.jpg)
ពលរដ្ឋជញ្ជូនអីវ៉ាន់ចេញពីតូបពេលមានព្យុះបង្កឲ្យទឹកសមុទ្រជន់ឡើង។ រូបថត សហការី
កោះកុងៈ អាជ្ញាធរខេត្តកោះកុងកំពុងបន្តជួសជុលផ្លូវជាប់មាត់ឆ្នេរប៉ាក់ខ្លង ខណៈក្រុមអាជីវករ និងអ្នកប្រកបមុខរបរដើរទូកទេសចរណ៍មួយចំនួនក៏រៀបចំជួសជុលតូបលក់ដូរ និងទូករបស់ពួកគេផងដែរ ក្រោយពីមានការវាយប្រហារដោយរលកសមុទ្រធំៗកាលពីប៉ុន្មានថ្ងៃកន្លងមកនេះ។ នេះបើតាមការអះអាងពីមន្ត្រីអ្នកនាំពាក្យសាលាខេត្តកោះកុងកាលពីម្សិលមិញ។
លោក សុខ សុទ្ធី មន្ត្រីនាំពាក្យសាលាខេត្តកោះកុងបានប្រាប់ភ្នំពេញប៉ុស្តិ៍ថា នៅពេលនេះស្ថានភាពអាកាសធាតុក្នុងខេត្តកោះកុងវិលទៅរកភាពស្ងប់ស្ងាត់ដូចធម្មតាវិញហើយ ពិសេសរលកសមុទ្រមិនបង្កឲ្យមានភាពគ្រោះថ្នាក់ដូចកាលពីថ្ងៃទី ៤-៥ ខែមករានោះទេ។
លោកថ្លែងថា៖ «រលកសមុទ្រដែលបង្កឡើងដោយឥទ្ធិពលនៃព្យុះប៉ាប៊ុកបានបង្កការខូចខាតផ្លូវជាប់មាត់ឆ្នេរប៉ាក់ខ្លងស្ថិតក្នុងស្រុកមណ្ឌលសីមាប្រវែងជិត ១ គីឡូម៉ែត្រ និងទូកទេសចរណ៍កន្ទុយវែង ៦ គ្រឿងព្រមទាំងតូបលក់ដូរមួយចំនួន ប៉ុន្តែមិនបង្កគ្រោះថ្នាក់ដល់អាយុជីវិតរបស់បងប្អូនប្រជាពលរដ្ឋយើងណាម្នាក់ឡើយ»។
លោក សុទ្ធី បញ្ជាក់ថានៅពេលនេះអាជ្ញាធរខេត្តកោះកុងកំពុងរួមសហការជាមួយអាជ្ញាធរនៃមន្ទីរ និងអង្គភាពពាក់ព័ន្ធនានា ពិសេសអាជ្ញាធរមូលដ្ឋានធ្វើការជួសជុលផ្លូវ និងឆ្នេរខ្សាច់ឡើងវិញ ដើម្បីជាប្រយោជន៍ដល់ភ្ញៀវទេសចរជាតិ និងអន្តរជាតិមកកម្សាន្តសប្បាយដូចធម្មតាវិញ។
លោក ម៉ន វឌ្ឍនា អាយុ ២៥ ឆ្នាំ រស់នៅភូមិ-ឃុំប៉ាក់ខ្លង ស្រុកមណ្ឌលសីមា ខេត្តកោះកុងដែលជាអ្នកប្រកបមុខរបរដើរទូកទេសចរណ៍បាននិយាយថា នៅយប់ថ្ងៃទី ៤ ខែមករារលកសមុទ្រមិនធំប៉ុន្មានទេ ប៉ុន្តែចូលដល់ព្រឹកថ្ងៃទី ៥ ខែមករាស្រាប់តែផ្ទៃមេឃខ្មៅដាបហើយមានខ្យល់បក់បោកខ្លាំង បន្ទាប់មកក៏មានរលកធំៗ និងខ្ពស់ៗមកតែម្ដងបណ្ដាលឲ្យទូករបស់លោក និងអ្នកជិតខាងមួយចំនួនទៀតដែលចតនៅផែទូកនោះលិចចូលទៅក្នុងសមុទ្រ។
លោកថ្លែងថា៖ «ពួកយើងស្ទើរតែរត់ឡើងគោកមិនទាន់នៅពេលដែលមានរលកសមុទ្រធំៗនោះមកដល់ទឹកសមុទ្រក៏បានជន់ឡើងផងដែរ តូបលក់ដូរជាច្រើននៅជាប់មាត់ឆ្នេរត្រូវរងការលិចលង់ និងខូចខាតដោយរលកសមុទ្រផងដែរ។ ទូករបស់ខ្ញុំបានខូចខាតស្ទើរទាំងស្រុងផងដែរ បន្ទាប់ពីរលកសមុទ្របានរុញវាបោកខ្ទប់ទៅនឹងផែរហូតដល់លិចចូលទៅក្នុងសមុទ្រ»។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមនិយាយពីម្សិលមិញថា ព្យុះប៉ាប៊ុកអស់ឥទ្ធិពលមកលើលម្ហសមុទ្រនៃប្រទេសកម្ពុជាហើយ។ នៅពេលនេះវាកំពុងបន្តដំណើរឆ្ពោះទៅសមុទ្រ អាន់ដាម៉ាន់ (Andaman Sea)៕
