.jpg)
អ្នកចូលរួមនៅក្នុងយុទ្ធនាការ ១៦ ថ្ងៃដើម្បីបញ្ឈប់អំពើហិង្សាលើស្ត្រី និងក្មេងស្រី។ រូបថត សហការី
ភ្នំពេញៈ អង្គការសង្គមស៊ីវិលជាតិ និងអន្តរជាតិ សាកលវិទ្យាល័យ សាលារៀន និងស្ថាប័នរដ្ឋមួយចំនួនចាប់ផ្ដើមយុទ្ធនាការ ១៦ ថ្ងៃដើម្បីបញ្ឈប់អំពើហិង្សាលើស្ត្រី និងក្មេងស្រី។
យោងតាមតារាងកម្មវិធីដែលភ្នំពេញប៉ុស្តិ៍ទទួលបានសកម្មភាពនានានឹងត្រូវរៀបចំឡើងនៅក្នុងខេត្តមួយចំនួន និងនៅរាជធានីភ្នំពេញចាប់ពីថ្ងៃទី ២៥ វិច្ឆិកា ដល់ថ្ងៃ ១០ ធ្នូ។ សកម្មភាពទាំងនោះធ្វើឡើងដើម្បីលើកកម្ពស់ការយល់ដឹងអំពីអំពើហិង្សាពាក់ព័ន្ធនឹងយេនឌ័រ និងហិង្សាលើក្មេងស្រីដោយរួមមានការដើរជាក្បួន និងស្រែកពាក្យស្លោកនៅក្នុងភូមិ និងនៅតាមសាលា ការតាំងពិព័រណ៍រូបថត ការតាំងសមាធិ ការដាំដើមឈើ ការសម្អាតបរិស្ថាន និងកម្មវិធីកម្សាន្តសប្បាយដោយបង្កប់ការអប់រំ។
យុទ្ធនាការនេះក៏មានធ្វើឡើងតាមរយៈការផ្សព្វផ្សាយពន្យល់តាមប្រព័ន្ធផ្សព្វផ្សាយសង្គម និងតាមវិទ្យុទូរទស្សន៍ផងដែរ។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានឲ្យដឹងថា លោកមិនមានតួលេខជាក់លាក់ទៅលើអំពើហិង្សាលើស្ត្រីដោយផ្អែកលើយេនឌ័រទេ ហើយម្យ៉ាងទៀតអំពើហិង្សាខ្លះលើស្ត្រីមិនត្រូវបានរាយការណ៍ទេ។
លោកស្រី រស់ សុភាព នាយិកាអង្គការយេនឌ័រ និងការអភិវឌ្ឍដើម្បីកម្ពុជា បានថ្លែងថាលោកស្រីក៏មិនមានតួលេខលើបញ្ហានេះដែរ ហើយក៏មិនអាចថា បញ្ហានេះកើនឡើង ឬចុះទេ ដោយសារតែមិនមានការសិក្សាលើបញ្ហានេះក្នុងប៉ុន្មានឆ្នាំចុងក្រោយនេះ។ ប៉ុន្តែលោកស្រីសង្កេតឃើញមានព័ត៌មានអំពីអំពើហិង្សាលើស្ត្រី និងក្មេងស្រីជាញឹកញាប់តាមបណ្ដាញព័ត៌មាន និងបណ្ដាញសង្គម។
លោកស្រី Sarah Knibbs តំណាងអង្គការ UN Women នៅកម្ពុជាបានឲ្យដឹងថា ការសិក្សាស្រាវជ្រាវមួយបានរកឃើញថា ស្ត្រីម្នាក់ក្នុងចំណោម ៥ នាក់ នៅកម្ពុជាធ្លាប់ទទួលរងហិង្សាផ្លូវកាយ និងផ្លូវភេទពីសំណាក់ដៃគូរបស់ខ្លួន ហើយស្ទើរតែពាក់កណ្ដាលនៃស្ត្រីដែលរងគ្រោះមិនបានប្រាប់អ្នកដទៃអំពីការរំលោភបំពានលើពួកគេ ឬក៏មិនបានសុំជំនួយទេ។
លោកស្រីបន្តថា យោងតាមការស្រាវជ្រាវមួយធ្វើឡើងជាមួយនឹងបុរសបានបង្ហាញថា បុរសកម្ពុជាម្នាក់ក្នុងចំណោម ៥ នាក់បានរាយការណ៍ថា បានរំលោភស្ត្រីម្នាក់ ហើយបុរស ៥ ភាគរយបានពាក់ព័ន្ធក្នុងអំពើរំលោភបូក។
លោកស្រី Sarah បន្តថា បញ្ហ្រាបឈមដែលស្ត្រីកម្ពុជាកំពុងជួបប្រទះរួមមានឥរិយាបថយោគយល់ដល់ទៅលើការប្រព្រឹត្តហិង្សាលើស្ត្រី និងការជឿថា ហិង្សាផ្លូវកាយ គឺវាស័ក្តិសមជាការផ្តន្ទាទោស។
លោកស្រីបន្តថា ការទទួលបានយុត្តិធម៌ក៏នៅមានកម្រិត ហើយការសម្របសម្រួលក្រៅផ្លូវការដែលធ្វើឡើងនៅតាមសហគមន៍មានឥទ្ធិពលតិចតួចប៉ុណ្ណោះដោយសារតែអ្នកប្រព្រឹត្តមិនត្រូវបានដាក់ឲ្យទទួលខុសត្រូវ។
ក្រុមយុវជន និងយុវនារីប្រមូលផ្ដុំគ្នារៀបចំយុទ្ធនាការបញ្ឈប់ហិង្សាលើស្ត្រី និងក្មេងស្រី។ រូបថត សហការី
លោកស្រី រស់ សុភាព បានថ្លែងថា ក្នុងរយៈពេល ២ ទសវត្សរ៍ចុងក្រោយនេះ ធនធានយ៉ាងច្រើនត្រូវបានចំណាយទៅលើការប្រឆាំងនឹងហិង្សាលើស្ត្រីនៅកម្ពុជា ប៉ុន្តែបញ្ហានេះនៅតែកើតមានឡើងដោយសារតែអំណាចមិនស្មើគ្នារវាងបុរស និងស្ត្រី ជាពិសេសនៅក្នុងគ្រួសារ។ អំពើហិង្សាភាគច្រើនប្រព្រឹត្តដោយបុរស ខណៈដែលហិង្សាប្រព្រឹត្តដោយស្ត្រីមានតិចជាង ១ ភាគរយ ហើយធ្វើឡើងដើម្បីការពារខ្លួនប៉ុណ្ណោះ។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា បានថ្លែងថាច្បាប់ដែលធ្វើឡើងដើម្បីការពារស្ត្រី និងប្រឆាំងនឹងហិង្សាផ្នែកយេនឌ័រ គឺមិនគ្រប់គ្រាន់ហើយខ្សោយ។ និយមន័យដែលមានចែងក្នុងច្បាប់ស្ដីពីការទប់ស្កាត់អំពើហិង្សាក្នុងគ្រួសារមិនបានដាក់បញ្ជូលចំណុចខ្លះដែលស្ត្រីជួបប្រទះហិង្សា។
លោកស្រី ចក់ សុភាព ថ្លែងថា៖ «ពលរដ្ឋកម្ពុជាមិនទទួលស្គាល់ថា ហិង្សាផ្នែកយេនឌ័រជាអំពើខុសឆ្គងទេ ប្រសិនបើហិង្សានោះមិនធ្វើឲ្យមានរបួសផ្លូវកាយធ្ងន់ធ្ងរ ឬរហូតដល់ស្លាប់ ឬក៏អ្នកប្រព្រឹត្តបានរំលោភបំពានមាត្រាជាក់លាក់ណាមួយក្នុងក្រមព្រហ្មទណ្ឌ។ ដូច្នេះហើយវាមិនមានអ្វីគួរឲ្យភ្ញាក់ផ្អើលទេ ដែលករណីហិង្សាជាច្រើនមិនត្រូវបានរាយការណ៍»។
លោកស្រីបន្តថា៖ «បើទោះជាករណីទាំងនោះត្រូវបានរាយការណ៍ក៏ដោយ មានតិចតួចប៉ុណ្ណោះដែលឈានដល់នីតិវិធីព្រហ្មទណ្ឌ ហើយមានតិចតួចត្រូវបានផ្តន្ទាទោស។
លោកស្រី ចក់ សុភាព និយាយថាបន្ថែមលើបញ្ហាប្រឈមផ្លូវច្បាប់ ស្ត្រីជាជនរងគ្រោះប្រឈមនឹងសេវាព្យាបាលដែលមិនយល់ដឹងពីភាពចាំបាច់ក្នុងការព្យាបាលស្ត្រីដែលរងគ្រោះដោយហិង្សាផ្នែកយេនឌ័រ។
ទាំងលោកស្រី ចក់ សុភាព និងលោកស្រី រស់ សុភាព បានលើកឡើងដូចគ្នាថា រដ្ឋាភិបាលគួរបន្ថែមថវិកាក្នុងខ្ទង់ចំណាយថ្នាក់ជាតិទៅលើសេវាសុខភាព ផ្លូវច្បាប់ ផ្លូវចិត្ត និងសេដ្ឋកិច្ច ដោយឥតគិតថ្លៃសម្រាប់ជនរងគ្រោះស្ត្រីទាំងអស់។
លោកស្រី រស់ សុភាព បញ្ជាក់ថារដ្ឋាភិបាលបានយកចិត្តទុកដាក់ខ្ពស់ក្នុងការទប់ស្កាត់អំពើហិង្សាលើស្ត្រី និងក្មេងស្រី ប៉ុន្តែការងារនេះត្រូវការរយៈពេលវែង ដើម្បីឲ្យមនុស្សមានការយល់ដឹងពីអំពីហិង្សាផ្នែកយេនឌ័រលើស្ត្រី។ ហិង្សាលើស្ត្រី ធ្វើឲ្យរារាំងដល់ការអភិវឌ្ឍសេដ្ឋកិច្ចគ្រួសារ សហគមន៍ និងប្រទេសជាតិ។
លោកស្រី Sarah និយាយថាកិច្ចខិតខំប្រឹងប្រែងក្នុងការផ្ដល់សេវាសុខភាព និងផ្លូវច្បាប់ដល់ស្ត្រីត្រូវបានដាក់បញ្ចូលក្នុងផែនការសកម្មភាពថ្នាក់ជាតិដើម្បីប្រឆាំងនឹងហិង្សាលើស្ត្រី ដែលការងារនេះដឹកនាំដោយក្រសួងកិច្ចការនារី។
លោកស្រីថ្លែងថា៖ «ក្នុងរយៈពេលវែង បើយើងចង់ទប់ស្កាត់ហិង្សាផ្នែកយេនឌ័រ យុទ្ធសាស្ត្រដែលសំខាន់គឺប្ដូរឥរិយាបថរបស់មនុស្សជាមុនសិន»។
លោកស្រី ស ស៊ីណែត អនុប្រធាននាយកដ្ឋានការពារផ្លូវច្បាប់នៃក្រសួងកិច្ចការនារីបានថ្លែងកាលពីម្សិលមិញថា ដើម្បីទប់ស្កាត់ហិង្សាលើស្ត្រីក្រសួងកិច្ចការនារីមានយុទ្ធសាស្ត្រជាច្រើនរួមមាន ផែនការយុទ្ធសាស្ត្រនារីរតនៈ និងផែនការសកម្មភាពជាតិស្តីពីការទប់ស្កាត់អំពើហិង្សាលើស្ត្រី។
លោកស្រី ស៊ីណែត បានថ្លែងថា៖ «ក្រសួងមានយន្តការដូចជាមានក្រុមការងារឆ្លើយតបអំពើហិង្សាលើស្ត្រីនៅថ្នាក់ជាតិ និងក្រោមជាតិ និងមានការបណ្តុះបណ្តាល និងពង្រឹងសមត្ថភាពដល់អ្នកផ្តល់សេវាអំពីការយល់ដឹងផលប៉ះពាល់នៃអំពើហិង្សា និងច្បាប់ពាក់ព័ន្ធផ្តល់សេវា និងសម្របសម្រួបបញ្ជូនជនរងគ្រោះទៅរកសេវាពាក់ព័ន្ធ។ លើសពីនេះក៏មានការផ្សព្វផ្សាយអំពីផលប៉ះពាល់អំពើហិង្សា និងរបៀបស្វែងរកជំនួយដល់សហគមន៍តាមរយៈផ្ទាល់ និងប្រព័ន្ធព័ត៌មាន»៕
