ដំណើរការបោះឆ្នោតជ្រើសរើសក្រុមប្រឹក្សាក្រុង ស្រុក ទាំងប្រាំដែលទើបបំបែក និងបង្កើតថ្មី សម្រាប់អាណត្តិទី១ នៅក្នុងភូមិសាស្ត្រខេត្តកណ្ដាល កំពង់ស្ពឺ និងខេត្តក្រចេះ បានបិទបញ្ចប់ជាផ្លូវការ និងប្រព្រឹត្តទៅដោយរលូន។
ក្នុងសេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប កាលពីម្សិលមិញ បានឱ្យដឹងថា ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងអរិយក្សត្រ ក្រុងសំពៅពូន នៃខេត្តកណ្តាល ក្រុងឧដុង្គម៉ែជ័យ ស្រុកសាមគ្គីមុនីជ័យ នៃខេត្តកំពង់ស្ពឺ និងស្រុកអូរគ្រៀងសែនជ័យ នៃខេត្តក្រចេះ បានបិទបញ្ចប់កាលពីព្រឹកថ្ងៃទី៩ ខែមេសា ឆ្នាំ២០២៣។
សេចក្ដីប្រកាសបន្ថែមថា ការិយាល័យបោះឆ្នោតទាំង៥ បានបើកដំណើរការព្រមៗគ្នានៅវេលាម៉ោង ៧:០០នាទីព្រឹក ដើម្បីអនុញ្ញាតឱ្យសមាជិកក្រុមប្រឹក្សាឃុំ សង្កាត់ មានសិទ្ធិបោះឆ្នោតជ្រើសរើសមុខតំណែងចំណុះឱ្យក្រុង ស្រុក ដែលទើបបំបែក និងបង្កើតថ្មីខាងលើនេះ។
គ.ជ.ប បន្តថា ការិយាល័យបោះឆ្នោតទាំងអស់ត្រូវបានបិទបញ្ចប់ការបោះឆ្នោត នៅម៉ោង៨:២៥នាទី ដោយសារអ្នកមានសិទ្ធិបោះឆ្នោតបានមកបោះឆ្នោតគ្រប់ចំនួន ហើយគណៈកម្មការការិយាល័យបោះឆ្នោត បានបន្តនីតិវិធី ដើម្បីរាប់សន្លឹកឆ្នោតជាបន្តបន្ទាប់។
ស្ថាប័នខាងលើបញ្ជាក់ថា៖ «ដំណើរការនៃការបោះឆ្នោតបានប្រព្រឹត្តទៅដោយរលូន មានសន្តិសុខ សុវត្ថិភាព សណ្ដាប់ធ្នាប់ល្អ គ្មានអំពើហិង្សា និងគ្មានការគំរាមកំហែងៗ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា រាល់ការបោះឆ្នោត គឺជាកាព្វកិច្ចរបស់គណបក្សប្រជាជនកម្ពុជា ដែលគណបក្សតែងចូលរួមឈរឈ្មោះ និងចូលរួមគ្រប់សកម្មភាព។ លោកបន្ថែមថា ការបោះឆ្នោតជ្រើសរើសក្រុមប្រឹក្សាក្រុង និងស្រុកខាងលើនេះ គណបក្សរបស់លោកនៅតែទទួលបានជោគជ័យ។
លោកបញ្ជាក់ថា៖ «រាជរដ្ឋាភិបាលបង្កើតក្រុង និងស្រុកថ្មី អ៊ីចឹង យើងត្រូវការក្បាលម៉ាស៊ីនដឹកនាំក្រុង និងស្រុកទាំងនោះ ដើម្បីដឹកនាំ និងអភិវឌ្ឍតំបន់ទាំងនោះឱ្យកាន់តែជឿនលឿន និងរីកចម្រើន ជាពិសេស បង្កើនប្រសិទ្ធភាពបម្រើសេវាសាធារណៈដល់ប្រជាពលរដ្ឋនៅតាមមូលដ្ឋាន»។
លោកបន្តថា គណបក្សប្រជាជនកម្ពុជា តែងមានម្ចាស់ការរាល់គ្រប់ដំណើរការនៃការបោះឆ្នោតជ្រើសរើសក្រុមប្រឹក្សាក្រុង និងស្រុក ដែលទើបបង្កើតថ្មី ដែលអនុវត្តទៅតាមកម្មវិធីរបស់ គ.ជ.ប បានដាក់ចេញ។
អ្នកនាំពាក្យគណបក្សភ្លើងទៀន លោក កឹម សួភីរិទ្ធ បានឱ្យដឹងថា គណបក្សភ្លើងទៀន មានអង្គបោះឆ្នោតនៅគ្រប់ក្រុង ស្រុក ទាំងប្រាំខាងលើនេះ ប៉ុន្តែបើតាមលទ្ធផលបឋម នៅស្រុកអូរគ្រៀងងសែនជ័យ នៃខេត្តក្រចេះ គឺគណបក្សរបស់លោកបានបាត់បង់អាសនៈចំនួនមួយ ហើយនៅស្រុកសាមគ្គីមុនីជ័យ នៃខេត្តកំពង់ស្ពឺ ក៏បាត់អាសនៈចំនួនមួយផងដែរ។
លោកបន្ថែមថា ក្រៅពីស្រុកមួយនៅខេត្តក្រចេះ និងខេត្តកំពង់ស្ពឺ គឺអ្នកមានសិទ្ធិបោះឆ្នោតរបស់គណបក្សភ្លើងទៀន នៅការិយាល័យផ្សេងរក្សាសំឡេងនៅតែដដែល។ លោកបន្តថា ការបោះឆ្នោតជ្រើសរើសក្រុមប្រឹក្សាក្រុង ស្រុក គឺសំខាន់បើបក្សមានអាសនៈតែ៣ បើបាត់សំឡេងតែ១ នឹងមិនជាប់ជាក្រុមប្រឹក្សាស្រុកនោះទេ។
លោកបញ្ជាក់ថា៖ «អ្នកដែលជាអង្គបោះឆ្នោតហ្នឹង គាត់បានបោះឱ្យគេ គឺប្ដូរនឹងផលប្រយោជន៍»។ អ្នកនាំពាក្យនិយាយថា ចំពោះការបោះឆ្នោតជ្រើសរើសក្រុមប្រឹក្សាក្រុង ស្រុកនេះ គឺជាការបោះឆ្នោតជាតំណាង ដូច្នេះ មិនមានបញ្ហាអ្វីចោទនោះទេ ព្រោះបោះឆ្នោតតែមួយម៉ោង ហើយអ្នកមានសិទ្ធិបោះឆ្នោតមានមិនច្រើននោះទេ។
លោក កឹម សួភីរិទ្ធ បន្ថែមថា ការបោះឆ្នោតជ្រើសរើសក្រុមប្រឹក្សាក្រុង ស្រុកទាំងប្រាំខាងលើនេះ គឺមានតែគណបក្សភ្លើងទៀន និងគណបក្សប្រជាជនកម្ពុជា ដែលបានចូលរួម ប៉ុន្តែអ្វីដែលគួរឱ្យសោកស្ដាយ គឺគណបក្សរបស់លោកគ្រប់គ្រងអង្គបោះឆ្នោតរបស់ខ្លួនមិនបានល្អ ដែលជាហេតុបោះឆ្នោតឱ្យបក្សផ្សេងទៅវិញ។
អ្នកនាំពាក្យរដ្ឋាភិបាល លោក ផៃ ស៊ីផាន ធ្លាប់ប្រាប់ខ្មែរថាមស៍ កាលពីថ្មីៗនេះថា ការបង្កើតក្រុង និងស្រុកខាងលើនេះ គឺជាកិច្ចការនៃរដ្ឋបាល ដើម្បីមានប្រសិទ្ធភាពសម្រាប់ផ្ដល់សេវាសាធារណៈដល់ប្រជាពលរដ្ឋ និងស្ថិតនៅជិតប្រជាពលរដ្ឋ ព្រោះកន្លងមក គឺមន្ត្រីនៅឆ្ងាយពីប្រជាពលរដ្ឋ។ លោកថ្លែងថា ការបង្កើតក្រុង និងស្រុក គឺពិនិត្យលើចំនួនប្រជាពលរដ្ឋ និងភូមិសាស្ត្រ ជាចម្បង។
លោកបន្ថែមថា រដ្ឋាភិបាលធ្វើកំណែទម្រង់បែបប្រជាធិបតេយ្យ នៅថ្នាក់ក្រោមជាតិ ព្រោះផ្ដោតសំខាន់ទៅលើសេវាកម្មសាធារណៈ និងការចូលរួមរបស់មហាជន។
លោកនិយាយថា ពាក់ព័ន្ធនឹងការចូលរួមរបស់មហាជន គឺកាលណានៅកៀកមហាជន គឺមន្ត្រីបានដឹងឮថា តើប្រជាពលរដ្ឋត្រូវការអ្វី? ចង់បានអ្វី? ព្រោះកម្ពុជាអនុវត្តរបបប្រជាធិបតេយ្យ ដើម្បីផ្ដល់ឱកាសឱ្យប្រជាពលរដ្ឋចូលរួមទាំងការសម្រេច អភិវឌ្ឍ និងគោលនយោបាយ។
គួររម្លឹកថា ការប្រកាសលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាក្រុង ស្រុក ទាំងប្រាំខាងលើនេះ នឹងប្រព្រឹត្តទៅនៅថ្ងៃទី២៤ ខែមេសា ឆ្នាំ២០២៣ ខាងមុន។
កាលពីថ្ងៃទី៥ ខែមករា ឆ្នាំ២០២៣ លោកនាយករដ្ឋមន្ត្រី ហ៊ុន សែន បានចេញអនុក្រឹត្យកំណត់ចំនួនសមាជិកក្រុមប្រឹក្សាក្រុងអរិយក្សត្រ មានចំនួនសមាជិក ១៩នាក់ និងក្រុងសំពៅពូន មានចំនួន១៩នាក់។
អនុក្រឹត្យបន្តថា ចំពោះក្រុងឧដុង្គម៉ែជ័យ មានសមាជិកក្រុមប្រឹក្សា ១៧នាក់ និងស្រុកសាមគ្គីមុនីជ័យ មានសមាជិកក្រុមប្រឹក្សា ១៩នាក់។ អនុក្រឹត្យបន្ថែមថា ស្រុកអូរគ្រៀងសែនជ័យ មានចំនួនសមាជិកក្រុមប្រឹក្សា ១៥នាក់៕