最近先同老公講起，由細到大都好怕食蜆，一來細個會敏感，二來因為多數食親都係好多芡汁同埋好油。如果食清酒煮蜆，好多地方都整到好似清水煮蜆咁，又多沙，所以好唔鍾意。直到 10 年前一次去掘蜆，食過油鹽水煮蜆之後，就愛上咗食蜆。但係成日覺得吐沙搞好耐，所以一直都唔會整。直到多年前有日宴客，朋友話攞枝清酒比我，我哋整清酒煮蜆。嗰日除咗學識浸蜆，仲學識煮地上最強清酒煮蜆。（不過食譜都唔記得點得嚟了）呢個洗蜆嘅方法就一直用到依家。
不過要注意嘅，係如果天氣太熱，就可能要換凍水浸蜆，因為試過有次啲水好暖，啲蜆未煮就已經不行了。
清洗方法：
1. 開住慢慢嘅水，啲蜆喺流水下，用牙刷刷乾淨表面。
2. 放落碗內加水繼續搓揉，如果倒出來嘅水係混濁嘅，就要繼續洗，如果洗到水清，就可以倒曬啲水浸蜆了。
3. 視乎你有幾多蜆，準備500毫升至一公升左右嘅水，加入鹽然後攪拌至鹽粒完全融化。鹽嘅比例係 500毫升水加半湯匙鹽。
4. 將水倒入放咗蜆嘅碗內，水要浸過啲蜆。
5. 用碟蓋好碗頂，慎防啲蜆吐沙嘅時候噴到周圍都係水。
6. 放大約 1-2個鐘倒咗啲水佢，沖一沖就可以用嚟煮了。