ភ្នំពេញៈ មន្ត្រីក្រសួងរៀបចំដែនដីនគរូបនីយកម្ម និងសំណង់ និងគណៈកម្មការត្រួតពិនិត្យគុណភាពសំណង់ក្នុងរយៈពេលពេញ ១ ឆ្នាំនេះបានចុះត្រួតពិនិត្យគុណភាពសំណង់នៅខេត្តព្រះសីហនុ និងបន្ទាយមានជ័យសរុបចំនួន ១ ១៥៦ ការដ្ឋាន ក្នុងនោះតម្រូវឲ្យរុះរើសំណង់ដែលមានហានិភ័យខ្ពស់ផ្នែកសុវត្ថិភាពចំនួន ២៧ ការដ្ឋាន និងណែនាំឲ្យបំពេញតាមនីតិវិធីច្បាប់ចំនួន ៦៣៦ ការដ្ឋាន។
តាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញក្នុងកម្មវិធីសន្និបាតបូកសរុបការងារប្រចាំឆ្នាំ ២០១៩ ដែលធ្វើឡើងពីម្សិលមិញបានឲ្យដឹងថា ក្រុមការងារដោះស្រាយវិវាទពាក់ព័ន្ធការងារសាងសង់ និងផ្អាកការដ្ឋានបានទទួលពាក្យបណ្ដឹងទាក់ទងនឹងវិវាទការងារសាងសង់សរុបចំនួន ២៤ ករណី។ ក្នុងនោះដោះស្រាយបញ្ចប់ ១ ករណី បញ្ជូនទៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ក្រុងចំនួន ៣ ករណីបញ្ជូនទៅរដ្ឋបាលរាជធានី ខេត្តចំនួន ៤ ករណី បញ្ជូនទៅអគ្គនាយកដ្ឋានសុរិយោដីចំនួន ១ ករណី កំពុងបន្តដោះស្រាយចំនួន ១៤ ករណី និងបានផ្អាកការដ្ឋានចំនួន ១ ករណី។
របាយការណ៍បន្តថា ក្រុមការងារត្រួតពិនិត្យការដ្ឋានបានចុះត្រួតពិនិត្យការដ្ឋានសាងសង់ដើម្បីផ្ដល់លិខិតអនុញ្ញាតបើកការដ្ឋានសាងសង់ លិខិតបិទការដ្ឋានសំណង់ លិខិតអនុញ្ញាតជួសជុល និងសម្របសម្រួលវិវាទសំណង់ចំនួន ៣៣០ ការដ្ឋាន។ ក្រុមការងារបានធ្វើការអប់រំ និងពន្យល់ណែនាំដល់ម្ចាស់ការដ្ឋានសំណង់ កម្មករ និងអ្នកពាក់ព័ន្ធបានចំនួន ៧ ៦២៥ រូប។
របាយការណ៍បញ្ជាក់ថា៖ «ក្រុមការងារក្រសួងបានចូលរួមជាមួយគណៈកម្មការត្រួតពិនិត្យគុណភាព សំណង់នៅខេត្តព្រះសីហនុចំនួន ៥៧០ ការដ្ឋាន។ ក្នុងនោះតម្រូវឲ្យរុះរើសំណង់ដែលមានហានិភ័យខ្ពស់ផ្នែកសុវត្ថិភាពចំនួន ២៣ ការដ្ឋាន ណែនាំឲ្យធ្វើកោសល្យវិច័យ ១៦៦ ការដ្ឋាន និងណែនាំឲ្យបំពេញនីតិវិធី ៣៨១ ការដ្ឋាន។ រីឯការត្រួតពិនិត្យស្ថានភាពការដ្ឋានសំណង់នៅខេត្តបន្ទាយមានជ័យចំនួន ៥៨៦ ការដ្ឋាន សំណង់ដែលបានកែតម្រូវ ២ ការដ្ឋាន ផ្អាកការដ្ឋាន ៤ ការដ្ឋាន និងណែនាំឲ្យបំពេញនីតិវិធីចំនួន ៤៧០ ការដ្ឋាន»។
លោក ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានអានរបាយការណ៍សម្រាប់ឆ្នាំ ២០២០ ថា ក្រុមការងារនឹងបន្តចុះពិនិត្យការងាររដ្ឋបាល ការផ្តល់សេវាសាធារណៈ ការងារបច្ចេកទេសសុរិយោដី និងបន្តស្រាវជ្រាវបណ្ដឹងពាក់ព័ន្ធការងាររដ្ឋបាល។
លោកបន្តថា ក្រុមការងារនឹងបន្តការផ្តល់សេវាសាធារណៈ និងការងារបច្ចេកទេសសុរិយោដី ព្រមទាំងវិវាទដីធ្លីផ្សេងៗទៀត។ ក្រុមការងារនឹងបន្តតាមដានអំពីការអនុវត្តច្បាប់ គោលការណ៍ណែនាំ និងនីតិវិធីលើការងាររដ្ឋបាល និងការងារបច្ចេកទេសសុរិយោដីនៅតាមមន្ទីររៀបចំដែនដីនគរូបនីយកម្ម សំណង់ និងសុរិយោដីរាជធានី ខេត្ត និងការិយាល័យរៀបចំដែនដី នគរូបនីយកម្ម សំណង់ និងភូមិបាល ក្រុង ស្រុក ខណ្ឌ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងថា ក្រសួងបានជំរុញការអនុវត្តច្បាប់ស្ដីពីសំណង់ចេញគោលការណ៍ណែនាំ និងដាក់ឲ្យអនុវត្តលិខិតបទដ្ឋានគតិយុត្ត និងបទដ្ឋានបច្ចេកទេសពាក់ព័ន្ធដើម្បីធានាគុណភាព និងសុវត្ថិភាពខ្ពស់ក៏ដូចជាសុខុមាលភាពរបស់ប្រជាពលរដ្ឋ។
លោកបន្តថា ការងារលំនៅឋានក្រសួងបានជំរុញឲ្យប្រជាជនមានលំនៅឋានសមរម្យអាចរស់នៅប្រកបដោយសុខុមាលភាព សុវត្ថិភាព និងសេចក្ដីថ្លៃថ្នូរ។ ជាពិសេសពលរដ្ឋមានប្រាក់ចំណូលមធ្យម ប្រាក់ចំណូលទាប និងពលរដ្ឋងាយរងគ្រោះតាមរយៈកិច្ចសហប្រតិបត្តិការជាមួយដៃគូអភិវឌ្ឍន៍ និងវិស័យឯកជនក្នុងការអនុវត្តគោលនយោបាយផ្ដល់សម្បទានដីសង្គមកិច្ច។
លោកបញ្ជាក់ថា៖ «ក្រុមការងារបានផ្ដល់សេវាសាធារណៈជូនប្រជាពលរដ្ឋ ដោយត្រូវបានពង្រឹងការប្រមូលផ្ដុំកម្លាំងមន្ត្រីជំនាញឲ្យក្លាយជាធនធានដ៏សំខាន់សម្រាប់អនុវត្តភារកិច្ច និងសមត្ថកិច្ចរបស់ក្រសួង និងការខិតខំអនុវត្តការផ្ដល់សេវាតាមបរិបទដែលបានកំណត់»។
លោក សួ ឆ្លូញ មន្ត្រីទំនាក់ទំនងសហព័ន្ធសហជីពកម្មករសំណង់ និងព្រៃឈើកម្ពុជាគាំទ្រចំណាត់ការរបស់រដ្ឋាភិបាល បន្ទាប់ពីមានករណីបាក់រលំអគារ ១ នៅខេត្តព្រះសីហនុ។ ប៉ុន្ដែលោកថានៅមានចំណុចខ្វះខាតជាច្រើនទៀត ដូចជា គុណភាពសំណង់នៅមានកម្រិត។
លោកថា៖ «រាល់សំណង់ទាំងអស់ មិនគួរធ្វើឲ្យតែរួចៗពីដៃបានទេ គឺយើងត្រូវតែគិតលើបញ្ហាធំ ២ បើសំណង់នោះគ្មានគុណភាពនឹងបង្កគ្រោះថ្នាក់ដល់អ្នកសាងសង់។ បញ្ហាមួយទៀត ប្រសិនបើអគារនោះសាងសង់រួចរាល់ តែគ្មានគុណភាពគឺវាបង្កគ្រោះថ្នាក់ដល់អ្នករស់នៅ៕