Un nòu estudi economic fach pel banc alemand Deutsche Bank anoncia l’arribada d’un nòu cicle economic dempuèi 2020. Serà quora començarà la nòva edat de l’umanitat, tanben nomentada l’Edat del Desòrdre, segon lo quite estudi. E la causa principala ne serà la pandèmia de la COVID-19. Çò qu’es segur, pels cercaires alemands que signèron aquel estudi, es la fin de l’edat de la globalizacion e lo començament d’una nòva edat, totalament desparièra.
La còla d’economistas que faguèt aquel estudi foguèt dirigida per Jim Reid, un economista plan conegut del Deustche Bank. La fin d’una edat e lo començament d’una autra es segura per Reid: “L’edat de la globalizacion es a mand de finir (1980-2020) e la sieuna fin arribarà mai lèu pr’amor de la pandèmia, çò confirmèt Reid. Dempuèi ara se debanarà la naissença d’una autra edat per l’umanitat que serà plan desparièra de çò qu’avèm conegut fins ara”.
En mai, d’aquela nòva edat los cercaires que faguèron aquel estudi desseparèron l’epòca contemporanèa en fins a cinc edats diferentas: La primièra globalizacion (1860-1914), las grandas guèrras e la depression (1914-145), l’edat de Bretton Woods (1945-1971), l’edat de la nauta inflacion (1971-1980) e l’edat de la globalizacion totala (1980-2020). Segon aqueles cercaires ara començarà l’edat del Desòrdre (2020…)
Una nòva edat
Segon aquel estudi lo temps es totjorn desseparat en de cicles econòmics e la fin de l’edat de la globalizacion totala, totun, començèt ja de manièra clara en 2007. Lo crèdit bancari venguèt fatal per la classe mejana, çò diguèron. Se pòt pas pus donar mai credit e es estat agachat que la globalizacion es marrida. Per ansin, totes los païses aurèm d’interesses pròpris e diferents.
Lo nòu estudi economic del Deutsche Bank afirmèt que i auràn de mai en mai problèmas politics demest Estats Units e China pr’amor que China vòl tornar a aver lo luòc economic a la planeta que totjorn aguèt fins al sègle XIX, çò es lo 30% del PIB mondial (e que uèi es pròcha al 16%). Mas Estats Units vòl pas aquò pr’amor que daissariá d’èsser una superpoténcia mondiala.
A mai, 2020 poiriá èsser una decada decisiva per Euròpa pr’amor qu’ara serà quan demorarà amassa o, fin finala, se dessepararà. Lo desòrdre economic, segon aquel estudi, pòt pas èsser arrestat e sonque i auràn mai e mai problèmas politics en Euròpa mas tanben en defòra del continent. Lo deute serà de mai en mai naut mas tanben i aurà mai e mai argent produch per arrestar l’inflacion. Lo caos economic al mond financièr serà abitual. E aquò sonque a nivèl economic e politic pr’amor que “tanben i auràn de problèmas gigantasses coma la nauta tecnologia e lo cambiament climatic que l’umanitat deu salvar abans la fin de la dècada”.
La Redaccion
