.jpg)
ទិដ្ឋភាពអាងចម្រោះទឹកកខ្វក់នៅខេត្តព្រះសីហនុបច្ចុប្បន្ន។ សហការី
ព្រះសីហនុៈ រដ្ឋាភិបាលនឹងចាប់ផ្ដើមសាងសង់ស្ថានីយចម្រោះទឹកកខ្វក់ក្នុងខេត្តព្រះសីហនុនៅដើមឆ្នាំនេះដើម្បីដោះស្រាយបញ្ហាទឹកកខ្វក់ដែលហូរចូលសមុទ្រ ហើយតាមផែនការអាចរួចរាល់នៅចុងឆ្នាំ ២០២០ ដោយត្រូវចំណាយថវិកាកម្ចី ១៩០ លានដុល្លារ។ ប៉ុន្តែមន្ត្រីជំនាញថា ស្ថានីយចម្រោះទឹកថ្មីបន្ថែមនេះ មិនទាន់អាចដោះស្រាយបញ្ហាបានទាំងស្រុងទេ។
លោក ហេង រ័ត្នពិសិដ្ឋ អគ្គនាយកសាធារណការនៃក្រសួងសាធារណការ និងដឹកជញ្ជូន ដែលជាអ្នករៀបចំផែនការនេះ បានប្រាប់កាសែតភ្នំពេញប៉ុស្ដិ៍ពីម្សិលមិញថា ក្នុងចំណោមថវិកា ១៩០ លានដុល្លារដែលត្រៀមខ្ចីពីដៃគូអភិវឌ្ឍន៍នេះត្រូវចំណាយលើការសាងសង់បណ្ដាញលូបង្ហូរទឹកស្អុយប្រវែង ៤៥ គីឡូម៉ែត្រ និងសាងសង់អាងចម្រោះទឹកកខ្វក់ថ្មីមួយបន្ថែមនៅក្នុងខេត្តព្រះសីហនុ។ប៉ុន្តែលោកមិនបានបញ្ជាក់ពីថ្ងៃនៃការចាប់ផ្ដើមសាងសង់ទេ ខណៈគម្រោងមេជិតបញ្ចប់។
លោកថា៖ «នៅក្នុងខែ ១ [មករា] យើងនឹងបញ្ចប់ផែនការមេហើយខិតខំប្រឹងប្រែងស្វែងរកថវិកា ហើយក្នុងហ្នឹង តម្រូវការដំបូងគឺយើងត្រូវសាងសង់ស្ថានីយចម្រោះទឹកកខ្វក់ឱ្យមានសមត្ថភាពអាចចម្រោះទឹកកខ្វក់ចំនួន ៤ ម៉ឺនម៉ែត្រគុបក្នុង ១ ថ្ងៃ ហើយបណ្ដាញលូក្នុងជំហានដំបូង គឺវាត្រូវការ ៤៥ គីឡូម៉ែត្រដើម្បីទប់ទឹកកខ្វក់កុំឱ្យហូរចូលសមុទ្រទៀត»។
លោក ហេង រ័ត្នពិសិដ្ឋ បន្តថា ផែនការមួយនេះបានធ្វើឡើងតាំងពីចុងឆ្នាំ ២០១៧ មកម្ល៉េះ ដោយលោកអះអាងថា មានលក្ខណៈទំនើបជាងអាងចម្រោះទឹកកខ្វក់បច្ចុប្បន្ន ព្រោះវាមានសមត្ថភាពពិសេសអាចបន្សុទ្ធទឹកបានស្អាត និងបានបរិមាណទឹកច្រើនជាងមុន។
បច្ចុប្បន្ននៅខេត្តព្រះសីហនុមានស្ថានីយចម្រោះទឹកកខ្វក់តែ ១ កន្លែងប៉ុណ្ណោះ ហើយអាចមានសមត្ថភាពបន្សុទ្ធទឹកកខ្វក់បានប្រមាណតែ ៦ ពាន់ម៉ែត្រគុបក្នុង ១ ថ្ងៃ ខណៈខេត្តនេះមានការបញ្ចេញទឹកកខ្វក់ស្អុយជាង ៣ ម៉ឺនម៉ែត្រគុប ក្នុង ១ ថ្ងៃ។
លោក រ័ត្នពិសិដ្ឋ អះអាងថា ទម្រាំស្ថានីយចម្រោះទឹកកខ្វក់ថ្មីសាងសង់រួចគឺអាជ្ញាធរពាក់ព័ន្ធនឹងបង្កើតជញ្ជាំងទប់ទឹកបណ្ដោះអាសន្នឬហៅថា (Gabion) នៅតាមបណ្ដាអូរទាំង ៥ ដែលជាប្រភពបង្ហូរទឹកហូរចូលទៅក្នុងសមុទ្រដើម្បីកាត់បន្ថយការហូរភក់ល្បាប់ និងទឹកកខ្វក់កុំឲ្យហូរធ្លាក់ចូលទៅសមុទ្រច្រើនពេក។
លោកបានបញ្ជាក់ថា៖ «ថវិកាសម្រាប់សាងសង់ Gabion ដើម្បីទប់ទល់កុំឱ្យទឹកហ្នឹង (កខ្វក់) ហូរចូលសមុទ្រច្រើនពេក គឺត្រូវចំណាយថវិកាជាតិពី ៣ ទៅ ៤ លានដុល្លារ។ទឹកកខ្វក់វាមាន ២ ប្រភេទគឺទឹកពណ៌ខ្មៅ និងទឹកពណ៌ប្រផះ អ៊ីចឹង Gabion ហ្នឹងគឺជួយចម្រោះទឹកខ្មៅទៅជាប្រផេះ ហើយហូរចូលសមុទ្រដើម្បីកាត់បន្ថយជាតិកខ្វក់ពេលវាហូរចូលទៅប្រភពទឹកធម្មជាតិ»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) ដែលជាអង្គការតែងតាមដានបទល្មើសរំលោភឆ្នេរសមុទ្របានសាទរចំពោះវិធានការទប់ស្កាត់ទឹកកខ្វក់ដែលហូរចូលសមុទ្រនៅក្នុងខេត្តព្រះសីហនុនេះ ប៉ុន្តែលោកស្នើឲ្យពន្លឿនការសាងសង់ស្ថានីយចម្រោះទឹកកខ្វក់នេះឲ្យបានឆាប់បំផុត ហើយត្រូវរៀបចំឆ្នេរសមុទ្រឡើងវិញ ដើម្បីទាក់ទាញ ភ្ញៀវទេសចរឲ្យវិលត្រឡប់ទៅកម្សាន្តតាមទីតាំងឆ្នេរសមុទ្រទាំងនោះដូចពីពេលមុន។
បើតាមការបញ្ជាក់ពីលោក ហេង រ័ត្នពិសិដ្ឋ នៅក្នុងខេត្តព្រះសីហនុ គឺមានកន្លែងដែលត្រូវធ្វើស្ថានីយចម្រោះទឹកកខ្វក់ ៤ ទីតាំង ហើយ ១ កន្លែងដែលត្រូវធ្វើឲ្យរួចនៅចុងឆ្នាំ ២០២០ គឺជាទីតាំងដែលរងផលប៉ះពាល់ធ្ងន់ធ្ងរជាងគេ។
ប៉ុន្តែលោកថា នេះមិនមានន័យថាអាចលុបបំបាត់ទាំងស្រុងចំពោះទឹកកខ្វក់ដែលកំពុងហូរទៅប្រភពទឹកធម្មជាតិនោះទេ តែអាចជួយចម្រោះទឹកពីពណ៌ខ្មៅទៅជាប្រផេះ ដែលមិនបង្កឱ្យមានផលប៉ះពាល់ដល់បរិស្ថានឡើយ៕
