កំពង់ចាម: គ្រាប់យុទ្ធភណ្ឌមិនទាន់ផ្ទុះជាង ១ ៥០០ គ្រាប់ត្រូវបានមន្ត្រីអង្គភាពស៊ីម៉ាក់ (CMAC) និងសមត្ថកិច្ចខេត្តកំពង់ចាមបានយកចេញពីឃ្លាំងគ្រាប់ចាស់ៗដែលបន្សល់ទុកក្នុងដីនៅក្រុងកំពង់ចាមក្បែររបងស្នងការដ្ឋាននគរបាលខេត្ត។
នេះបើតាមលោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា កាលពីម្សិលមិញ។
លោក ហេង រតនា បានបង្ហាញនៅតាមបណ្ដាញទំនាក់ទំនងសង្គមហ្វេសប៊ុកថា «សូមអបអរសាទរមន្ត្រីអង្គភាពស៊ីម៉ាក់នៃកងឯកភាពទី ៥ បានពុះពារគ្រប់ឧបសគ្គបោសសម្អាតតំបន់ប្រឈមគ្រោះថ្នាក់ខ្ពស់ប្រកបដោយជោគជ័យ ដែលមានជាង ១ ៥០០ គ្រាប់ដោយក្នុងនោះមានគ្រាប់យុទ្ធភណ្ឌមិនទាន់ផ្ទុះចំនួនជាង ៩០០ គ្រាប់មីន ២០ គ្រាប់ក្បាលផ្ទុះ ៦០០ គ្រាប់ និងគ្រាប់កាំភ្លើងធុនស្រាលជាង ២០០០ គីឡូ...»។
បើតាមសំណេរលោក ហេង រតនា ទីតាំងបោសសម្អាតនោះជាឃ្លាំងគ្រាប់ចាស់ដែលនៅក្បែរស្នងការដ្ឋាននគរបាលខេត្តកំពង់ចាមតែម្តង។
លោកថា៖ «ការងារនេះបានទទួលការគាំទ្រពីឯកឧត្តមអភិបាលខេត្ត និងឯកឧត្តមស្នងការខេត្តកំពង់ចាម។ ក្នុងអំឡុងពេលប្រតិបត្តិការនេះមិនមានបង្កគ្រោះថ្នាក់ទេ ហើយវាជាជោគជ័យរបស់អ្នកអនុវត្តជាក់ស្តែង»។
លោក គួច ចំរើន អភិបាលខេត្តកំពង់ចាមបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថាឃ្លាំងដែលមានផ្ទុកគ្រាប់យុទ្ធភណ្ឌមិនទាន់ផ្ទុះជាង ១ ៥០០ គ្រាប់នេះត្រូវបានសមត្ថកិច្ចជំនាញរកឃើញ និងកំណត់អត្ដសញ្ញាណទុកជាយូរឆ្នាំមកហើយដោយមិនទាន់ដល់ពេលវេលាត្រូវយកចេញពីក្នុងដី។
លោកបន្តថាខណៈនេះគឺជាពេលវេលាសមល្មមដែលគណៈកម្មការខេត្តសម្រេចចិត្តបោសសម្អាតចេញពីក្នុងដី ព្រោះកន្លងមកវាបង្កការភ័យខ្លាចដល់ប្រជាពលរដ្ឋ និងមន្ត្រីសមត្ថកិច្ចនគរបាលដែលបម្រើការនៅស្នងការដ្ឋាននគរបាលខេត្តកំពង់ចាម។
លោក គួច ចំរើន បានបញ្ជាក់ថា៖ «...វាបន្សល់ទុកកាលពីសម័យសង្គ្រាម ព្រោះវាធ្វើឲ្យគេឯងព្រួយបារម្ភខ្លាំង ជាពិសេសអ្នករស់នៅក្បែរៗហ្នឹង ព្រោះគ្រាប់នៅក្រោមហ្នឹងសុខៗវាផ្ទុះទៅ វាមានបញ្ហាធំ ហើយឥឡូវក្រុមការងារបច្ចេកទេសបានយកវាមកគ្រប់គ្រងដោយសុវត្ថិភាពហើយ ប៉ុន្ដែខ្ញុំមិនទាន់ដឹងគេយកវាអស់ពីក្រោមដីឬនៅទេព្រោះរបាយការណ៍លម្អិតមិនទាន់មកដល់ខ្ញុំ»។
លោក ឯម កុសល ស្នងការនគរបាលខេត្តកំពង់ចាមកាលពីម្សិលមិញបានប្រាប់ថា៖ «ខ្ញុំកំពុងជាប់រវល់ប្រជុំមិនអាចនិយាយទូរស័ព្ទបានទេ»។
លោក នី ញ៉ អនុប្រធាននាយកដ្ឋានសង្គ្រោះជនពិការដោយសារមីននៃអាជ្ញាធរមីនធ្លាប់បានប្រាប់ភ្នំពេញប៉ុស្ដិ៍កាលពីវិច្ឆិកាឆ្នាំនេះថា ជនរងគ្រោះដោយសារមីនសរុបមាន ៦៤- ៧៧១ នាក់ក្នុងនោះមានជិត ២ ម៉ឺននាក់បានស្លាប់ ហើយអ្នកដែលនៅរស់រានមានជីវិតបានធ្លាក់ខ្លួនពិការប្រមាណជាង ៤ ម៉ឺននាក់គិតពីឆ្នាំ ១៩៧៩ រហូតដល់ខែវិច្ឆិកា ឆ្នាំ ២០១៨។
លោក ArendZwartjes អ្នកនាំពាក្យស្ថានទូតអាមេរិកប្រចាំកម្ពុជាបានបដិសេធឆ្លើយតាមអ៊ីមែលជុំវិញករណីនេះដោយលោកថាកំពុងមានបញ្ហាបច្ចេកទេសកាលពីម្សិលមិញ៕