أنا بقيت بكره أمشي في الشارع..لأني بحس قد أيه أنا ضعيفة..وخايفة..وحاسة أني عاملة عاملة..و أنا بكره الضعف وأصلا مش ضعيفة
ماشي هاعمل فيها ال7 رجالة في بعض و مش ضعيفة و هابهدل أي حد يكلمنى..هاتخانق كام مرة في الشارع؟؟؟؟؟؟؟؟ وبعد ما اتخانق هاخد أيه؟ الناس هتتلم و هيبصولي انا بلوم كأني كدابة أو مجنونة أو صايعة أو شوفوا لبسة أيه وليها عين تتكلم..ساعات ببقى فعلا مش قادرة اتخانق..مهزومة..مرهقة من المعارك اليومية..باخد الكلمة وأسكت..يعني هي جت عليه
بحس أن اللي بيعاكسني ده كاسر عيني..ساعات ببقى فرحانة وفخورة بنفسي..وأنزل الشارع واحد معدي يبصلي في عنايا و يقولي حاجة تفكرني انا مين وفين ومكاني أيه في المجتمع ده..ان هو مهما كان أقل مني، المجتمع بيديلوا كل الحق أنه يقولي أي كلمة أو يلمسني في أي حتة أي وقت و أبقي وريني بقى هتعملي أيه!
ولسة لغاية دلوقتي بتكسف جدا وبحس بالذنب خاصة لو ماشية مع حد بشتغل معاه وعيزاه يحترمني..يعدي واحد على عجلة في ثانية يسلبني احترامي..ابتسم بتوتر وخلاص
من 3 ايتدائي وانا بيتم التحرش بيا في الشارع..3 ابتدائي..هل ممكن تتخيل علاقتي بجسمي إلى أي حد تشوهت؟ وبعدين بذاتي
أنا بستغرب أن الستات ماتحولوش كلهم لكارهين للمجتمع من كتر المعاملة اللي بقلهم كتير بيتعملوها في الشارع..بس ده الشيء الرائع أن احنا لسة حاسين بدورنا وأهميته وبنقوم بيه..
تحية لكل بنت وست..بترفع راسها و تنزل كل يوم الشارع و متخافش ومتحبسش نفسها في البيت وتتعالى على قلة الأدب اليومية أو ساعات تروح ضربة اللي بيعكسها بالشبشب..
No comments:
Post a Comment