Sangli Unlock : सांगली जिल्हा तिसऱ्या स्तरात, निर्बंधात शिथिलता; काय सुरु, काय बंद?

सांगली : कोविड पॉझिटिव्हिटी रेटनुसार सांगली जिल्हा तिसऱ्या स्तरात गेला आहे. त्यामुळे आजपासून जिल्ह्यात निर्बंधांमध्ये आणखी शिथिलता देण्यात येत आहे. सांगली जिल्ह्याचा मागील आठवड्यात पॉझिटिव्हिटी रेट 11 टक्के इतका होता. आठवडाभरात पॉझिटिव्हिटी दरात घट झाल्याने निर्बंध शिथिल करण्यात आले आहेत. आजचा पॉझिटिव्हिटी रेट 7.86 टक्के आहे. 14 जून 2021 रोजी सकाळी 5 वाजल्यापासून 21 जून 2021 सकाळी 5 वाजेपर्यंत हे निर्बंध लागू असतील.

कोविड पॉझिटिव्हिटी रेट आणि व्यस्त ऑक्सिजन बेड टक्केवारीनुसार राज्यातील जिल्ह्यांना 1 ते 5 स्तर (Level) मध्ये प्रतिबंधात्मक आदेश जारी करण्याबाबत निर्देश दिलेले आहेत. 10 जून 2021 रोजी संपणाऱ्या आठवड्याचा सांगली जिल्ह्यातील कोविड पॉझिटिव्हिटी रेट 5 टक्क्यांपेक्षा जास्त पण 10 टक्क्यांपेक्षा कमी आहे आणि व्यस्त ऑक्सिजन बेड टक्केवारी 25 टक्क्यापेक्षा जास्त पण 40 टक्क्यांपेक्षा कमी आहे. त्यामुळे राज्य सरकारच्या आदेशानुसार सांगली जिल्ह्याचा स्तर 3 (level 3) मध्ये आल्याने, या स्तराचे निर्बंध सांगली जिल्ह्यात लागू करण्याचे आदेश जिल्हाधिकारी डॉ. अभिजीत चौधरी यांनी जारी केले आहेत. 

नव्या निर्बंधांनुसार सांगली जिल्ह्यात कोणकोणत्या गोष्टींना सूट?

- अत्यावश्यक सेवेमध्ये समाविष्ट नसणारी सर्व दुकाने (सर्व बाजारपेठ, कापडपेठ, सराफपेठ) सोमवार ते शुक्रवार सायंकाळी 4 वाजेपर्यंत सुरु राहणार आहेत. 

- सर्व किराणा, भाजीपाला दुकान, फळ विक्रेते, दूध व दुग्धजन्य पदार्थ, डेअरी, बेकरी, मिठाई, पेट शॉप्स व सर्व प्रकारची खाद्य दुकाने (मटन, चिकन, पोल्ट्री, मासे आणि अंडी यांसह) सकाळी 7 ते सायंकाळी 4 वाजेपर्यंत सुरु राहतील. 

- जिल्ह्यातील सर्व अधिकृत भाजीमंड्या सकाळी 7 ते सायंकाळी 4 सुरु राहतील. जिल्ह्यातील शहर व ग्रामीण भागातील सर्व आठवडा बाजार मात्र बंद राहतील. 

- कृषी उत्पन्न बाजार समिती, फळ मार्केटमधील सर्व व्यवहार सकाळी 7 ते सायंकाळी 4  वाजेपर्यंत सुरु राहतील. 

- बियाणे, खते, शेतीविषयक उपकरणे व त्यांची दुरुस्तीची सेवा देणाऱ्या, तसेच पशुखाद्य दुकाने यांच्या आस्थापना सकाळी 7 ते सायंकाळी 4 वाजेपर्यंत सुरु राहतील.

काय सुरु?

- सर्व दुकानांना सोमवार ते शुक्रवार सकाळी 7 ते दुपारी 4 वाजेपर्यंत परवानगी

- जिल्ह्यात चित्रपट, मालिका चित्रीकरणाला परवानगी

- 50 टक्के क्षमतेने व्यवसाय करण्यास हॉटेल, रेस्टॉरंट, बारचालकांना परवानगी

- शासकीय,खासगी वाहतूक अत्यावश्यक सेवेतील सर्व व्यवहार नियमित सुरू राहणार

- सलून, जिम सुरु राहणार, क्रीडांगणे, मॉर्निंग वॉकसाठी सकाळी 9 पर्यंत परवानगी

- पूर्ववत राज्याबाहेरील परीक्षांना परवानगी

काय बंद?

- अत्यावश्यक सेवा वगळता इतर दुकाने शनिवार, रविवारी बंद

- शाळा, महाविद्यालये, खासगी क्लासेस बंद धार्मिक स्थळे, सिनेमागृहे, मॉल, जलतरण तणाव, सभागृह बंदच 

- भाजी मंडई वगळता सर्व आठवडा बाजारही बंदच राहणार

सांगलीत कोरोनाचे 8951 सक्रिय रुग्ण
सांगली जिल्ह्यात आजतागायत एकूण कोरोनाबाधितांची रुग्णांची संख्या 1 लाख 30 हजार 201 एवढी आहे. सध्या सक्रिय रुग्णांची संख्या 8 हजार 951 इतकी आहे. तर आतापर्यंत एकूण 3 हजार 738 जणांचा कोरोनामुळे मृत्यू झाला.