.jpg)
ភ្នំពេញ: មន្ត្រីនគរបាលជាន់ខ្ពស់ចំនួន ១០ រូបត្រូវបានលោកនាយករដ្ឋមន្ត្រីទូលថ្វាយព្រះមហាក្សត្រសុំដាក់ឲ្យចូលនិវត្តន៍ ខណៈ ៣ រូបសុំផ្ទេរភារកិច្ច និងតែងតាំងមុខតំណែងជាអគ្គនាយកនៅក្រសួងមហាផ្ទៃ។ នេះតាមលិខិតរបស់លោក ហ៊ុន សែន ចុះថ្ងៃទី ៣១ ខែសីហាដែលភ្នំពេញប៉ុស្ដិ៍ទើបទទួលបានកាលពីម្សិលមិញ។
មន្ត្រីជាន់ខ្ពស់ទាំង ១០ រូបដែលលោកនាយករដ្ឋមន្ត្រី ហ៊ុន សែន ទូលសុំដាក់ឲ្យចូលនិវត្តន៍នោះរួមមាន៖ នាយឧត្តមសេនីយ៍ ម៉ៅ ប៊ុនណារិន អគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុ,នាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍, នាយឧត្តមសេនីយ៍ ម៉ៅ ច័ន្ទតារា អគ្គនាយកនៃអគ្គនាយកដ្ឋានអត្តសញ្ញាណកម្ម, នាយឧត្តមសេនីយ៍ ថោង សំអាត អគ្គលេខាធិការនៃអគ្គលេខាធិការដ្ឋានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស, នាយឧត្តមសេនីយ៍ ផាង ពៅ ប្រធានក្រុមប្រឹក្សានីតិកម្មក្រសួងមហាផ្ទៃ, នាយឧត្តមសេនីយ៍ មួន សារ៉ន អគ្គស្នងការរងនគរបាលជាតិ, នាយឧត្តមសេនីយ៍ សួស អង្គារ៍ អគ្គស្នងការរងនគរបាលជាតិ, នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ,នាយឧត្តមសេនីយ៍ ឯម សំណាង អគ្គនាយករងនៃអគ្គនាយកដ្ឋានភ័ស្តុភារ និងហិរញ្ញវត្ថុ និងនាយឧត្តមសេនីយ៍ លី គឹមឡុង អគ្គលេខាធិការស្តីទីនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន។
ជាមួយគ្នានោះដែរលោកនាយករដ្ឋមន្ត្រី ហ៊ុន សែន បានទូលថ្វាយព្រះមហាក្សត្រពីការផ្ទេរភារកិច្ច និងតែងតាំងមុខតំណែងអគ្គនាយកចំនួន ៣ រូបផងដែររួមមាន៖១. នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិទៅជាអគ្គនាយកនៃអគ្គនាយកដ្ឋានអន្តោប្រវេសន៍ជំនួសនាយឧត្តមសេនីយ៍ សុខ ផល ២. នាយឧត្តមសេនីយ៍ កង សុខន អគ្គស្នងការរងនគរបាលជាតិទៅជាអគ្គនាយកនៃអគ្គនាយកដ្ឋានអត្តសញ្ញាណកម្មជំនួសនាយឧត្តមសេនីយ៍ ម៉ៅ ច័ន្ទតារា និង៣. លោក សេង យូអ៊ាន់ អគ្គនាយករងទៅជាអគ្គនាយកនៃអគ្គនាយកដ្ឋានភ័ស្តុភារ និងហិរញ្ញវត្ថុជំនួសនាយឧត្តមសេនីយ៍ ម៉ៅ ប៊ុនណារិន។
លោក សុខ ផល មិនអាចទាក់ទងសុំការបញ្ជាក់ជុំវិញករណីនេះបានទេ កាលពីម្សិលមិញ។ ប៉ុន្ដែលោក ម៉ៅ ច័ន្ទតារា បានលើកឡើងថារឿងនេះគ្មានអ្វីចម្លែកទេដោយសារដល់អាយុ។
លោកបានថ្លែងថា៖ «វាគ្មានអ្វីចម្លែកទេតែដល់អាយុគឺត្រូវតែឈប់អ៊ីចឹងហើយ ប្រៀបដូចជាមនុស្សអ៊ីចឹងដែរ បើដល់អាយុងាប់ គឺងាប់ អ៊ីចឹងហើយ វាគ្មានធ្វើអ្វីបានទេ។ កុំចង់ដឹងរឿងរបស់ខ្ញុំច្រើនពេក វាជារឿងឯកជនរបស់ខ្ញុំទេ លោកសួរខ្ញុំបែបហ្នឹង តើបានប្រយោជន៍អ្វីទៅ?»។
លោក ខៀវ សុភ័គ អ្នកនាំពាក្យក្រសួងមហាផ្ទៃមិនអាចទាក់ទងសុំការអត្ថាធិប្បាយជុំវិញករណីនេះបានទេកាលពីថ្ងៃម្សិលមិញ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានយល់ថា មន្ត្រីដែលបម្រើការងារសាធារណៈទាំងអស់ត្រូវតែចូលនិវត្តន៍ ប្រសិនបើដល់អាយុ ព្រោះជាលក្ខខណ្ឌនៃច្បាប់ ប៉ុន្ដែប្រសិនបើពួកគាត់នៅមានសមត្ថភាព និងកម្លាំងបន្តការងារបានគឺអាចទទួលតំណែងណាមួយក្នុងនយោបាយបក្សខ្លួន។
លោកបន្តថាការចូលនិវត្តន៍នេះវាគ្មានអ្វីចម្លែកនោះទេ ប្រសិនបើពួកគាត់ដល់អាយុពិតប្រាកដមែននោះ ប៉ុន្ដែអ្វីដែលសំខាន់គឺអាចមានមន្ត្រីមួយចំនួនតូចពេលដល់អាយុចូលនិវត្តន៍ហើយ តែបែរជាសុំពន្យារអាយុ ឬ ស្នើសុំបន្តការងារ ៣ ឬ ៤ ឆ្នាំទៀត។
លោកបានបញ្ជាក់ថា៖ «ប្រសិនបើមន្ត្រីហ្នឹង មិនទាន់គ្រប់អាយុចូលនិវត្តន៍ទេ ហើយមានការផ្ទេរតំណែង ការដោះដូរតំណែងមួយទៅតំណែងមួយទៀត គឺអាចពាក់ព័ន្ធនឹងលទ្ធភាពការងារ ឬអាចនិយាយបានថាវាមានភាពមិនប្រក្រតីណាមួយកើតឡើងក្នុងមុខតំណែងហ្នឹង ហើយប្រសិនបើដល់អាយុត្រូវតែចូលនិវត្តន៍អ៊ីចឹងហើយ»៕
