ភ្នំពេញៈ កម្មករកាត់ដេរប្រមាណ ៣០០ នាក់មកពីរោងចក្រក្បាលកោះក្នុងខណ្ឌច្បារអំពៅបានលើកគ្នាមកតវ៉ាជាថ្មីទៀតនៅពីមុខក្រសួងការងារនៅព្រឹកថ្ងៃទី ១៩ ខែមិថុនា ឆ្នាំ ២០១៨ ដើម្បីទាមទារឲ្យក្រសួងមួយនេះផ្តល់ប្រាក់បុរេប្រទានដល់ពួកគេក្រោយពីម្ចាស់រោងចក្របានបិទទ្វារដោយមិនផ្តល់សំណងដល់កម្មករ។
អ្នកស្រី អុល វណ្ណា អាយុ ៣០ ឆ្នាំដែលបានធ្វើការនៅរោងចក្រក្បាលកោះ ១០ ឆ្នាំមកហើយ និងជាតំណាងកម្មករបានឲ្យដឹងថាមានកម្មករប្រហែលជាង ៧០០ នាក់នៅមិនទាន់ទទួលប្រាក់បុរេប្រទាន (ប្រាក់សំណងដែលរដ្ឋាភិបាលត្រូវផ្តល់ឲ្យកម្មករជំនួសថៅកែរោងចក្រ) ចាប់តាំងពីរោងចក្របិទទ្វារជាង ១ ឆ្នាំមកនេះ។
អ្នកស្រី វណ្ណា ដែលកំពុងមានផ្ទៃពោះ ៨ ខែ និយាយថា៖ «យើងមកទាមទារប្រាក់បុរេប្រទានរបស់សម្តេច ហើយនិងលុយអត្ថប្រយោជន៍តាមផ្លូវច្បាប់។ យើងមកទាមទារប្រាក់បំណាច់ ប្រាក់ខែចុងក្រោយ ប្រាក់បណ្តេញចេញប្រាក់អតីតភាពការងារ»។
អ្នកស្រីបានថ្លែងថាកម្មករទាំងអស់ចង់ឲ្យក្រសួងការងារក៏ដូចជារដ្ឋាភិបាល ជួយអន្តរាគមន៍រកដំណោះស្រាយឲ្យបានឆាប់។ «ខ្ញុំវេទនាណាស់។ ខ្ញុំពោះធំខ្ញុំរង់ចាំដំណោះស្រាយ។ ខ្ញុំអត់មានប្រាក់ខែ ដើម្បីសងលុយធនាគារទេ ហើយខ្ញុំក៏ត្រូវខ្ចីលុយគេឆ្លងទន្លេដែរ»។
អ្នកស្រី សួន ស្រីម៉េត អាយុ ៣៥ ឆ្នាំដែលមានកូន ៤ នាក់ក្នុងបន្ទុកបានឲ្យដឹងថា អ្នកស្រីបានធ្វើការរយៈពេល ១២ ឆ្នាំមកហើយនៅរោងចក្រ ក្បាលកោះនេះដោយទទួលបានប្រាក់ខែ ១៩០ ដុល្លារក្នុងមួយខែបូករួមទាំងប្រាក់បន្ថែមម៉ោង។
អ្នកស្រី ស្រីម៉េត ដែលបច្ចុប្បន្នមានការងារធ្វើនៅរោងចក្រថ្មីក្រោយពីអត់ការងារធ្វើរយៈពេលកន្លះឆ្នាំនោះនិយាយថា៖ «យើងអត់បានទទួលប្រាក់ខែតាំងពីខែ ១២ ឆ្នាំ ២០១៦។ ខ្ញុំចំណាយពេលកន្លះឆ្នាំទើបរកការងារថ្មីបាន។ អំឡុងពេលហ្នឹងខ្ញុំត្រូវចាយលុយប្តី។ ខ្ញុំពិបាកណាស់ ខ្ញុំមានកូនច្រើនកូនដល់ ៤ នាក់ យើងខ្វះខាតលុយឲ្យកូនទៅរៀន»។
ក្រុមកម្មករបានទាមទារឲ្យក្រសួងការងារដោះស្រាយបើកប្រាក់បុរេប្រទានឲ្យពួកគេឲ្យបានត្រឹមត្រូវបើពុំដូច្នោះទេ ពួកគេនឹងនៅតែបន្តធ្វើការតវ៉ានៅមុខក្រសួងរហូតទាល់តែមានដំណោះស្រាយ។
មិនមានប្រភពទាក់ទងតំណាងរោងចក្រក្បាលកោះដែលបានបិទទ្វារនោះ ដើម្បីសុំអធិប្បាយបានទេកាលពីម្សិលមិញ។
ប៉ុន្តែលោក ហេង សួរ អ្នកនាំពាក្យក្រសួងការងារបានថ្លែងថាក្រសួងបានទទួលសំណើពីកម្មករនៅរោងចក្រក្បាលកោះដែលតវ៉ានោះរួចហើយ ហើយក្រសួងកំពុងតែពិនិត្យមើលលើបញ្ហានេះ៕