ភ្នំពេញៈ លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន គ្រោងនឹងបង្កើតក្រុមត្រួតពិនិត្យផ្លូវពិសេសមួយដែលលោកអះអាងថា ដឹកនាំដោយផ្ទាល់ក្នុងការចុះឆ្មក់ត្រួតពិនិត្យផ្លូវកំពុងសាងសង់ក្នុងគោលបំណងពង្រឹងគុណភាពផ្លូវឲ្យមានស្តង់ដាខ្ពស់។
លោក ប៉ាល់ ចន្ទតារា រដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូនបានថ្លែងប្រាប់ភ្នំពេញ-ប៉ុស្ដិ៍កាលពីម្សិលមិញថា ក្រុមការងារថ្មីនេះ គឺជាក្រុមពិសេសមួយសម្រាប់ចុះឆ្មក់ត្រួតពិនិត្យគុណភាពផ្លូវគ្រប់កន្លែងទាំងអស់ដែលកំពុងសាងសង់ដោយមិនមានការជូនដំណឹងជាមុនឡើយ។
លោក ចន្ទតារា ថ្លែងថា៖ «យើងនឹងមិនមានការជូនដំណឹងមុនដល់ក្រុមហ៊ុនដែលកំពុងសាងសង់ផ្លូវនោះទេ គឺយើងឆ្មក់ចុះទៅត្រួតពិនិត្យគុណភាពផ្លូវនោះតែម្ដង។ ក្រុមដែលឯកឧត្ដមទេសរដ្ឋមន្ដ្រីរៀបចំនេះគឺក្រុមដែលឆ្មក់ ដោយមានម៉ាស៊ីនទំនើប និងអ្នកបច្ចេកទេសឆ្មក់ពិនិត្យខួងមើលផ្លូវដែលកំពុងសាងសង់នោះភ្លាមៗតែម្ដង ដើម្បីពង្រឹងគុណភាពផ្លូវឲ្យស្របតាមស្ដង់ដា»។
លោក ចន្ទតារា ថ្លែងថា៖ «ក្រុមពិសេសនេះបើចុះទៅពិនិត្យឃើញការស្ថាបនាផ្លូវមានការខុសស្ដង់ដា ក្រសួងនឹងមិនទទួលយកការស្ថាបនានោះទេ។ យើងតម្រូវធ្វើម៉េចធ្វើឲ្យត្រូវតាមស្ដង់ដា យើងមិនមានការយោគយល់ទេ។ បើការស្ថាបនាមិនត្រូវតាមស្ដង់ដាដែលក្រុមហ៊ុនសាងសង់បានចុះកិច្ចសន្យាជាមួយក្រសួងគឺមិនទទួលយកតែម្ដង និងត្រូវទទួលខុសត្រូវចំពោះមុខច្បាប់»។
លោក ចន្ទតារា បានបញ្ជាក់ថាការបង្កើតក្រុមពិសេសនេះ ព្រោះកន្លងមកមានផ្លូវមួយចំនួនបានស្ថាបនាឡើងមិនបានត្រឹមត្រូវតាមស្ដង់ដា។
លោក ស៊ុន ចាន់ថុល ថ្លែងតាមវីដេអូឃ្លីបដែលចេញផ្សាយដោយ Fresh News កាលពីថ្ងៃចន្ទថា៖ «ក្រុមនេះគាត់ធ្វើការឱ្យខ្ញុំផ្ទាល់តែម្តង មិនបាច់ចាំឱ្យទៅតាមអគ្គនាយកណាទេ មិនបាច់ចាំទៅតាមរដ្ឋលេខាធិការណាទេ។ ក្រុមនេះមានឡាន មានម៉ាស៊ីនគ្រប់គ្រាន់។ ខ្ញុំបញ្ជាទៅឆ្មក់ភ្លាម បើត្រូវខួងគឺខួងមើលភ្លាម។ យើងមានអ្នកសាងសង់មានអ្នកត្រួតពិនិត្យបច្ចេកទេសឯករាជ្យ យើងមានអ្នកត្រួតពិនិត្យរបស់ក្រសួង និងមានអ្នកត្រួតពិនិត្យឆ្មក់ថែមមួយទៀត ដើម្បីតាមដានឱ្យបានដិតដល់ជាទីបំផុតក្នុងការកសាងផ្លូវ ជួសជុលផ្លូវរបស់យើងឱ្យបានល្អ រឹងមាំជាប់បានយូរអង្វែងជូនប្រជាពលរដ្ឋយើង»។
លោក ស៊ុន ចាន់ថុល បានឲ្យដឹងថាផ្លូវដែលសាងសង់នៅកម្ពុជាមានប្រភេទផ្លូវ DBST ផ្លូវចាក់កៅស៊ូ ២ ស្រទាប់ និងផ្លូវ AC (Asphalt Concrete) ជាផ្លូវមានកៅស៊ូក្រាស់។ ប្រភេទផ្លូវ DBST នេះមានកម្រាស់កៅស៊ូស្តើងអាចប្រើប្រាស់បានរយៈពេល ៥ ឆ្នាំតែតម្លៃស្ថាបនាមានតម្លៃទាប។ ចំណែកផ្លូវ AC មានកម្រាស់កៅស៊ូក្រាស់តែតម្លៃស្ថាបនាថ្លៃ។ ប្រភេទផ្លូវកម្រិត AC នេះ បានស្ថាបនាឡើងតាមបណ្ដាផ្លូវជាតិលេខ ៦ ពីភ្នំពេញទៅសៀមរាប, ផ្លូវជាតិលេខ ១, ផ្លូវជាតិលេខ ២១, ផ្លូវជាតិលេខ ៤, ផ្លូវជាតិលេខ ៧ ពីក្រចេះទៅស្ទឹងត្រែង និងផ្លូវជាតិលេខ ៥ និងលេខ ៣ ដែលកំពុងសាងសង់ដែរនោះ។
លោក ស៊ុន ចាន់ថុល ថ្លែងថា៖ «បច្ចុប្បន្នកម្រិតចរាចរណ៍កាន់តែមមាញឹក ទើបកម្ពុជាចាប់ផ្តើមពង្រីកគុណភាពផ្លូវមួយចំនួនទៀតទៅជាកម្រិត AC ដែលត្រូវចាក់កៅស៊ូក្រាស់ និងជាប់បានយូរជាងផ្លូវប្រភេទ DBST។ បើសិនជាកម្ពុជាជ្រើសរើសយកការសាងសង់ផ្លូវមានកម្រិតជាប់ល្អ AC តែម្តងគឺមិនអាចតភ្ជាប់បានឡើយ ហើយខាតផ្នែកសេដ្ឋកិច្ចថែមទៀត ព្រោះផ្លូវនៅតាមខេត្តមានចរាចរណ៍តិចនៅឡើយ»។
លោក ព្រាប កុល នាយកប្រតិបត្ដិអង្គការតម្លាភាពកម្ពុជា (Transparency International) បានថ្លែងកាលពីថ្ងៃម្សិលមិញថា ការត្រួតពិនិត្យការស្ថាបនាផ្លូវនេះ គួរមានការបើកទូលាយឲ្យមានអ្នកចូលរួមពីភាគីផ្សេងៗផងដែរ។
លោក ព្រាប កុល បានថ្លែងថា៖ «យើងមិនចាំបាច់ធ្វើដោយសម្ងាត់ទេឲ្យតែយើងមានអ្នកជំនាញ អ្នកបច្ចេកទេស យល់ដឹងពីផ្នែកវិស្វកម្មដោយមើលទៅក្នុងកិច្ចសន្យាស្ថាបនាផ្លូវនោះ រួចជ្រើសរើសទីកន្លែងក្នុងការត្រួតពិនិត្យលើគុណភាពនៃផ្លូវនោះទៅថា តើត្រឹមត្រូវតាមស្ដង់ដាដែរទេ?»៕