.jpg)
ប៉ៃលិនៈ ជនសង្ស័យ ៤ នាក់ដែលត្រូវបានចាប់ខ្លួនពាក់ព័ន្ធករណីជីកកកាយដីភ្នំដោយខុសច្បាប់កាលពីចុងខែសីហានោះត្រូវបានតុលាការសម្រេចឲ្យឃុំខ្លួនក្នុងពន្ធនាគារជាបណ្ដោះអាសន្ន ដោយចោទប្រកាន់ពីបទ «ជីកកកាយដីភ្នំធម្មជាតិដោយខុសច្បាប់» តាមមាត្រា ៩៨ នៃច្បាប់ស្ដីពីព្រៃឈើ។
លោក មិន រ៉ាវុធ នាយរងផ្នែករដ្ឋបាលព្រៃឈើខេត្តប៉ៃលិនបានប្រាប់ភ្នំពេញ-ប៉ុស្តិ៍ថា ជនសង្ស័យមានឈ្មោះ ដា លីន អាយុ ៤១ ឆ្នាំ, ខែ ធឹម អាយុ ៣៨ ឆ្នាំ, ម៉ន សាវិត អាយុ ២៨ ឆ្នាំ និង ឈ្មោះ មិត្ត សំណាង អាយុ ២២ ឆ្នាំ។
ពួកគេត្រូវបានកម្លាំងសមត្ថកិច្ចរដ្ឋបាលព្រៃឈើ សហការជាមួយកម្លាំងកងរាជអាវុធហត្ថខេត្តប៉ៃលិនចុះបង្ក្រាបចាប់នៅនឹងកន្លែង ខណៈកំពុងបញ្ជាគ្រឿងចក្រ ឈូសឆាយ និងជីកកកាយដីភ្នំដោយខុសច្បាប់នៅចំណុចភូមិផ្សារព្រំ ឃុំស្ទឹងកាច់ ស្រុកសាលាក្រៅកាលពីថ្ងៃទី ៣១ ខែសីហា ឆ្នាំ ២០១៨។ សមត្ថកិច្ចបានរឹបអូសវត្ថុតាងរួមមាន គ្រឿងចក្រអេស្កាវ៉ាទ័រចំនួន ២ និងរថយន្តដឹកដីចំនួនមួយផងដែរ។
លោក រ៉ាវុធ ថ្លែងថា៖ «យោងតាមរយៈបទចោទ និងមាត្រាខាងលើនេះពួកគេនឹងត្រូវប្រឈមការផ្ដន្ទាទោសជាប់ពន្ធនាគារពី ១ ឆ្នាំទៅ ៥ ឆ្នាំ និងពិន័យជាប្រាក់ពី ១០-១០០ លានរៀល»។
លោក នង វន្នី ប្រធានមន្ទីរយុត្តិធម៌កងរាជអាវុធហត្ថខេត្តប៉ៃលិន ក្នុងអំឡុងពេលសាកសួរដោយមន្ត្រីជំនាញ ជនសង្ស័យឈ្មោះ មិត្ត សំណាង បានស្នើសុំឲ្យសមត្ថកិច្ចអនុគ្រោះ និងដោះលែងឲ្យគាត់បានត្រឡប់ទៅផ្ទះវិញ ដោយអះអាងថា គាត់គ្រាន់តែជាកម្មករស៊ីឈ្នួលបើកអេស្កាវ៉ាទ័រ កាយអាចម៍ដីឲ្យគេ ដើម្បីយកប្រាក់ខែផ្គត់ផ្គង់គ្រួសារប៉ុណ្ណោះ។ ព្រោះគាត់មិនបានដឹងថាជាដីសាធារណៈរបស់រដ្ឋឡើយ។
ក្រុមអ្នកភូមិបាននិយាយថា ដីភ្នំជាច្រើនកន្លែងក្នុងឃុំស្ទឹងកាច់ ត្រូវបានគេលួចជីកកកាយអាចម៍ដីយកទៅលក់ដោយខុសច្បាប់។ កូនភ្នំតូចៗចំនួន ២ ត្រូវបានគេជីកកាយរាបស្មើអស់ទៅហើយ ខណៈទីតាំងថ្មីនេះកំពុងត្រូវបានគេជីកកាយអស់មួយចំហៀងភ្នំទៅហើយ។
អ្នកស្រី ឱម សំអុល ប្រជាកសិករនៅភូមិភ្នំក្រិចបាននិយាយថា៖ «កូនភ្នំមួយចំនួនបានក្លាយទៅដីកម្មសិទ្ធិឯកជនតាមរយៈការលួចឈូសឆាយ និងការជីកកកាយយកអាចម៍ដីលក់បែបនេះ»៕
