.jpg)
លោក ហ៊ុន សែន នៅក្នុងពិធីមួយនាពេលកន្លងមក។ រូបថត ហ្វេសប៊ុក
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានផ្តល់ហេតុផលចំនួន ៦ ដែលលោកថាធ្វើឲ្យពលរដ្ឋខ្មែរ «គាំទ្រច្រើនជាងគេបំផុត» និងបោះឆ្នោតឲ្យគណបក្សប្រជាជនកម្ពុជារបស់លោកតាមរយៈសមិទ្ធផលនានាដែលលោកតែងតែអះអាងប្រាប់ពលរដ្ឋម្ចាស់ឆ្នោតកន្លងមក ប៉ុន្តែបក្សនយោបាយមួយចំនួន និងអ្នកវិភាគវិញមិនយល់ស្របឡើយដោយថា ពលរដ្ឋបច្ចុប្បន្នត្រូវការអ្វីដែលថ្មី។
លោក ហ៊ុន សែន ប្រធានគណបក្សប្រជាជនកម្ពុជាដែលកាន់អំណាចជាង ៣៣ ឆ្នាំមកហើយនោះបានសរសេរនៅលើបណ្ដាញទំនាក់ទំនងសង្គមហ្វេសប៊ុករបស់លោកកាលពីថ្ងៃទី ១១ ខែកក្កដា ឆ្នាំ ២០១៨ ចំពេលនៃយុទ្ធនាការឃោសនារកសំឡេងឆ្នោតថា គណបក្សប្រជាជនគឺជា «បក្សដែលមានពលរដ្ឋខ្មែរគាំទ្រច្រើនជាងគេបំផុតទាំងនៅក្នុងប្រទេស និងក្រៅប្រទេស» ដោយលើកយកហេតុផលចំនួន ៦ ចំណុចដែលលោកជឿថា ពលរដ្ឋម្ចាស់ឆ្នោត «គាំទ្របោះឆ្នោតឲ្យ»។
ដោយចំណុចទី ១ លោកលើកឡើងពីការ «រំដោះប្រទេសពីរបបប្រល័យពូជសាសន៍ដែលបានសង្គ្រោះជាតិពិតប្រាកដ» ទី ២៖ រួមសុខរួមទុក្ខជាមួយពលរដ្ឋ ទោះបីប្រទេសជាតិស្ថិតក្នុងស្ថានភាពបែបណាក៏ដោយ ទី ៣៖ ថែរក្សាសុខសន្តិភាពយូរអង្វែង ដែលកំពុងផ្តល់ក្តីសុខដល់ពលរដ្ឋទូទាំងប្រទេស ទី ៤៖ ផ្តល់ឱកាសដល់យុវជន និងកូនក្មួយកម្មករ ទី ៥៖ ប្រែក្លាយកម្ពុជាពីវាលពិឃាតមកជាកម្ពុជាអច្ឆរិយ ស្មើមុខស្មើមាត់ជាមួយអន្តរជាតិ ដែលមានការទាក់ទាញបំផុតនៅក្នុងតំបន់។
រីឯចំណុចទី ៦ លោក ហ៊ុន សែន ថា CPP គឺជា «គណបក្សតែ ១ គត់ដែលសម្បូរធនធានមនុស្សមានសមត្ថភាពពេញលេញ និងមានលទ្ធភាពគ្រប់គ្រាន់ក្នុងការដឹកនាំអភិវឌ្ឍប្រទេសឲ្យកាន់តែរីកចម្រើនយូរអង្វែង» ជាដើម។
ក៏ប៉ុន្តែលោក គង់ មុនីកា ប្រធានគណបក្សឆន្ទៈខ្មែរ (KW- P) មិនយល់ស្របនឹងការលើកឡើងរបស់លោកនាយករដ្ឋមន្ត្រីនេះឡើយដោយថា គ្រាន់តែជា «ហេតុផលដដែលៗ»។
លោកសរសេរថា៖ «គណបក្ស ឆន្ទៈខ្មែរយល់ឃើញថា ការលើកឡើងទាំងឡាយខាងលើគ្រាន់តែជាហេតុផលដដែលៗ ដើម្បីរក្សាសំឡេងអ្នកគាំទ្ររបស់ខ្លួនតែប៉ុណ្ណោះ ដោយពុំបានគិតថា ៧០% នៃប្រជាពលរដ្ឋខ្មែរទាំងមូលគឺជាយុវជនដែលចង់បានការងារត្រឹមត្រូវចង់បានប្រាក់ចំណូលសមរម្យ សម្រាប់ជីវភាពរស់នៅរបស់ខ្លួនចង់បានការអប់រំល្អ ចង់បានសុខភាពល្អ និងជាពិសេសប្រជាជនកម្ពុជាទូទៅចង់បានសន្តិភាពផ្លូវចិត្ត»។
លោកបន្តថា៖ «គណបក្សកាន់អំណាចពុំមានលទ្ធភាពបំពេញតម្រូវការពិតប្រាកដ និងជាក់ស្តែងរបស់ប្រជាពលរដ្ឋខ្មែរឡើយ។ វាល្មមដល់ពេលដែលអ្នកស្រករក្រោយត្រូវចូលរួមយ៉ាងសកម្ម ដើម្បីអភិវឌ្ឍប្រទេសដ៏កម្សត់នេះហើយ តាមរយៈការចូលរួមបោះឆ្នោត ដើម្បីឈានទៅរកការផ្លាស់ប្តូរជាវិជ្ជមាន»។
ទោះយ៉ាងណាលោក ពេជ្រ ស្រស់ ប្រធានគណបក្សយុវជនកម្ពុជា (CYP) យល់ឃើញថាការលើកឡើងរបស់លោក ហ៊ុន សែន ជាការ «ត្រឹមត្រូវ» ដែលមិនអាចបំភ្លៃបាន។ «វាត្រឹមត្រូវហើយសម្រាប់គណបក្សលោកដែលកាន់អំណាចអស់រយៈពេលជិត ៤០ ឆ្នាំមកហើយ និងក៏ជាភាពមួយជាក់ស្ដែងផងដែរ...ក៏ប៉ុន្តែខ្ញុំសូមគូសបញ្ជាក់ថា អ្វីគ្រប់យ៉ាងមកដល់បច្ចុប្បន្ននេះ មានការចូលរួមជាច្រើនពីគ្រប់និន្នាកានយោបាយក្រោយរំដោះជាតិពីក្រញ៉ាំ ប៉ុល ពត មក»។
លោកបន្តថា៖ «ដូច្នេះខ្ញុំមើលឃើញថាប្រទេសកម្ពុជាបច្ចុប្បន្នត្រូវការលើសពីនេះទៅទៀត។ មិនមែនត្រឹមតែ ៦ ចំណុចនោះទេ គឺយើងត្រូវការឲ្យប្រទេសមួយក្លាយជាប្រទេសស៊ីវិល័យ សម្បូរសប្បាយ ហើយពលរដ្ឋមិនមានបញ្ហាសេដ្ឋកិច្ចហើយយុវជនមិនមានបញ្ហាអត់ការងារធ្វើ»។
ចំណែកគណបក្សហ៊្វុនស៊ិនប៉ិចវិញ អះអាងថាខ្លួនក៏មានសមិទ្ធផលច្រើនក្នុងការកសាង និងអភិវឌ្ឍន៍ជាតិដែរ គ្រាន់តែហ៊្វុនស៊ិនប៉ិចគ្មានទូរទស្សន៍ ឬវិទ្យុ សម្រាប់ផ្សព្វផ្សាយពីសមិទ្ធផលរបស់ខ្លួនតែប៉ុណ្ណោះ។
លោក ញ៉េប ប៊ុនជិន អ្នកនាំពាក្យគណបក្សហ៊្វុនស៊ិនប៉ិចបានចៀសវាងមិនរិះគន់គណបក្សដទៃឡើយ ដោយលើកឡើងថាគណបក្សរបស់លោកមានស្នាដៃច្រើនក្នុងអតីតកាលចាប់តាំងពីកិច្ចព្រមព្រៀងសន្តិភាពទីក្រុងប៉ារីស និងការដឹកនាំប្រទេសក្រោយខ្លួនឈ្នះឆ្នោតនៅក្នុងឆ្នាំ ១៩៩៣ ដោយបានរួមចំណែកនាំមកនូវសន្តិភាព និងការអភិវឌ្ឍនៅកម្ពុជារហូតមកដល់ពេលបច្ចុប្បន្ន។
លោកបន្តថា៖ «យើងមានសមិទ្ធផលធំៗជាច្រើនរួមបញ្ចូលទាំងការអភិវឌ្ឍសេដ្ឋកិច្ច សង្គមតាំងពីឆ្នាំ ១៩៩៣ ជាចំណែកមួយដែលខ្ញុំមិនទាមទារអ្វីទេ គ្រាន់តែចង់ឲ្យមានយុត្តិធម៌សម្រាប់គណបក្សហ៊្វុនស៊ិនប៉ិច ព្រោះហ៊្វុនស៊ិនប៉ិច បានបម្រើជាតិច្រើនណាស់។ ប្រជាពលរដ្ឋ ជាពិសេសក្មេងៗជំនាន់នេះលោកអត់បានយល់ ពីព្រោះគេមិនចាក់ឲ្យឃើញ»។
លោកបញ្ជាក់ថា ហ៊្វុនស៊ិនប៉ិច បានរួមចំណែកធ្វើឲ្យមានស្ថិរភាពនយោបាយ ក្រោយពីការបោះឆ្នោតឆ្នាំ ១៩៩៣ តាមរយៈការចែករំលែកអំណាចទៅឲ្យគណបក្សប្រជាជនកម្ពុជាដែលបានចាញ់ឆ្នោត។
លោកបន្តថា៖ «ស្ថិរភាពនយោបាយនេះក៏ធំណាស់ដែរ បើគ្មានការចែកអំណាចនៅក្នុងឆ្នាំ ១៩៩៣ ទេក៏យើងគ្មានថ្ងៃនេះដែរ។ ការបែងចែកអំណាចនេះហើយធ្វើឲ្យប្រជាពលរដ្ឋមួយចំនួនដែលលោកមិនទាន់យល់ច្បាស់ខឹងសម្បាជាមួយគណបក្សហ៊្វុនស៊ិនប៉ិច តែផ្ទុយទៅវិញការបែងចែកអំណាចនេះហើយ ដែលធ្វើឲ្យពលរដ្ឋមានបានមកទល់សព្វថ្ងៃនេះ»។
ចំណែកអ្នកវិភាគវិញក៏មិនយល់ស្របនឹងការលើកឡើងរបស់លោក ហ៊ុន សែន ផងដែរដោយសារតែការបោះឆ្នោតឆ្នាំ ២០១៣ គណបក្សប្រជាជនបានបាត់បង់អាសនៈរដ្ឋសភាចំនួន ២២ ហើយការបោះឆ្នោត ឃុំ សង្កាត់ ឆ្នាំ ២០១៧ គណបក្សកាន់អំណាចក៏បានបាត់បង់អាសនៈមេឃុំ ចៅសង្កាត់ជិត ៥០០ និងបាត់បង់សមាជិកក្រុមប្រឹក្សាឃុំ សង្កាត់រហូតដល់ប្រមាណ ៥០០០ អាសនៈផងដែរ។
លោក ឡៅ ម៉ុងហៃ អ្នកវិភាគនយោបាយថ្លែងថា ការលើកឡើងរបស់លោក ហ៊ុន សែន គឺគ្មានអ្វីថ្មីនោះទេ ខណៈចាប់តាំងពីមុនឆ្នាំ ២០១៣ មកប្រជាជនកម្ពុជាត្រូវការការផ្លាស់ប្តូរនូវអ្វីដែលថ្មី។
លោកបានបញ្ជាក់ថា៖ «ការបោះឆ្នោតឆ្នាំ ២០១៣ និងឆ្នាំ ២០១៧ បានបង្ហាញថាប្រជាជនបានបាត់បង់ជំនឿចិត្តរបស់ពួកគេទៅលើគណបក្សប្រជាជនកម្ពុជាការបាត់បង់ជំនឿចិត្តគឺដោយសារការកម្ចាយមេដឹកនាំបក្សប្រឆាំង និងក្រោយមកបានរំលាយគណបក្សប្រឆាំងដែលតំណាងឱ្យសេចក្តីប្រាថ្នាបែបនេះ (ចង់ផ្លាស់ប្តូរ) គឺមិនថយចុះនោះទេ។ វាតម្រូវឱ្យមានការប្រព្រឹត្ដមិនមែនវោហារស័ព្ទសម្រាប់គណបក្សប្រជាជនកម្ពុជា ដើម្បីឈ្នះការជឿទុកចិត្តនេះត្រឡប់មកវិញទេ»។
ទោះយ៉ាងណាទាំងអ្នកវិភាគ និងមជ្ឈដ្ឋានជាច្រើនយល់ថានៅក្នុងការបោះឆ្នោតនៅថ្ងៃទី ២៩ ខែកក្កដាគណបក្សប្រជាជននឹងឈ្នះឆ្នោតភ្លូកទឹកភ្លូកដី ដោយសារតែអវត្តមានរបស់អតីតបក្សសង្គ្រោះជាតិដែលជាគូប្រកួតដ៏ខ្លាំងក្លារបស់ខ្លួន៕ NS
