ព្រះវិហារៈ សមត្ថកិច្ចកំពុងតាមចាប់ម្ចាស់រថយន្តដឹកឈើប្រណិតមួយគ្រឿង បន្ទាប់ពីម្ចាស់រថយន្តរូបនេះ បានព្យាយាមបើកគេចពីការតាមចាប់របស់សមត្ថកិច្ច ហើយរថយន្តបានបែកកង់ក្រឡាប់ នៅក្នុងឃុំ រមណី ស្រុករវៀង កាលពីថ្ងៃទី ២៨ ខែឧសភា។
លោក ជ័យ សេដ្ឋា នាយសង្កាត់រដ្ឋបាលព្រៃឈើស្រុករវៀង បានឲ្យដឹងថា កាលពីថ្ងៃទី ២៨ ខែឧសភា មានរថយន្ត ៣ គ្រឿង បើកអមរថយន្តម៉ាក SIENNA ដែលដឹកឈើប្រណិតប្រភេទធ្នង់ចំនួន ២ ម៉ែត្រគួបមួយគ្រឿង ខណៈមកដល់ខាងមុខប៉ុស្ដិ៍រដ្ឋបាលព្រៃឈើ ក៏បានបន្ថែមល្បឿន បំណងបើកគេចខ្លួន។ ប៉ុន្ដែលុះបើកដល់ចំណុចបណ្តោយផ្លូវជាតិលេខ ៦២ ក្នុងភូមិរំចេក ឃុំរមណី ស្រុករវៀង ក៏បានបែកកង់ខាងឆ្វេងក្រឡាប់ផ្ងារជើងតែម្ដង។
លោកបន្តថា ពេលជួបគ្រោះថ្នាក់នេះ ជនល្មើស បានរងរបួសស្រាល ហើយបើកទ្វាររថយន្តរត់គេចខ្លួនជាមួយរថយន្ត៣ គ្រឿងទៀត ដែលអមរថយន្តដឹកឈើនោះ។ សមត្ថកិច្ចបានទៅដល់កន្លែងកើតហេតុ និងបានប្រមូលឈើប្រណិតទាំងនោះ មករក្សាទុកនៅប៉ុស្ដិ៍រដ្ឋបាលព្រៃឈើស្រុករវៀង។ សមត្ថកិច្ចជំនាញ កំពុងស្រាវជ្រាវកំណត់អត្ដសញ្ញាណ រកជនល្មើស ដើម្បីដាក់ទោសតាមច្បាប់។
លោកបញ្ជាក់ថា៖«រថយន្តដឹកឈើ និងឈើ ២ ម៉ែត្រគួប យើងបានយកមករក្សាទុកនៅរដ្ឋបាលព្រៃឈើ ហើយកំពុងតាមរកអត្ដសញ្ញាណម្ចាស់ ដើម្បីឃាត់ខ្លួន មានអ្នកពាក់ព័ន្ធផ្សេងទៀត ដែលបើកឡានអមយកឈើទៅលក់នៅប្រទេសថៃ»។
លោក សាយ ដេត អធិការស្រុករវៀង បានថ្លែងកាលពីម្សិលមិញថា មន្រ្តីរបស់លោក បានសហការជាមួយមន្រ្តីរដ្ឋបាលព្រៃឈើស្រុក ប៉ុន្ដែភស្តុតាង និងរបាយការណ៍ទាំងអស់ ត្រូវប្រគល់ឲ្យមន្រ្តីរដ្ឋបាលព្រៃឈើជាអ្នកចាត់ចែង។ លោកថា ខណៈដែលសមត្ថកិច្ច ដេញតាមពីក្រោយ ជនល្មើសបានភ័យ ក៏បានបន្ថែមល្បឿនយ៉ាងលឿន បណ្ដាលឲ្យរថយន្តបែកកង់ក្រឡាប់ផ្ញារជើង ខណៈដែលរថយន្តនោះ បានដាក់ផ្ទុកឈើលើសចំណុះ។
លោកបញ្ជាក់ថា៖«មន្រ្តីខ្ញុំ គ្រាន់តែជួយដេញតាមដែរ ពេលចាប់បានហើយ ក៏ប្រគល់ឲ្យមន្រ្តីរដ្ឋបាលព្រៃឈើ។ ចំណែកជនល្មើស យើងកំពុងតាមដានរកអត្ដសញ្ញាណបន្ត ដើម្បីឃាត់ខ្លួនដាក់ទោសតាមច្បាប់»៕