ភ្នំពេញៈ រដ្ឋាភិបាលសម្រេចប្រើប្រាស់ថវិការដ្ឋសម្រាប់កាត់សម្លៀកបំពាក់ជាឯកសណ្ឋាន និងសញ្ញាស័ក្តិជូនសមាជិកឧត្តមក្រុមប្រឹក្សាពិគ្រោះ និងផ្តល់យោបល់ចំនួន ៤៩ នាក់មកពីគណបក្សនយោបាយចំនួន ១៦ ជាអ្វីដែលមន្ត្រីអះអាងថា គឺដើម្បីជាការធ្វើឲ្យមានភាពសមរម្យមួយសម្រាប់ចូលរួមកម្មវិធីជាតិធំៗឲ្យសមនឹងឋានៈ។
លិខិតមួយច្បាប់ចុះហត្ថលេខាដោយលោក ហ៊ីង ថូរ៉ាក់ស៊ី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជារដ្ឋលេខាធិការប្រចាំការកាលពីថ្ងៃទី ២៧ ខែមករា បានឲ្យដឹងថា បន្ទាប់ពីទទួលចំណារពីលោកនាយករដ្ឋមន្ត្រី ហ៊ុន សែន រាជរដ្ឋាភិបាលបានឯកភាពប្រគល់ជូនឯកសណ្ឋាន និងសញ្ញាស័ក្តិជូនសមាជិកឧត្តមក្រុមប្រឹក្សាពិគ្រោះ និងផ្តល់យោបល់ចំនួន ៤៩ នាក់ដោយផ្តល់ថវិការដ្ឋសម្រាប់កាត់ជូន។
លិខិតនោះបន្តថា «ក្នុងនោះរួមមាន ឋានៈស្មើទេសរដ្ឋមន្ត្រីចំនួន ១៥ រូបឋានៈស្មើរដ្ឋមន្ត្រីចំនួន ១៧ រូប និងឋានៈស្មើរដ្ឋលេខាធិការចំនួន ១៦ រូប។ ដោយឡែកឯកឧត្តម ឯក សំអុល ទីប្រឹក្សារាជរដ្ឋាភិបាល ឋានៈស្មើឧបយករដ្ឋមន្ត្រីប្រគល់ជូនឯកសណ្ឋាន និងសញ្ញាស័ក្តិថ្នាក់ឧបនាយករដ្ឋមន្ត្រី»។
កាលពីថ្ងៃទី ១៣ វិច្ឆិកា ឆ្នាំមុន លេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់បានដាក់សំណើសុំខោ អាវ ឯកសណ្ឋាន និងសញ្ញាស័ក្តិជូនប្រធានប្រតិភូ អនុប្រធានប្រតិភូ និងមន្ត្រីលេខាប្រតិភូគណបក្សដែលជាសមាជិកនៃស្ថាប័ននេះចំនួន ៦៤ រូប។
លោក ឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់បានប្រាប់ភ្នំពេញប៉ុស្តិ៍ពីថ្ងៃម្សិលមិញថា ឯកសណ្ឋានដែលឧត្តមក្រុមប្រឹក្សាស្នើឡើងនេះគឺជាឯកសណ្ឋានផ្លូវរដ្ឋមួយសម្រាប់ឲ្យសមាជិកទាំងអស់ពាក់ នៅពេលចូលរួមពិធីបុណ្យជាតិធំៗ។
លោកបន្តថា ដោយសារស្ថាប័ននេះទើបតែបង្កើតឡើង ដូច្នេះឧត្តមក្រុមប្រឹក្សាត្រូវបន្តរៀបចំរចនាសម្ព័ន្ធ និងការទទួលបានការអនុញ្ញាតពីរដ្ឋាភិបាល ដូចជាការស្នើនូវសិទ្ធិសម្រាប់ប្រើប្រាស់នូវឯកសណ្ឋាន និងសញ្ញាស័ក្តិនេះ។
លោកបានបន្ថែមថា៖ «ឯកសណ្ឋាននេះគឺជាឯកសណ្ឋានផ្លូវរដ្ឋសម្រាប់សមាជិកឧត្តមក្រុមប្រឹក្សាចូលរួមបុណ្យជាតិ និងអន្តរជាតិផ្លូវការព្រោះពួកគាត់ ជាឥស្សរជននយោបាយ ហើយឯកសណ្ឋាននេះដូចទៅនឹងឯកសណ្ឋានរបស់ថ្នាក់ដឹកនាំនៃស្ថាប័នផ្សេងៗទៅតាមឋានានុក្រម ហើយឯកសណ្ឋាននេះក៏មិនមែនសម្រាប់ពួកគាត់ពាក់ក្នុងពេលចុះបេសកកម្មដែរ ឧទាហរណ៍គឺពាក់នៅពេលចូលរួមបុណ្យឯករាជ្យ ៩ វិច្ឆិកាអីហ្នឹង ព្រោះប្រទេសណាក៏ដូចគ្នាដែរ គេមានទម្រង់ឯកសណ្ឋានបែបបទរបស់គេ ដើម្បីជាតម្លៃរបស់រដ្ឋគេនីមួយៗ»។
យ៉ាងណាចំពោះថវិការដ្ឋដែលត្រូវចំណាយលើឯកសណ្ឋាន និងសញ្ញាស័ក្តិនេះលោក ឈឹម ផលវរុណ មិនទាន់អាចបញ្ជាក់បានទេថា ត្រូវចំណាយអស់ប៉ុន្មានដោយគ្រាន់តែថា វាជាចំនួនថវិកាតិចតួចដែលអាចក្នុងសមាជិកម្នាក់ ចំណាយប្រមាណ ២០០ ដុល្លារប៉ុណ្ណោះ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថា តាមពិតទៅសមាជិកឧត្តមក្រុមប្រឹក្សាមួយនេះត្រូវបានតែងតាំងដោយព្រះរាជក្រឹត្យរួចមកហើយដោយមានការបញ្ជាក់ពីកិច្ចការរបស់ពួកគេច្បាស់ហើយ។ ដូច្នេះសម្រាប់ការផ្តល់ឯកសណ្ឋាននេះគឺគ្រាន់តែជារឿងមួយសម្បកក្រៅទេ ព្រោះអ្វីសំខាន់គឺប្រសិទ្ធភាពការងារ។
លោកបញ្ជាក់ថា៖ «ដូច្នេះអ្វីដែលប្រជាពលរដ្ឋចាប់អារម្មណ៍នោះ គឺប្រសិទ្ធភាពការងារនៃការអនុវត្តការងាររបស់ពួកគេនៅក្នុងបេសកកម្មមួយដែលស្នើឡើងដោយរដ្ឋាភិបាល។ ខ្ញុំចាប់អារម្មណ៍ទៅលើទង្វើ និងសកម្មភាពរបស់ពួកគេក្នុងការរួមចំណែកដោះស្រាយបញ្ហា ឬក៏យកបញ្ហារបស់ប្រជាពលរដ្ឋមកជជែកជាជាងបញ្ហាឯកសណ្ឋាននេះដែលវាជារូបភាពខាងក្រៅ»។
យ៉ាងណាលោក សន ជ័យ សង្ឃឹមថាការប្រើប្រាស់ថវិកាជាតិនេះ គឺគួរតែសិក្សាឲ្យបានស៊ីជម្រៅ និងមានផែនការចំណាយច្បាស់លាស់ដោយដាក់ឲ្យដេញថ្លៃត្រឹមត្រូវ បើទោះជាមើលទៅលើចំនួនសមាជិកនេះតិចក៏ដោយ ព្រោះឯកសណ្ឋាននេះ បើគិតតាមតម្លៃទីផ្សារ មិនថ្លៃប៉ុន្មាននោះទេ៕