家級制裁。而古巴多年一方面靠蘇聯支援,另外就靠自家嘅蔗糖(雪茄)同旅遊吸納外匯。
直到2005年,考慮到當地人民情況,Obama放鬆部份限制,美國大使館重開,當時可以話幫到古巴唔少,而且美國同古巴嘅關系亦都有所改善。之後幾年,古巴政府開放網絡,古巴人民就開始用社交媒體(FB, IG, Twitter)。不過,去到今年年頭,Donald Trump卸任前,話古巴支援恐怖活動,將所有制裁同限制調到列根時期。
首先,因為古巴係共產島國,所以上年可以用鎖國抗疫,不過換黎嘅就係零旅遊收入。正如地球上其他島國一樣,鎖國並唔能夠完全免疫,所以古巴近期疫情就開始失控(每日死亡人數官方數字都二三百)。
同時,因為Donald Trump(拜登繼續)嘅全面制裁禁運,古巴嘅最基本民生物資(包括藥物、麵粉等等)開始短缺,已經無旅遊業收外匯,更大鑊嘅係蔗糖上年失收,咁就連用美金買嘅能力都無埋,即係美帝唔比賣家賣嘅同時,自己個銀包亦乾水。
為咗揾「硬外匯」,唔知邊個天材諗咗個開官營國內「外匯店」(Dollar Shop)呢條橋,希望啲國民用私己美金買市面無晒嘅日用品。結果,日日排隊排出民憤嘅同時,亦斷埋本地小商戶嘅收入。
去到呢一刻,對於好多古巴人黎講已經輸到無得輸(”We have no fear”),配合社交媒體,結果就引發幾十年黎最大規模嘅全國性示威。
美國總統拜登今日回應,話
“The Cuban people are demanding their freedom from an authoritarian regime. I don’t think we’ve seen anything like these protests in a long, long time if, quite frankly, ever.”
睇黎佢無視南美部份國家要求美國暫停禁運,形容今次係古巴人民「響起自由號角聲」(”clarion call for freedom”),要求古巴政府聆聽人民聲音。
P.S. 其實古巴今次示威有文化藝術界嘅影響,因為近年「最有規模」(200人)嘅集會就係上年由文化、藝術同娛樂界發起嘅,唔知大家有無興趣?有就留個言,聽日分享。
報導:
《BBC》Cuba protests: Thousands rally against government as economy struggles
《The Times》Cubans have finally risen up against communist regime, says President Biden
《Financial Times》Biden calls on Cuban government to listen to protesters