ភ្នំពេញៈ បើទោះបីជាលទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រនីតិកាលទី ៦ មិនទាន់ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសជាផ្លូវការក្ដីក៏កាលពីម្សិលមិញអ្នកនាំពាក្យគណបក្សប្រជាជនកម្ពុជាអះអាងថាគណបក្សកាន់អំណាចមួយនេះទទួលបានជ័យជម្នះលើសពី ៧៧ ភាគរយ ឬនឹងកាន់កាប់អាសនៈស្ទើរតែទាំងអស់នៅក្នុងសភា ខណៈគណបក្សនយោបាយមួយចំនួនទៀតបានប្រកាសទទួលយកលទ្ធផលនៃការបោះឆ្នោតនេះ។
យោងតាម គ.ជ.ប លទ្ធផលបណ្តោះអាសន្នពីចំនួនអ្នកបានទៅបោះឆ្នោតកាលពីថ្ងៃអាទិត្យមានពលរដ្ឋទៅបោះឆ្នោតចំនួន ៦ ៨៨៥-៧២៩ នាក់ ឬ ៨២,១៧ ភាគរយក្នុងចំណោមពលរដ្ឋមានឈ្មោះក្នុងបញ្ជីបោះឆ្នោតសរុបចំនួន ៨ ៣៨០ ២១៧ នាក់។ គ.ជ.ប នឹងប្រកាសលទ្ធផលបណ្ដោះអាសន្ននៅថ្ងៃទី ១១ ខែសីហា ខណៈលទ្ធផលផ្លូវការនឹងត្រូវប្រកាសនៅថ្ងៃទី ១៥ ខែសីហា ឆ្នាំ ២០១៨ ខាងមុខ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា (CPP) បានថ្លែងកាលពីថ្ងៃម្សិលមិញថាគណបក្សរបស់លោកទទួលបានជ័យជម្នះចំនួន ៧៧,៧៧ ភាគរយ ដែលលោកថាជាចំនួនឈ្នះអាសនៈ «ជិត ១០០%» និងថា ជាជ័យជម្នះធំបំផុតមិនធ្លាប់មានតាំងពីការបោះឆ្នោតជាតិអាណត្តិទី ១ ក្នុងឆ្នាំ ១៩៩៣ មក។
លោកថ្លែងថា៖ «លទ្ធផលគឺគ្របដណ្ដប់នូវអាសនៈភាគច្រើនលើសលប់នៅក្នុងសភា។ គឺជិតគ្រប់អាសនៈអាចថា ១២៣ ឬ ១២៤ អាសនៈវាមិនទៀង»។
តែលោកថាមានតែ គ.ជ.ប ទេដែលអាចប្រកាសលទ្ធផលផ្លូវការបាន។
ប៉ុន្តែបើយោងតាមលទ្ធផលបឋមរបស់ គ.ជ.ប ដែលចេញផ្សាយកាលពីល្ងាចម្សិលមិញបានបង្ហាញថាគណបក្សប្រជាជនទទួលបានសំឡេងគាំទ្រចំនួន ៤ ៨៧៥ ១៨៩ សំឡេងគឺស្មើនឹង ៧៦,៧៨ ភាគរយ។
លោក ឥសាន បានថ្លែងទៀតថាគណបក្សមិនមែនជាសមត្ថកិច្ចបែងចែកអាសនៈទេ ប៉ុន្តែតាមការគណនាក្រៅផ្លូវការរបស់គណបក្សតាមរូបមន្តបែងចែកអាសនៈបង្ហាញថា គណបក្សកាន់អំណាចឈ្នះក្នុងសំឡេងលើសលប់។ លោកក៏អះអាងដែរថាផ្អែកតាមរូបមន្តគណបក្សផ្សេងៗមិនមានសំឡេងគ្រប់ដើម្បីទទួលបាន ១ អាសនៈឡើយ។
លោកបន្តថា៖ ផ្អែកតាមតួលេខដែលមានសំឡេងគាំទ្រគណបក្សនីមួយៗ យើងអាចគិតឃើញហើយគណបក្សប្រជាជនគ្របដណ្ដប់ភាគច្រើនលើសលប់លើអាសនៈនៅក្នុងសភា ចំណែកគណបក្សផ្សេងៗទៀតដែលគណបក្សមានសំឡេងខ្ពស់វាមានត្រឹមតែ ៥-៦ ភាគរយទេ។ ៥-៦ ភាគរយ បើគិតកៅអីទៅ កៅអីវាមានជើង ៤ ហើយខ្លះបានតែ ៣ ជើង វាមិនគ្រប់អាសនៈ ១ ទេ»។
លោក ឥសាន ចាត់ទុកការបោះឆ្នោតនេះថាជាជោគជ័យ «ធំធេងហួសពីការស្មាន» របស់គណបក្សប្រជាជនដែលត្រូវបានប្រជាពលរដ្ឋលោកគាំទ្រលោក ហ៊ុន សែន បន្តបេសកកម្មដឹកនាំប្រទេសជាតិក្នុងនាមជានាយករដ្ឋមន្ត្រីនីតិកាលទី ៦ នៃរដ្ឋសភាតទៅទៀត។ លោកថ្លែងថា៖ «ខ្ញុំយល់ថា ទោះបីលទ្ធផលមិនទាន់ផ្លូវការ ខ្ញុំយល់យើងមានមូលដ្ឋានសម្រាប់សន្និដ្ឋានពីលទ្ធផលនៃការបោះឆ្នោត ពីព្រោះតួលេខដែលបានមកគឺជាតួលេខដែលស្រង់ពីមូលដ្ឋានតាមការិយាល័យបោះឆ្នោត និងតាមមណ្ឌលបោះឆ្នោតនីមួយៗរួចហើយ អ៊ីចឹងទេវាជាតួលេខពិត គ្រាន់តែថាយើងរង់ចាំតាមនីតិវិធីក្នុងការដោះស្រាយបណ្ដឹងតវ៉ាផ្សេងៗ»។
ជាមួយគ្នានេះលោក សាម អ៊ីន អ្នកនាំពាក្យគណបក្សប្រជាធិបតេយ្យមូលដ្ឋាន (GDP) ថ្លែងថាបើទោះបីជាគណបក្សលោកមិនពេញចិត្តចំពោះលទ្ធផលនៃការបោះឆ្នោតនេះក៏ដោយ ប៉ុន្តែគណបក្សនឹងគោរពតាមការសម្រេចចិត្តរបស់ពលរដ្ឋម្ចាស់ឆ្នោត។
លោកថ្លែងថា៖ «យើងចែកដំណើរការបោះឆ្នោតជា ២ ដំណាក់។ ដំណាក់ទី ១ ក្រោយចុងឆ្នាំ ២០១៧ វាមានបញ្ហាប្រឈមច្រើនគឺមានការរំលាយគណបក្សសង្គ្រោះជាតិមានការគំរាមដល់អង្គការសង្គមស៊ីវិល មានការបំបិទសិទ្ធិសេរីភាពអ្នកសារព័ត៌មាន។ ប៉ុន្តែយើងបានដឹងរឿងហ្នឹង យើងបានសម្រេចចិត្តជ្រើសរើសផ្លូវចូលរួមការបោះឆ្នោត។ យើងបានប្រឹងប្រែងតាមលទ្ធភាពដែលយើងអាចធ្វើបាន»។
លោកបានបន្តថា៖ «សម្រាប់យុទ្ធនាការឃោសនាថ្ងៃបោះឆ្នោត និងការរាប់សន្លឹកឆ្នោត យើងគិតថាមានដំណើរការជារួមល្អ ទោះបីមានបញ្ហាប្រឈមខ្លះៗចំពោះគណបក្សប្រជាធិបតេយ្យមូលដ្ឋានក៏ដោយ។ យើងទទួលយកលទ្ធផលហ្នឹង...»។
លោកសង្កត់ធ្ងន់ថា៖ «គណបក្សប្រជាធិបតេយ្យមូលដ្ឋាននឹងបន្តកិច្ចការរបស់យើងក្នុងការសាបព្រោះវប្បធម៌នយោបាយថ្មីទោះបីជាគ្រាប់ពូជនៃវប្បធម៌នយោបាយថ្មីនេះ វាមានមិនច្រើន តែវាចាប់ផ្តើមមាននៅស្ទើរគ្រប់ឃុំ-សង្កាត់ដែលយើងទទួលបានតាមរយៈសន្លឹកឆ្នោតគាំទ្រ។ យើងនឹងបន្តបេសកកម្មរបស់យើងបន្តទៅទៀត»។
លោក គង់ មុនីកា ប្រធានគណបក្សឆន្ទៈខ្មែរ (KWP) ថ្លែងថាលោកពុំជឿជាក់ទាំងស្រុងនៅឡើយទេ ចំពោះតួលេខរបស់គណបក្សប្រជាជនកម្ពុជា។ ទោះយ៉ាងណាលោកថា ឆន្ទៈខ្មែរពុំមានផែនការតវ៉ាប្រឆាំងនឹងលទ្ធផលបោះឆ្នោតឡើយ។
លោកថ្លែងថា៖ «គណបក្ស ឆន្ទៈខ្មែរ យល់ឃើញថាដំណើរការការបោះឆ្នោតជារួមអាចទទួលយកបាន ប៉ុន្តែពុំជឿជាក់ចំពោះលទ្ធផលទាំងស្រុងនៅឡើយ ដោយសារយើងពុំមានភ្នាក់ងារ និងកំពុងរង់ចាំលទ្ធផលរបស់ គ.ជ.ប នៅឡើយ»។
លោក ញ៉េប ប៊ុនជិន អ្នកនាំពាក្យគណបក្សហ៊្វុនស៊ិនប៉ិចកាលពីម្សិលមិញបានបដិសេធធ្វើអធិប្បាយថា តើគណបក្សរបស់លោកនឹងទទួលយកលទ្ធផលនៃការបោះឆ្នោតឬយ៉ាងណានៅឡើយទេ?
លោកថ្លែងយ៉ាងខ្លីថា៖ «ខ្ញុំកំពុងធ្វើកិច្ចការរបស់ខ្ញុំ។ ខ្ញុំនឹងមិនធ្វើអត្ថាធិប្បាយអ្វីទាំងអស់ជាមួយអ្នកកាសែត»៕