កម្ពុជា និងសាធារណៈរដ្ឋកូរ៉េ បានពិភាក្សាគ្នាអំពីសក្តានុពលពាណិជ្ជកម្មរវាងប្រទេសទាំងពីរ ជាពិសេសគឺការនាំចូលផ្លែស្វាយរបស់កម្ពុជា។
ការពិភាក្សានេះធ្វើឡើងរវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក Gyuhwa Jang អនុប្រធានសមាគមអ្នកនាំចូលកូរ៉េ (KOIMA) និងកញ្ញា Yu Lin ប្រធានក្រុមហ៊ុន GADOSH Korea Co., Ltd. នៅទីស្តីការក្រសួងកាលពីរសៀលម្សិលមិញ។
លោក Jang បានជម្រាបប្រាប់លោករដ្ឋមន្ត្រីអំពីសាវតារបស់សមាគមអ្នកនាំចូលកូរ៉េ KOIMA ដោយលោកបានបន្ថែមថា សមាគមនេះមានក្រុមហ៊ុនប្រហែល ១៥,០០០ក្រុមហ៊ុន ដែលវិនិយោគលើគ្រប់វិស័យ។
ចំណែកលោកស្រី Lin បានជម្រាបជូនលោក សូរស័ក្តិ អំពីបំណងរបស់ក្រុមហ៊ុន GADOSH ក្នុងការនាំចូលផ្លែស្វាយយ៉ាងតិច ១០,០០០ តោនក្នុងមួយឆ្នាំ ពីប្រទេសកម្ពុជា ។
ជាការឆ្លើយតប លោក សូរស័ក្តិ បានវាយតម្លៃខ្ពស់អំពីទំនាក់ទំនងល្អរវាងក្រសួង និងក្រុមហ៊ុន KOIMA រហូតមកដល់ពេលនេះ និងបានបញ្ជាក់ពីកិច្ចខិតខំប្រឹងប្រែងរបស់ក្រសួងក្នុងការកែលម្អបរិយាកាសធុរកិច្ចនៅកម្ពុជា។
លោករដ្ឋមន្ត្រីបានលើកឡើងបន្ថែមទៀតអំពីការត្រៀមខ្លួនរបស់ក្រសួងក្នុងការគាំទ្រ និងសម្រួលដល់ពាណិជ្ជករក្នុងការធ្វើអាជីវកម្មនៅកម្ពុជា និងបានលើកទឹកចិត្តឱ្យភាគីកូរ៉េសិក្សាពីលទ្ធភាពនៃការនាំចូលផលិតផលកសិកម្មដ៏មានសក្តានុពលផ្សេងទៀតរបស់កម្ពុជា ដូចជា ផ្លែមាន និងចេក បន្ថែមលើផ្លែស្វាយ។
លោក សូរស័ក្តិ ក៏បានស្នើដល់វិនិយោគិនកូរ៉េក្នុងការវិនិយោគបង្កើតរោងចក្រកែច្នៃកសិកម្មសម្រាប់ការនាំចេញទៅកាន់ទីផ្សារអន្តរជាតិ។ L Vy – ទីភ្នាក់ងារសារព័ត៌មានកម្ពុជា AKP