.jpg)
អាវុធច្នៃដែលប្រមូលបាននៅសៀមរាប និងរូបតូចគ្រាប់បែកចង្កោមរកឃើញនៅព្រៃវែង។ រូបថត FB/CMAC
ខេត្តសៀមរាប/ព្រៃវែងៈ អាវុធកែច្នៃប្រមាណ ១៣៨ ដើមត្រូវបាននគរបាលស្រុកជីក្រែង ខេត្តសៀមរាបប្រមូលបានពីពលរដ្ឋ និងខ្លះទៀតត្រូវបានពលរដ្ឋយកមកប្រគល់ជូនកាលពីថ្ងៃទី ២៣ ខែឧសភា ខណៈដែលនៅខេត្តព្រៃវែងមានគ្រាប់បែកចង្កោមជាង ១០០ គ្រាប់ត្រូវបានមន្ត្រីស៊ីម៉ាក់រកឃើញនៅស្រុកពាមរក៍។
លោក តាន់ សុផុន អធិការរងនគរបាលស្រុកជីក្រែងបានឲ្យដឹងថាអាវុធកែច្នៃទាំងនោះត្រូវបាននគរបាលជំនាញប្រមូលពីពលរដ្ឋ និងមួយចំនួនទៀតពលរដ្ឋយល់ព្រមយកមកប្រគល់ឲ្យនគរបាលបន្ទាប់ពីមានការផ្សព្វផ្សាយនូវគោលនយោបាយ ភូមិ-ឃុំ មានសុវត្ថិភាព។
លោកបន្តថាអាវុធដែលអធិការដ្ឋាននគរបាលស្រុកជីក្រែងធ្វើពិធីប្រគល់ឲ្យទៅការិយាល័យគ្រប់គ្រងអាវុធគ្រឿងផ្ទុះនាពេលនេះគឺមាន ១៣៨ ដើម រួមមាន៖ ១- កាំភ្លើងព្រៃ ១៥ ដើម,២- កាំភ្លើងខ្យល់ ១០៦ ដើម, ៣- កាំភ្លើងព្រួញ ១២ ដើម ៤- កាំភ្លើងខូចគុណភាព ៥ ដើម (មាន AK47 ១ ដើម, M16 ១ ដើម, CKC ២ ដើម និង AR15 ១ ដើម)។
លោក តាន់ សុផុន បញ្ជាក់ថា៖ «បច្ចុប្បន្នអាវុធទាំង ១៣៨ ដើមត្រូវបានក្រុមការងារនៃការិយាល័យគ្រប់គ្រងអាវុធគ្រឿងផ្ទុះជាតិពុលនៃស្នងការដ្ឋាននគរបាលខេត្តសៀមរាបទទួលយកមករក្សាទុកក្នុងឃ្លាំងសុវត្ថិភាព។ អាវុធទាំងនោះត្រូវបានពលរដ្ឋប្រើប្រាស់សម្រាប់បាញ់សត្វ បាញ់កណ្ដុរ ពស់ និងសត្វផ្សេងៗនាពេលយប់»។
ចំណែកនៅខេត្តព្រៃវែងលោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់) បានឲ្យដឹងកាលម្សិលមិញថានៅថ្ងៃទី ២២-២៣ ខែឧសភា ឆ្នាំនេះក្រុមការងារស៊ីម៉ាក់បានរកឃើញគ្រាប់បែកចង្កោមជាង ១០០ គ្រាប់នៅស្រុកពាមរក៍ ខេត្តព្រៃវែងដែលមានលក្ខណៈស្រដៀងនឹងគ្រាប់ប៊ូលដែរ។
លោកបន្តថាមន្ត្រីស៊ីម៉ាក់បានចំណាយពេល ២ ថ្ងៃដោយថ្ងៃទី ១ រកឃើញ ៤០ គ្រាប់ និងថ្ងៃទី ២ រកឃើញ ៧០ គ្រាប់ ហើយមន្ត្រីបានដាក់សញ្ញាសម្គាល់មិនឲ្យពលរដ្ឋទៅក្បែរ និងកំពុងតាមដានស្វែងរកទីតាំងកន្លែងផ្សេងទៀត។ លោកបានអំពាវនាវឲ្យពលរដ្ឋប្រុងប្រយ័ត្នចំពោះគ្រាប់បែកចង្កោមប្រភេទនេះ។
លោក ហេង រតនា បានបញ្ជាក់ថា៖ «ប្រសិនបើប្រជាពលរដ្ឋដែលបានឃើញគ្រាប់យុទ្ធភណ្ឌមិនទាន់ផ្ទុះ សូមកុំប៉ះពាល់ ឬគប់លេងឲ្យសោះត្រូវរាយការណ៍ជូនសមត្ថកិច្ច ដើម្បីដោះស្រាយជូន និងចៀសវាងគ្រោះថ្នាក់កើតឡើង»។
តាមរបាយការណ៍ពីអាជ្ញាធរមីនបានបង្ហាញកាលពីដើមឆ្នាំ ២០១៧ ថា ចាប់តាំងពីឆ្នាំ ១៩៩២ មកទល់ឆ្នាំ ២០១៦ កម្ពុជាបានបោសសម្អាតមីនលើផ្ទៃដីប្រមាណជិត ១៥០០ គីឡូម៉ែត្រក្រឡាបានរកឃើញគ្រាប់មីន និងកម្ទេចចោលគ្រាប់មីនប្រឆាំងមនុស្ស ១ ០៣១ ២៧៧ គ្រាប់,មីនតោន ២៤ ១៧៩ គ្រាប់ និងសំណល់ជាតិផ្ទុះពីសង្គ្រាម ២ ៦៤៦ ៦៥៧ គ្រាប់។
របាយការណ៍ដដែលបញ្ជាក់ថា៖ «កម្ពុជាត្រូវការនូវការរួមចំណែកពីប្រតិបត្តិករជាតិ និងអន្តរជាតិ រាជរដ្ឋាភិបាលកម្ពុជា និងបណ្តាប្រទេសផ្តល់ជំនួយទាំងអស់ក្នុងការចូលរួមធ្វើឲ្យសម្រេចបាននូវគោលដៅរបស់កម្ពុជាក្នុងការបោសសម្អាតមីនឲ្យអស់នៅត្រឹមឆ្នាំ ២០២៥ នៅលើផ្ទៃដី ១៩៤៦ គីឡូម៉ែត្រក្រឡា និងត្រូវការថវិកាប្រមាណ ៤០៦ លានដុល្លារអាមេរិក»៕
