លោកនាយករដ្ឋមន្រ្តី ហ៊ុន សែន នឹងទៅបំពេញទស្សនកិច្ចនៅប្រទេសជប៉ុនចាប់ពីថ្ងៃសុក្រចុងសប្ដាហ៍នេះ ដើម្បីចូលរួមវេទិកាទឹកពិភពលោក និងដើម្បីចុះហត្ថលេខាលើឯកសារមួយចំនួន។
ប្រមុខរដ្ឋាភិបាលបានប្រកាសនៅក្នុងពិធីសម្ពោធដាក់ឱ្យដំណើរការគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញជំហានទី៤ នៅព្រឹកថ្ងៃពុធ ទី២០ ខែមេសានេះថា នៅក្នុងអំឡុងពេលដំណើរទស្សនកិច្ចនៅប្រទេសជប៉ុនរយៈពេលពីរថ្ងៃ ចាប់ពីថ្ងៃទី២២ ដល់ថ្ងៃទី២៤ ខែមេសានេះ លោកនឹងជួបពិភាក្សាជាមួយនាយករដ្ឋមន្រ្តីជប៉ុន លោក ហ្វូមីអុ គីស៊ីដា (Fumio Kishida) ដើម្បីចុះហត្ថលេខាលើឯកសារមួយចំនួន។ បន្ទាប់មក លោកនឹងចូលរួមវេទិកាទឹកពិភពលោកផងដែរ។
លោកនាយករដ្ឋមន្ត្រីបន្តថា បន្ទាប់ពីបញ្ចប់ទស្សនកិច្ចនៅប្រទេសជប៉ុនភ្លាម លោកនឹងវិលត្រលប់មកកម្ពុជាវិញនៅថ្ងៃទី២៤ ខែមេសា ដោយថានឹងទទួលជួបអតីតមេបញ្ជាការប្រតិបត្តិការរបស់អ៊ុនតាក់ ដែលបំពេញបេសកកម្មនៅកម្ពុជាកាលពីទសវត្សរ៍ឆ្នាំ១៩៩០ផងដែរ។
កម្ពុជា និងជប៉ុន កំពុងស្ថិតនៅលើផ្លូវឆ្ពោះទៅការប្រារព្ធខួប៧០ឆ្នាំនៃទំនាក់ទំនងការទូតនៅឆ្នាំ២០២៣ខាងមុខនេះ បន្ទាប់ពីប្រទេសទាំងពីរបានភ្ជាប់ទំនាក់ទំនងការទូតជាផ្លូវការនៅថ្ងៃទី៩ ខែមករា ឆ្នាំ១៩៥៣។ កាលពីថ្ងៃទី២០ ខែមីនា កន្លងទៅ នាយករដ្ឋមន្ត្រីជប៉ុន លោក ហ្វូមីអុ គីស៊ីដា (Fumio Kishida) ក៏បានមកបំពេញទស្សនកិច្ចនៅកម្ពុជាផងដែរ៕