De donadas de satellit d’un nòu estudi dels darrièrs 40 ans an confirmat que lo glaç de Groenlàndia desapareisseriá per totjorn. Per ansin, e mai se que lo cambiament climatic s’arrestèsse uèi lo jorn, lo glaç contunhariá de se fondre.
“Avèm amassat de donadas dels darrièrs 40 ans per estudiar la nèu qu’emplena cada annada los glacièrs d’aquela region, çò ditz Michaela King, cercaire de l’Universitat d’Ohio. La resulta es que, a l’ora d’ara, i a mai de nèu que tomba sus l’ocean que suls glacièrs. E doncas lo glaç de Groenlàndia es arribat a un ponch de non-retorn”.
L’estudi fach per King e d’autres cercaires a trapat que, pendent los ans 1980 e 1990 encara i aviá un cèrt equilibri environamental en Groenlàndia, pr’amor que casiá pro de nèu suls glacièrs (aperaquí 450 miliards de tonas). Una quantitat totalament desparièra de l’actuala. Sonque après un periòde cort de sonque 5 o 6 ans la nèu que tombava sus l’ocean a començat de créisser totjorn que mai.
Lo cambiament comencèt l’an 2000
Aital, la quantitat de glaç perduda comencèt d’aumentar a partir de l’an 2000, amb mai de 500 gigatonas annadièras. Pendent lo darrièr decenni se pèrd totjorn que mai de glaç dins los glacièrs e aquò vòl dire que i a pas pus tanta nèu coma abans per emplenar los glacièrs pr’amor del cambiament climatic que lo patís la planeta. Segon aquel estudi, la massa de glaç creisserà sonque un còp cada 100 ans amb lo clima actual.
Segon King, los glacièrs de Groenlàndia an perdut fins a 3 quilomètres dempuèi 1985 en mejana e una mar que s’escalfa i ajuda pas tanpauc. Aquò vòl dire qu’e mai se l’umanitat poguèsse arrestar uèi lo cambiament climatic, çò que se fa pas encara, la pèrda de glaç contunhariá encara pendent d’annadas. L’estudi a agut lo sosten de la NASA.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
