ព្រះសីហនុ: រដ្ឋមន្ត្រីក្រសួងបរិស្ថានលោក សាយ សំអាល់ បានប្រកាសដាក់ចេញផែនការការងារជាអាទិភាពចំនួន ៤ ចំណុចដូចជា បញ្ហាសន្ដិសុខ សណ្តាប់ធ្នាប់ ការគ្រប់គ្រងការងារសំណង់ និងបញ្ហាបរិស្ថាន ដើម្បីឲ្យក្រុមការងារថ្នាក់ជាតិ និងក្រុមការងារថ្នាក់មូលដ្ឋាន ដែលទើបតែចូលកាន់តំណែងថ្មី រួមគ្នាដោះស្រាយបញ្ហាប្រឈមដែលកំពុងតែកើតឡើងនៅក្នុងខេត្តទេសចរណ៍ជាប់មាត់សមុទ្រមួយនេះ។
លោក សាយ សំអាល់ ដែលក៏ជាប្រធានក្រុមការងារថ្នាក់ជាតិគណបក្សប្រជាជនចុះជួយខេត្តព្រះសីហនុផងនោះ បានថ្លែងបែបនេះក្នុងឱកាសដែលលោកចុះទៅប្រកាស និងប្រគល់ភារកិច្ចជូនក្រុមការងារថ្នាក់ជាតិចុះមូលដ្ឋាន និងការចូលកាន់មុខតំណែង ក្រុមប្រឹក្សាខេត្តព្រះសីហនុ អាណត្តិទី៣ នៅសាលាខេត្តព្រះសីហនុ កាលពីថ្ងៃសុក្រ។
លោក សំអាល់ បានថ្លែងក្នុងឱកាសនោះថា ស្ថានភាពនៅខេត្តព្រះសីហនុ ដែលជាប៉ូលសេដ្ឋកិច្ចដ៏សំខាន់មួយរបស់ប្រទេសកម្ពុជា បច្ចុប្បន្ននេះ មានភាពស្មុគស្មាញជាងមុន និងមានបញ្ហាច្រើន ដែលត្រូវដោះស្រាយរួមគ្នា។ ហេតុដូច្នេះលោកថា សមាជិកក្រុមប្រឹក្សាខេត្ត ជាប់មាត់សមុទ្រមួយនេះទាំងអស់ ត្រូវសហការគ្នា និងរួមគ្នាដោះស្រាយដែលចាំបាច់ត្រូវបង្កើនសមត្ថភាពដោះស្រាយឱ្យបានខ្ពស់ និងរួមគ្នាកសាងរដ្ឋបាលទំនើបមួយ សម្រាប់ខេត្តព្រះសីហនុ ។
លោក សំអាល់ បញ្ជាក់ថា៖ «សមាជិកក្រុមប្រឹក្សា ត្រូវចូលរួមឱ្យសកម្មដោះស្រាយបញ្ហាកង្វល់ប្រជាពលរដ្ឋកាន់តែខ្លាំងឡើងប្រកបដោយតម្លាភាព និងប្រសិទ្ធភាពកាន់តែខ្លាំងថែមទៀត។ មិនតែប៉ុណ្ណោះសមាជិកក្រុមប្រឹក្សាខេត្ត នឹងជ្រោងទង់សាមគ្គីភាព និងឯកភាពខ្ពស់ ក្នុងចំណោមមន្ត្រីរាជការ កម្លាំងប្រដាប់អាវុធ និងប្រជាជននៅក្នុងខេត្ត»។
លោកជឿជាក់ថា សមាជិកក្រុមប្រឹក្សាខេត្ត ដែលជាតំណាងប្រជាពលរដ្ឋ នឹងដោះស្រាយកង្វល់របស់ប្រជាពលរដ្ឋប្រកបដោយតម្លាភាព និងប្រសិទ្ធភាពខ្ពស់ ខណៈលោកស្នើឱ្យកងកម្លាំងសមត្ថកិច្ច រក្សាសន្តិសុខ សុវត្ថិភាពសាធារណៈ ធានាសន្តិសុខដល់ជនបរទេស លើកកម្ពស់សេវាសាធារណៈ ផ្តល់ជូនប្រជាពលរដ្ឋឱ្យមានភាពងាយស្រួលដោយប្រែក្លាយខេត្តព្រះសីហនុ ជាខេត្តអន្តរជាតិនាទិសនិរតី ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្តិ៍កាលពីម្សិលមិញថា ផែនការជាអាទិភាពចំនួន ៤ ដែលលោក សាយ សំអាល់ ដាក់ចេញ ក្នុងចំណោមការងារជាច្រើន ដើម្បីឲ្យក្រុមការងារត្រូវដោះស្រាយឱ្យបាននោះ គឺទី១ ការពង្រឹងសន្តិសុខ និងសណ្តាប់ធ្នាប់នៅក្នុងខេត្តព្រះសីហនុទាំងមូលដោយសហការគ្នារវាងអាជ្ញាធរខេត្ត កងកម្លាំងសមត្ថកិច្ចនិងក្រុមការងារឱ្យបានល្អ។ ទី២ ការពារឱ្យបាននូវបរិយាកាសសុខសុវត្ថិភាពសម្រាប់ពលរដ្ឋ និងភ្ញៀវទេសចរព្រមទាំងវិនិយោគិន។
លោក ភក្ត្រា បញ្ជាក់បន្តថា៖ «ទី៣ គឺការគ្រប់គ្រងការងារសំណង់ដែលជាគម្រោងសាងសង់ថ្មីៗ ត្រូវមានការគ្រប់គ្រងឱ្យបានល្អ កាត់បន្ថយការបំពុលខ្យល់ និងទី៤ ការគ្រប់គ្រងសំណល់រឹង រាវ និងសំរាមឱ្យបានល្អ ដើម្បីធ្វើឱ្យខេត្តព្រះសីហនុ មានសោភណភាពមានអនាម័យបរិស្ថានល្អស្អាត និងពលរដ្ឋរស់នៅប្រកបដោយផាសុកភាព និងកាន់តែមានការទាក់ទាញភ្ញៀវទេសចរមកកម្សាន្ត។ លោក ជាម ហ៊ីម ប្រធានក្រុមប្រឹក្សាអាណត្តិទី៣ ខេត្តព្រះសីហនុ បានលើកឡើងថា ក្នុងអាណត្តិថ្មី ដែល មានសមាជិក ១៩ រូប នឹងសម្រេចឲ្យបាននូវភារកិច្ចដែលបានដាក់ចេញ ដោយខិតខំធ្វើយ៉ាងណា ត្រូវពង្រឹងរដ្ឋបាលឯកភាពខេត្ត ធ្វើឲ្យរដ្ឋបាលនេះម្ចាស់ការក្នុងការគ្រប់គ្រង ចាត់ចែងមុខងារ និងធនធានហិរញ្ញវត្ថុ បុគ្គលិក ទ្រព្យសម្បត្តិសម្របសម្រួលប្រកបដោយប្រសិទ្ធភាព តម្លាភាព គណនេយ្យភាព ចំពោះរាជរដ្ឋាភិបាល និងប្រជាពលរដ្ឋក្នុងដែនសមត្ថកិច្ចរបស់ខ្លួន។ «ពង្រឹងសាមគ្គីភាពផ្ទៃក្នុង ទំនាក់ទំនងល្អ ជាមួយក្រសួង ស្ថាប័ន មន្ទីរ ក្នុងដែនសមត្ថកិច្ច ដើម្បីសុខដុមនីយកម្មលើទិដ្ឋភាពនយោបាយ និងរដ្ឋបាលសំដៅរួមចំណែកក្នុងការអភិវឌ្ឍសង្គម សេដ្ឋកិច្ច កាត់បន្ថយភាពក្រីក្ររបស់ប្រជាពលរដ្ឋ»។
ទោះយ៉ាងណា លោកស្រី ជៀប សុធារី មន្ត្រីសម្របសម្រួលនៃសមាគមការពារសិទ្ធិមនុស្សអាដហុកប្រចាំខេត្តព្រះសីហនុ ថ្លែងពីម្សិលមិញថា លោកស្រីហាក់មិនមានទំនុកចិត្តចំពោះការដាក់ចេញផែនការទាំងនេះនោះទេ។ «ការដាក់ចេញផែនការនេះ គឺល្អ ប៉ុន្តែមើលឃើញថា សមាសភាពថ្មីនេះគឺធ្លាប់បានកាន់តំណែងជាប្រធាន ជាសមាជិកយូរឆ្នាំមកហើយដែលមានសមាសភាពថ្មីតិចតួចបំផុត។ ដូច្នេះ ខ្ញុំដូចជាមិនសូវជាសង្ឃឹមប៉ុន្មានទេ ថា វានឹងជោគជ័យ ព្រោះថា បញ្ហាមួយចំនួន ដែលលើកឡើងដូចជា បញ្ហាសំរាម និងបរិស្ថានហ្នឹង វាហាក់ដូចជាកើតឡើងដដែលៗ គ្មានអ្វីផ្លាស់ប្តូរសោះ»។ «ទោះជាយ៉ាងណាក៏ដោយមានតែពេលវេលាដែលអាចបញ្ជាក់ថា តើរដ្ឋមន្ត្រី សាយ សំអាល់ អាចធ្វើឱ្យមានការផ្លាស់ប្តូរយ៉ាងណា នៅខេត្តព្រះសីហនុ»៕