ភ្នំពេញ: ក្រសួងមហាផ្ទៃបានយល់ព្រមជាគោលការណ៍ឲ្យអតីតមន្ត្រី និងសកម្មជនមួយចំនួននៃអតីតគណបក្សសង្គ្រោះជាតិដែលទទួលបាននីតិសម្បទាធ្វើនយោបាយឡើងវិញឲ្យបង្កើតគណបក្សថ្មីមួយឈ្មោះ «ខ្មែរស្រឡាញ់ជាតិ» ដោយតម្រូវឲ្យតំណាងក្រុមនេះ រៀបចំឯកសារស្របតាមច្បាប់ ដើម្បីចុះបញ្ជីជាផ្លូវការ។
លិខិតឆ្លើយតបរបស់ក្រសួងមហាផ្ទៃបានធ្វើឡើងបន្ទាប់ពីតំណាងអតីតថ្នាក់ដឹកនាំមួយចំនួនរបស់អតីតគណបក្សសង្គ្រោះជាតិដែលដឹកនាំដោយលោក ខឺយ ស៊ីនឿន បានដាក់ពាក្យសុំបង្កើត «គណបក្សខ្មែរស្រឡាញ់ជាតិ» ដោយប្រើប្រាស់អក្សកាត់ គ.ខ.ស.ជ កាលពីថ្ងៃទី ៣០ ខែធ្នូ ឆ្នាំ ២០១៩ កន្លងទៅនេះ។
តាមលិខិតរបស់លោក ស ខេង រដ្ឋមន្ត្រីក្រសួងមហាផ្ទៃដែលបានផ្ញើទៅលោក ខឺយ ស៊ីនឿន តំណាងគណបក្សខ្មែរស្រឡាញ់ជាតិចុះថ្ងៃទី ៦ ខែមករាដែលភ្នំពេញប៉ុស្ដិ៍ទើបទទួលបានកាលពីម្សិលមិញសរសេរថា៖ «ក្រសួងមហាផ្ទៃ អនុញ្ញាតឲ្យបង្កើតគណបក្សខ្មែរស្រឡាញ់ជាតិ ឈ្មោះសរសេរជាអក្សរកាត់ (គ.ខ.ស.ជ) មានទីស្នាក់ការកណ្តាលតាំងនៅផ្ទះលេខ ១៧ បេ ១០ ផ្លូវលំ ភូមិទួលរកា ១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញស្របតាមបទប្បញ្ញត្តិដូចមានចែងក្នុងវាក្យខណ្ឌទី ១ មាត្រា ៩ នៃច្បាប់ស្តីពីគណបក្សនយោបាយ»។
ក្រសួងមហាផ្ទៃបញ្ជាក់ថា៖ «ដើម្បីទទួលបានសុពលភាព និងអាចធ្វើសកម្មភាពស្របតាមច្បាប់ស្តីពីគណបក្សនយោបាយ គណបក្សខ្មែរស្រឡាញ់ជាតិត្រូវស្នើសុំចុះបញ្ជីនៅក្រសួងមហាផ្ទៃស្របតាមវាក្យខណ្ឌទី ២ មាត្រា ៩ មាត្រា ១៤ ថ្មីមាត្រា ១៩ ថ្មី និងមាត្រា ២០ នៃច្បាប់ស្តីពីគណបក្សនយោបាយ»។
លោក ខឺយ ស៊ីនឿន តំណាងគណបក្សខ្មែរស្រឡាញ់ជាតិបានប្រាប់ភ្នំពេញប៉ុស្ដិ៍ពីម្សិលមិញថា លោកបានទទួលលិខិតនេះហើយ ដោយគ្រោងកោះអញ្ជើញសមាជិកស្ម័គ្រចិត្តទាំងអស់មកចូលរួមប្រជុំពិភាក្សាគ្នានៅសប្ដាហ៍ក្រោយ ដើម្បីរៀបចំបំពេញសំណុំបែបបទឲ្យស្របទៅតាមច្បាប់ស្ដីពីគណបក្សនយោបាយ ហើយឈានទៅដាក់ពាក្យចុះបញ្ជីនៅក្រសួងមហាផ្ទៃជាផ្លូវការ។
លោកបញ្ជាក់ថា៖ «បន្ទាប់មកទៀតយើងនឹងចុះទៅប្រមូលស្នាមមេដៃ ពលរដ្ឋឲ្យបានចំនួន ៤ ពាន់ស្នាមមេដៃ ហើយចែងលក្ខន្ដិកៈផ្ទៃក្នុងបក្សព្រមទាំងបែងចែករចនាសម្ព័ន្ធបក្ស និងគោលនយោបាយជាដើម។ ចំពោះការប្រមូលស្នាមមេដៃ ៤ ពាន់នាក់នេះ ខ្ញុំយល់ថា មិនពិបាកទេគឺយើងយកពីអ្នកគាំទ្រអតីតគណបក្សសង្គ្រោះជាតិដែលពួកគាត់នឹងនៅបន្តគាំទ្រយើងទៀត»។
លោក ស៊ីនឿន បន្ថែមថាគណបក្សខ្មែរស្រឡាញ់ជាតិនឹងនៅបន្តស្មារតីសង្គ្រោះជាតិដោយគ្រប់បេសកកម្ម និងចក្ខុវិស័យក៏ដូចជាកិច្ចការមួយចំនួនទៀតដោយដកស្រង់បទពិសោធចេញពីអតីតគណបក្សសង្គ្រោះជាតិ និងមួយចំនួនទៀតនឹងត្រូវធ្វើកំណែទម្រង់ទៅតាមស្ថានភាពនយោបាយបច្ចុប្បន្ន។
ម្យ៉ាងទៀតលោកមើលឃើញថា ក្រុមអ្នកស្នេហាប្រជាធិបតេយ្យបានបែកបាក់គ្នាយ៉ាងខ្លាំង ហើយគណបក្សនេះនឹងប្រកាន់គោលការណ៍អហិង្សា កៀរគរអ្នកប្រជាធិបតេយ្យ និងធ្វើនយោបាយតាមការកំណត់របស់រដ្ឋធម្មនុញ្ញកម្ពុជា។
លោក ឡៅ ម៉ុងហៃ អ្នកវិភាគនយោបាយយល់ឃើញថា ការបង្កើតគណបក្សថ្មីនេះ គឺវាមិនមានអ្វីគួរឲ្យកត់សម្គាល់ទេ ដោយលោកថា វាគ្រាន់តែជាការប្រើប្រាស់សិទ្ធិចូលរួមក្នុងសកម្មភាពនយោបាយប៉ុណ្ណោះ។
លោក ម៉ុងហៃ បញ្ជាក់ថា៖ «វាគ្មានតម្លៃអ្វីទេ ហើយវាគ្រាន់តែជាករណីធម្មតាៗ។ ខ្ញុំគ្មានយោបល់អ្វីជុំវិញករណីនេះទេ ដោយរង់ចាំមើលទាំងអស់គ្នាសិនទៅ»។
ក្រុមថ្នាក់ដឹកនាំ អតីតគណបក្សសង្គ្រោះជាតិដែលចូលរួមបង្កើតគណបក្សថ្មីនេះរួមមាន លោក ជីវ កត្តា, លោក ស៊ឹម សុវណ្ណនី, លោក កង គឹមហាក់, លោក តាន់ ទីន, លោក ខឺយ ស៊ីនឿន និងអ្នកចូលរួមស្ម័គ្រចិត្តមួយចំនួនទៀត៕