La malària es una malautiá que solament pendent l’an 2017 patiguèron mai de 200 milions de personas a la planeta. Pr’açò es una grèva malautiá qu’encara se coneis pas cossí tractar. Es causada per un parasit del genre Plasmodium e la majoritat de còps es transmesa per de mosquilhs. Ongan, una còla internacionala de cercaires trapèt un compausat natural que poiriá ajudar garir aquela malautiá.
Aquò pr’amor que lo parasit de Plasmodium, semblariá ara se tornar mai e mai resistent a las medecina actuala que i a uèi per i luchar. La draia per arribar ara al compausat natural que poiriá anar plan comencèt amb la quinina e l’artemisina, doas drògas naturalas qu’an los òmes de las plantas e que foguèron totjorn usadas per la medecina tradicionala.
Per ansin, lo compausat ara trapat seriá estat descobèrt a la region de l’Amazonas, ont i a un fum de plantas que son estudiadas uèi lo jorn per luchar contra aquela e d’autras malautiás. Entre aquelas plantas i lo palmièr de l’Açài, que dòna de baias que poirián èsser un bon remèdi natural contra la malària.
Una frucha fòrça consumida
Las baias d’Açài son de fruchas plan consumidas a la region. Las comunautats localas brasilièras del luòc las utilizan coma potinga naturala per luchar contra la fèbre. E fa gaire començèt d’èsser exportada pr’amor qu’es un remèdi antioxidant natural fòrça bon. La causa ne seriá qu’a de polifenòls, un tipe de compausat qu’ajuda plan la santat pr’amor qu’entraïna una pèrda de pes, es una bona prevencion contra de malautiás cardiovascularas e provòca un risc mendre a l’ora de patir de malautiás coma lo càncer.
Aquela baia de palmièr d’Açaí seriá doncas la ressorça naturala que los cercaires estudièron e qu’entraïnèt la descobèrta de la meteissa coma una bona potinga naturala contra la malautiá de la malària.
Aital, los polifenòls d’aquelas baias (Buterpe oleracea) pòdon redusir lo nombre de parasits de malària a la sang e ajudar a la subrevivéncia del malaut. Aquela seriá la resulta apuèi tractar de mirgas qu’avián la malària amb de polifenòls d’aquelas baias. Segon aqueles cercaires aqueles polifenòls (los nonantocianids) arrestarián la creissença d’aqueles parasits.
Apuèi tractar los polifenòls al laboratòri, los cercaires los donèron a de mirguetas amb de malària. La resulta de l’experimentacion foguèt susprenenta car las mirguetas que recebèron de polifenòls del palmièr d’Açài redusiguèron los parasits en sang en un 89% e visquèron fins a 15 jorns mai que las mirguetas que los recebèron pas, que moriguèron totas. Segon los cercaires los polifenòls poirián empedir l’omeostasi de la proteïna d’aqueles parasits. L’estudi foguèt publicat al numeric ACS Omega.
La Redaccion
