بسم الله الرحمن الرحيم
طبعا التحرش الجنسى ده موضوع محرج جدا لما نجي نتكلم عليه في مصر بس طبعا قبل ما نبتدي نتكلم علي موضوع التحرش الجنسي لازم نفرق بين شويه حاجات.....
*وأرجو من أي شخص ان يقرأ كلامي حتي الاخر علشان محدش يخد كلامي بمعني مختلف غير اللي أنا أقصده.
طبعا أنا بحثت عن تعريف علمي للتحرش الجنسي لقيت شويه نتايج يريت حضرتكو تخليكو معايا واحده واحده:
الغزل وهو ذكر الصفات الجميلة للمحبوب بهدف التودد إليه وإسعاده.
"المراودة" فهو لفظ ورد فى القرآن الكريم فى سورة يوسف، واللفظ يصف محاولة امرأة العزيز إغواء يوسف وإغرائه وإثارته لكي يقوم بمواقعتها، ولكنه عليه السلام صمد أمام هذه المراودة. إذن فالمراودة تجمع معاني الإغواء والإغراء والإثارة فى كلمة واحدة.
هتك العرض فقد عرفه القانون المصري فى المادة 268 بأنه " فعل مخل بالحياء يقع على جسم مجني عليه معين، ويكون على درجة من الفحش إلى حد مساسه بعورات المجني عليه التى لا يدخر وسعًا لصونها وحجبها عن الناس.
تصوري لتعريف التحرش بصفه عامه هو التطفل علي الحريه الشخصيه لشخص ما علي غير رغبته وهو يعتبر شئ مزعج فعلا.
وعلي طريقه القذافي بما انه يسمى تحرش جنسي فهو متعلق بمراءه وراجل....
فهو مرتبط بالجنسين الذكر والانثي....
بس بصراحه كده أنا رأيي ان الغزل ده او المعاكسه دي من الاخر دي سبب من أسباب السعاده في حياتنا وطبعا أن مش عايز حد يفهم أن انا مقطع السمكه وديلها ولا حاجه ده (ده أنا طخين وأبويا نفسو ان انا اخس بأي طريقه وبتحرج جدا في الحياه الواقعيه ومش بعاكس خالص)
بس فعلا شعور جميل للولد لما يحس أن هوا مقبول وكذلك للبنات لما تحس ان هيا عليها الطلب ....ده كلام بكل صراحه كده محدش يزعل.
بس بالنسبه للتحرش الجنسي بمعناه الحرفي أنا بصراحه بشمئز من التصرفات دي.
طبعا التصرفات المقرفه اللي زي كده دي صراحه لازم يعاقب عليها القانون.
اما نيجي لأسبابها:-
طبعا أي شخص هيقول السيدات هما السبب فهو بيسلب نفسه من الاراده وبالتالي بيكون مفيش فرق بينه وبين الحيوان وساعتها الواجب انه يوضع في قفص للناس تتفرج عليه زي اللي في حديقه الحيوانات ,فسبب حبسهم مش أن هما حيوانات معندهومش عقل وأنما بسبب أن السيطره علي تصرفاتهم غير ممكنه وبالتالي يتم حبسهم في قفص علشان يسيطروا عليهم لأنهم يعتبرو خطر علي من بجانبهم.....
بس لما نيجي للأسباب الحقيقه هنلاقي أن أهم أسباب التحرش الجنسي في مصر عامه هي:
*أولا: الفقر لأن الفقر ده مرض ابن كلب بيخلي النزيه يسرق علشان يكفي نفسه ويخلي المحترم يحاول يتحرش بالسيده اللي واقفه جمبه أو معاه في الأتوبيس بسبب الحرمان...وده اللي بيخلينا بنقول أن أهم مشاكلنا في مصر هي الفقر علشان اللي مش لاقي يأكل مش هيبقي فاضي يتعلم الآداب العامه فهو مشغول طوال الوقت لتدبير معيشته.
*ثانيا: التربيه علشان أنا أول مره غلطت في شئ كانت النتيجه ان أبويا عاقبني علي غلطي وفهمني أن ده شئ مش مقبول وبالتالي أنا ابتديت أعرف ايه الغلط من الصح منذ أن كنت طفلا أصبحت بطبيعتي لاأقدر علي فعل الامور السيئه مثل التحرش أو السرقه ألخ......
*وأكبر مشكله عند المصريين جمعيا وليست سببا فقط في التحرش الجنسي وانما سببا في كل المشاكل الموجوده بمصر وهي عدم تفعيل القانون بشكل كامل ....ومحاوله فض المشاكل بالحلول العرفيه وماشابه بصراحه كدا أي واحد دلوقتي ممكن يقطع ودن واحد بسكينه وبعد كده يعملو قعده صلح عرفيه يدفع شويه فلوس ويخلص الموضوع وكذلك في موضوع التحرش الجنسي هذا فلو تم تطبيق القانون بشكل كامل علي كل شخص خالفه لعرف كل شخص سيخالف القانون انه سينال جزاءه المستحق ولن يكون هناك تسويات أو مسوامات فأنه سيتوجب عليه الالتزام تماما بالقانون بحذافيره وأن لم يلتزم بالقانون فأنه سيصبح عبره لمن يعتبر .....
_____________________________________________________
-مشكلة التحرش الجنسي ناتجه عن دوله فاسده وحكام فاسدين عبثو بمصير محكوميهم جعلوا من نفسهم مثال في عدم الامانه وقله الوطنيه والطمع والجشع (أنا لما أعرف أن ولي أمري شخص فاسد فساعتباره قدوه لي وامشي علي منواله ).
ومن هذا المنطلق تفكك المجتمع وأصبح كل شخص يفكر في نفسه ومنفعته الشخصيه فقط لم يعد معظم الناس يقدرون بعضهم البعض فلو عرف الشخص الذي يتحرش بسيده في الشارع أن زوجته ربما توضع في نفس الموقف لما فكر بفعل هذا الشئ المنكر ولكن الكل يقول يلا نفسي لم يعد الشخص الذي يتحرش بفتاه يهتم لشعور هذه الفتاه أو ما قد يكون تأثير هذا الفعل علي هذه السيده أو علي زوجها أو أخوها أو أبوها في حين أنه لن يقبل أن يتعرض أحد من أهل بيته لهذا الموقف ....لقد أصبحنا دوله البلطجه وأصبحت القوي في الذراع وليست في العقل فلم يعد يعتد بالرجل المتعلم في وطننا هذا كما يعتد بالبلطجي أصبحنا دوله الخوف وكل شخص يصنع عالمه منفرد فلم يعد يهتم الغني بالفقير والقوي بالضعيف ....
ولكني كلي أمل بعد ثورتنا المجيده في مستقبل أفضل .
-نري الخطوط التي كنا نمشي عليها قبل الثوره ونمشي علي عكسها تماما وبمجرد أن يحتضن المجتمع (الثري القوي) المجتمع (الفقير الضعيف) كما حدث أثناء الثوره تنتهي تلك الظواهر السيئه المسيئه لحضارتنا ودولتنا وثقافتنا.
وشكراااا
حلوة يا اتش :))
ردحذفلا توجد علاقة مباشرةبين الفقر و التحرش لأنى وجدت أقبح أشكال التحرش تمارس من الأغنياء لسطوة المال و ليس العكس !!!
ردحذفو مسألة تفعيل القانون قد تكون مفيدة عندما يتعدى الأمر المعاكسه الفجة إلى الملامسه الصريحة لكن المشكلة أن ذلك يتطلب شجاعة شديده من الفتاة و مسانده من الرجال القريبيين منها و ذلك لا يتوفر غالباً فتصبح المجنى عليها متهمه بفضح نفسها بنفسها.
الأهم من كل هذا العمل على تغيير وجهه نظر بعض الرجال الذين يظنون مثل سعادتك أن المعاكسة بالكلام حاجة لطيفة .الكلام الخارج بيوجع و خصوصا لما تكون الواحدة محترمة في لبسها و ماشيه مع بناتها وتسمع كلام من عينة أنا عايز **** و دى أقل حاجه و للأسف سيادتك و أمثالك بيعتبروه غزل ظريف و أحساس بالمرجلة مقبول من الشباب الصغير الفرحان بنفسه!!!
عيب عليكم عيب !!!!!!!