ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានចេញសេចក្តីប្រកាសដោយធ្វើការហាមឃាត់ជនបរទេសដែលមករស់នៅក្នុងប្រទេស កម្ពុជា មិនឲ្យប្រកបមុខរបរផ្ទាល់ខ្លួនម្នាក់ឯងលើមុខរបរ ឬមុខងារចំនួន ១០ ប្រភេទក្នុងគោលបំណងដើម្បីជួយការពារទីផ្សារ និងមុខរបរជាលក្ខណៈអាជីវកម្មតូចៗ ក្រៅប្រព័ន្ធរបស់ប្រជាពលរដ្ឋខ្មែរដែលការសម្រេចនេះបានធ្វើឲ្យមានការសាទរពីតំណាងសហជីពមួយចំនួន។
សេចក្តីប្រកាសដែលចុះហត្ថលេខាដោយលោក អ៊ិត សំហេង រដ្ឋមន្ត្រីក្រសួងការងារកាលពីថ្ងៃទី ២៨ ខែ សីហា ម្សិលមិញបានឲ្យដឹងថា បានធ្វើការហាមឃាត់សកម្មភាពនិយោជន៍ដោយជនបរទេសនូវមុខរបរ និងការងារដូចខាងក្រោម «១- អ្នកបើកបរយានជំនិះគ្រប់ប្រភេទ ជាលក្ខណៈអាជីវកម្មជាអាទិ៍ អ្នកបើកទោចក្រយានយន្ត អ្នកបើកត្រីចក្រយានយន្ត អ្នកបើកទោចក្រយានយន្តសណ្តោងរ៉ឺម៉ក អ្នកបើកម៉ូតូកង់ ៤ អ្នកបើករថយន្តដឹកអ្នកដំណើរ និងដឹកទំនិញ ២- អ្នកលក់ដូរដោយមធ្យោបាយថ្មើរជើង ឬយានជំនិះគ្រប់ប្រភេទនៅទីសាធារណៈ ៣- អ្នកម៉ាស្សាចាប់សរសៃតាមទីសាធារណៈ ៤- អ្នកកាត់សក់ អ៊ុតសក់ និងថែរក្សាសម្ផស្ស»។
ក្រៅពីនេះគឺបានហាមឃាត់ជនបរទេសមិនឱ្យធ្វើអ្នកផ្តល់សេវាកម្មដេរ អ្នកកាត់ដេរ សម្អាតស្បែកជើង អ្នកប៉ះកង់ ជាងជួសជុលយានយន្ត អ្នកផលិតវត្ថុអនុស្សាវរីយ៍ខ្មែរ អ្នកផលិតឧបករណ៍ភ្លេងខ្មែរ បាត្រលោក ព្រះពុទ្ធរូប និងជាងទង ជាងច្នៃត្បូងពេជ្រផងដែរ។
សេចក្តីប្រកាសបញ្ជាក់ដូច្នេះថា៖ «ក្រសួងការងារ និងបណ្តុះបណ្តាលវិជ្ជាជីវៈនឹងមិនផ្តល់ ឬមិនបន្តសុពលភាព ប័ណ្ណ/ សៀវភៅការងារដល់ជនបរទេស ដែលកំពុងប្រកបមុខរបរ និងការងារដូចមានកំណត់ក្នុងប្រការ ២ នៃប្រកាសនេះ។ ជនណាដែលប្រព្រឹត្តផ្ទុយនឹងបទប្បញ្ញត្តិនៃប្រកាសនេះត្រូវធ្វើការពិន័យជាប្រាក់ និងផ្តន្ទាទោសតាមបទប្បញ្ញត្តិនៃច្បាប់ស្តីពីការងារ និងបទប្បញ្ញត្តិជាធរមាន»។
លោក សៀង ថៃ អ្នកនាំពាក្យក្រសួងពាណិជ្ជកម្មមិនអាចទាក់ទងសុំការអធិប្បាយលើបញ្ហានេះបានទេ។
ប៉ុន្តែលោក ហេង សួរ អ្នកនាំពាក្យក្រសួងការងារបានថ្លែងថាការសម្រេចរបស់ក្រសួងនេះគឺនឹងជួយការពារមុខរបរ និងការងាររបស់ប្រជាពលរដ្ឋខ្មែរនឹងបង្កើននូវឱកាសការងារបន្ថែមទៀតដល់ប្រជាពលរដ្ឋដែលស្ថិតនៅក្នុងតំបន់ដែលធ្លាប់មានជនបរទេសធ្វើសកម្មភាពស្វ័យនិយោជន៍ទាំង ១០ ប្រភេទ។
លោកបញ្ជាក់៖ «...ដូច្នេះអ្វីដែលយើងបានចេញគឺជាពេលវេលាសមស្រប បន្ទាប់ពីបានធ្វើការពិគ្រោះយោបល់ជាមួយភាគីពាក់ព័ន្ធ»។
លោកក៏បានការពារសេចក្តីប្រកាសរបស់ក្រសួងនេះផងដែរថាមិនបានធ្វើឲ្យប៉ះពាល់ និងរំលោភទៅលើច្បាប់របស់អង្គការពាណិជ្ជកម្មពិភពលោក អង្គការសិទ្ធិមនុស្សអន្តរជាតិ និងអង្គការពលកម្មអន្តរជាតិនោះទេ ដោយសារតែតំណាងកម្មករនិយោជិកតំណាងនិយោជកហើយភាគីរាជរដ្ឋាភិបាលបានជួបពិភាក្សា និងបានធ្វើការពិនិត្យសេចក្តីប្រកាសនេះយ៉ាងប្រុងប្រយ័ត្នទាំងក្របខណ្ឌគតិយុត្តផ្នែកអន្តរជាតិ និងតំបន់ច្បាប់ការងារ និងផ្អែកលើតម្រូវការជាក់ស្តែង ដើម្បីចៀសវាងការចោទប្រកាន់ការរើសអើង ពណ៌សម្បុរ ជាតិសាសន៍នៅក្នុងប្រទេសកម្ពុជា។
លោក សោម អូន ប្រធានសភាសម្ព័ន្ធសហជីពជាតិកម្ពុជា NACC បានថ្លែងថា សេចក្តីប្រកាសរបស់ក្រសួងនឹងជួយការពារនូវមុខរបរអាជីវកម្មខ្នាតតូចរបស់ប្រជាពលរដ្ឋមូលដ្ឋាន ហើយជនបរទេសមិនអាចដណ្តើមទីផ្សាររបស់ពួកគេបាន ដោយសារតែមន្ត្រី និងសមត្ថកិច្ចពាក់ព័ន្ធនឹងចាប់ផ្តើមធ្វើការហាមឃាត់ជនបរទេសទាំងនោះ។
លោកបញ្ជាក់៖ «សេចក្តីប្រកាសនេះដើម្បីកុំឲ្យជនបរទេសធ្វើការងារមួយចំនួនដែលប៉ះពាល់ទៅដល់ការងាររបស់ប្រជាពលរដ្ឋមូលដ្ឋានដូចជាការលក់ដូរ ជាងកាត់សក់ អ្នករត់តាក់ស៊ី អ្នកម៉ាស្សា...មិនអនុញ្ញាតឲ្យជនបរទេស គាត់ប្រកបមុខរបរទាំងអស់ហ្នឹងទេ ដោយវាអាចប៉ះពាល់ដល់មុខរបរប្រជាពលរដ្ឋរបស់យើង»។
លោកស្រី កេន ឆេងឡាង អនុប្រធានសហភាពចលនាកម្មករកម្ពុជាក៏បានស្វាគមន៍នូវការសម្រេចរបស់ក្រសួងការងារផងដែរដោយថ្លែងថានឹងជួយការពារមុខរបររបស់ពលរដ្ឋខ្មែរ តែលោកស្រីក៏បានបង្ហាញពីការព្រួយបារម្ភអំពីប្រសិទ្ធភាពនៃអនុវត្តច្បាប់ជាក់ស្តែងដោយសារតែការយល់ដឹងរបស់សមត្ថកិច្ចមួយចំនួននៅមានកម្រិត។
លោកស្រីបញ្ជាក់៖ «សេចក្តីប្រកាសនេះគឺដើម្បីហាមឃាត់រាល់ជនបរទេសទាំងអស់ មិនឲ្យរកស៊ីផ្ទាល់ខ្លួនក្នុងចំណោមមុខរបរទាំង ១០ ដូច្នេះមិនថា ចិន វៀតណាម ឬឥណ្ឌាទេ លែងរកស៊ីបានទៀតហើយដូចជាឥណ្ឌាដើរលក់មុង ដោយសារតែពេលប្រកាសនេះពួកគេនឹងត្រូវបានហាមឃាត់»។
លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានថ្លែងថាការសម្រេចរបស់ក្រសួងការងារនេះហាក់មានភាពយឺតយ៉ាវដែលបានធ្វើឲ្យជនបរទេសមួយចំនួនបានដណ្តើមការងារពីប្រជាពលរដ្ឋខ្មែរនៅមូលដ្ឋានដែលបានធ្វើឲ្យប៉ះពាល់ដល់ជីវភាពរបស់ពួកគាត់។
ប៉ុន្តែលោកបញ្ជាក់ថា៖ «វាមិនទាន់ហួសពេលទេ ដោយសារតែបច្ចុប្បន្ននេះយើងឃើញហើយនៅខេត្តព្រះសីហនុ ជនជាតិចិនបានដណ្តើមទីផ្សារពីអ្នកប្រកបមុខរបរ ក្រៅប្រព័ន្ធដូចជាលក់ចំណីអាហារ អ្នករត់កង ៣ និងតាក់ស៊ីអ្នកកាត់សក់ ដែលធ្វើឲ្យពួកយើងបាត់ប្រាក់ចំណូល...យើងសាទរចំពោះសេចក្តីប្រកាសនេះ»៕