.jpg)
ប្រជាពលរដ្ឋតវ៉ានៅមុខសាលាដំបូងខេត្តព្រះសីហនុ ដើម្បីទាមទារឲ្យតុលាការដោះលែងតំណាងរបស់ពួកគេ ៤ នាក់។ រូបថត CCFC
ព្រះសីហនុ: សាលាដំបូងខេត្តព្រះសីហនុកាលពីម្សិលមិញបានបើកសវនាការលើសំណុំរឿងតំណាងពលរដ្ឋសហគមន៍អូរខ្សាច់ចំនួន ៤ នាក់រស់នៅឃុំអូរត្រេះ ស្រុកស្ទឹងហាវ ខេត្តព្រះសីហនុ បន្ទាប់ពីតុលាការបង្គាប់ឲ្យឃុំខ្លួនពីបទ «ជនប្រើអំពើហិង្សាលើអ្នកកាន់កាប់អចលនវត្ថុដោយសុចរិត» ក្នុងជម្លោះដីធ្លីជាមួយឧកញ៉ា តាន់ តាប់ និងលោក ឡុញ វណ្ណ: ដែលជាដើមបណ្ដឹង។
យ៉ាងណាក្ដីនៅក្នុងពេលសវនាការកំពុងដំណើរការក៏មានពលរដ្ឋប្រមាណជិត ៣០០ នាក់បាននាំគ្នាមកឈរលើកបដាតវ៉ានៅខាងមុខសាលាដំបូងខេត្តព្រះសីហនុដោយស្រែកស្នើសុំឲ្យតុលាការទម្លាក់បទចោទ និងដោះលែងតំណាងពួកគេទាំង ៤ នាក់រួមមាន លោក កៅ ហេង អាយុ ៤៣ ឆ្នាំ, អ្នកស្រី លុច ទូច អាយុ ៥៥ ឆ្នាំ,លោក ញ៉ាញ់ ជាតិ អាយុ ៣៥ ឆ្នាំ និងលោក មែន ខេន អាយុ ៣៦ ឆ្នាំ ដោយពួកគេបានត្អូញត្អែរថាដល់រដូវបុណ្យភ្ជុំបិណ្ឌហើយគួរតែដោះលែងពួកគាត់ទាំង ៤ នាក់ឲ្យមានសេរីភាព និងបានជួបជុំគ្រួសារវិញ។
លោក យូ វាសនា តំណាងពលរដ្ឋសហគមន៍អូរខ្សាច់ទាំងនោះបានថ្លែងថា ក្នុងដំណើរការបើកសវនាការក្រុមគ្រួសារ និងប្រជាពលរដ្ឋសហគមន៍ដែលមានជម្លោះដីធ្លីចំនួន ១៣ សហគមន៍ផ្សេងទៀតបានស្នើសុំឲ្យទម្លាក់បទចោទអ្នកស្រី ឡុច ទូច ជាតំណាងសហគមន៍អូរខ្សាច់ និងសមាជិក ៣ នាក់ដើម្បីឲ្យមានសេរីភាពឡើងវិញ។
លោកបានបន្តថា៖ «តុលាការបានសួរពួកគាត់ទាំង ៤ នាក់នេះហើយ ហើយខ្ញុំនៅមិនទាន់ដឹងពីកាលបរិច្ឆេទដែលត្រូវប្រកាសសាលក្រមទេ ប្រហែលជាគេសួរពួកគាត់ចប់អស់ហើយទើបគេកំណត់ថ្ងៃប្រកាសសាលក្រមតាមក្រោយទៀត»។
លោក កែវ ប៊ុនធឿន មេធាវីការពារក្ដីឲ្យតំណាងពលរដ្ឋទាំង ៤ នាក់នោះបានថ្លែងថា តុលាការបានសាកសួរជនត្រូវចោទ និងសាក្សីមួយចំនួន ប៉ុន្ដែនឹងបន្តសាកសួរសាក្សីចំនួន ៥ នាក់បន្ថែមទៀតនៅថ្ងៃទី ៣ ខែវិច្ឆិកាខាងមុខនេះ ប៉ុន្ដែលោកក៏នៅមិនទាន់ដឹងពីថ្ងៃប្រកាសសាលក្រមនៅឡើយដែរ។
លោកបន្តថាលោកមានសង្ឃឹមច្រើនចំពោះតុលាការថានឹងទម្លាក់បទចោទលើកូនក្ដីលោក និងដោះលែងពួកគេឲ្យមានសេរីភាពឡើងវិញ។
លោកថា៖ «ម្សិលមិញហ្នឹងតុលាការអត់មានពេលគ្រប់គ្រាន់សួរ អ៊ីចឹងគាត់លើកពេលសួរបន្តទៀត។ បន្ទាប់ពីសួរនាំពួកគាត់ហ្នឹងគឺតុលាការមិនទាន់មានឯកសារ និងភ័ស្ដុតាងគ្រប់គ្រាន់សម្រាប់ដាក់បន្ទុកលើកូនក្ដីខ្ញុំទេ អ៊ីចឹងខ្ញុំគិតថា តុលាការអាចនឹងដោះលែងពួកគាត់នាពេលឆាប់ៗខាងមុខនេះ»។
លោក លឹម ប៊ុនហេង ព្រះរាជអាជ្ញារងនៃសាលាដំបូងខេត្តព្រះសីហនុបានឲ្យដឹងថា សំណុំរឿងនេះមិនទាន់ដល់តួនាទីរបស់លោកដែលត្រូវឆ្លើយទេ «សួរទៅអ្នកនាំពាក្យតុលាការទៅព្រោះសំណុំរឿងនេះមិនទាន់ដល់ពេលខ្ញុំត្រូវឆ្លើយទេ»។
ក្រុមពលរដ្ឋក្នុងពេលតវ៉ានៅមុខសាលាដំបូងខេត្តព្រះសីហនុពីម្សិលមិញ។ រូបថត CCFC
លោក យឹម ប៊ុណ្ណារ៉េត អ្នកនាំពាក្យសាលាដំបូងខេត្តព្រះសីហនុបានថ្លែងថា លោកមិនបានដឹងរឿងនេះទេ ដោយសារលោកមិននៅក្នុងសវនាការនោះ។ លោកថា៖ «ខ្ញុំអត់ដឹងទេ ព្រោះខ្ញុំមិនមែនជាអ្នកជំនុំជម្រះផង»។
លោកឧកញ៉ា តាន់ តាប់ និងលោក ឡុញ វណ្ណ: មិនអាចទាក់ទងសុំការបញ្ជាក់ជុំវិញករណីនេះបានទេកាលពីម្សិលមិញ។
ទាក់ទងនឹងសំណុំរឿងនេះមានពលរដ្ឋ ៦ នាក់ក្នុងចំណោម ៥៦ គ្រួសារត្រូវបានលោកឧកញ៉ា តាន់ តាប់ ប្តឹងទៅអាវុធហត្ថ ហើយត្រូវបានចាប់ឃាត់ខ្លួនកាលពីថ្ងៃទី ៧ ខែឧសភា ឆ្នាំ ២០១៨ ខណៈពេលដែលពួកគាត់កំពុងតែត្រួសត្រាយសម្អាតស្មៅ និងព្រៃនៅលើដីរបស់ពួកគាត់ដែលបានកាន់កាប់តាំងពីឆ្នាំ ១៩៩២ មកដោយមានការទទួលស្គាល់ពីអាជ្ញាធរមូលដ្ឋាន ប៉ុន្តែលោកឧកញ៉ា តាន់ តាប់ ក៏មានលិខិតកាន់កាប់លើដីនោះរហូតដល់ ១៦ ប័ណ្ណភោគស្មើនឹង ៨៥ ហិកតា។
ប៉ុន្តែក្រោយមកពលរដ្ឋ ៤ នាក់ក្នុងចំណោម ៦ នាក់នោះត្រូវបានតុលាការខេត្តសម្រេចចោទប្រកាន់ពីបទ «ប្រើហិង្សាលើអ្នកកាន់កាប់អចលនវត្ថុដោយសុចរិត» ទៅតាមមាត្រាទី ២៥៣ ខណៈដែល ២ នាក់ផ្សេងទៀតត្រូវបានដោះលែងឲ្យមានសេរីភាព បន្ទាប់ពីពួកគាត់ត្រូវឃាត់ខ្លួនតាមពាក្យបណ្តឹងរបស់លោកឧកញ៉ា តាន់ តាប់។
យោងតាមមាត្រា ២៥៣ នៃច្បាប់ភូមិបាល ប្រសិនបើតុលាការរកឃើញកំហុសមែននោះ ពលរដ្ឋទាំង ៤ នាក់ត្រូវប្រឈមមុខនឹងការពិន័យប្រាក់រហូតដល់ទៅ ២៥ លានរៀល និង/ ឬជាប់ពន្ធនាគារពី ៦ ខែទៅ ២ ឆ្នាំ៕
