【獨媒報導】足總今季組成香港 U23 參加港超聯，記性好的球迷一定記得，十多年前有一支「香港08」為備戰北京奧運，目的同為培訓年輕球員。今年36歲的陳銘剛，便曾是「香港08」成員，他的職業足球員之路不平坦；曾經三進三出本地球壇，期間試過投考消防員，又做過銀行櫃檯，但最愛的終究是足球。陳銘剛在5年前一手創辦球隊 Konter「港峰」，這名熱血教練接受《獨媒》訪問，矢志留在香港教波，培養下一代球員：「我揀咗足球，足球亦都揀咗我。」
25年前，11歲的陳銘剛加入香港體育學院受訓，25年後，陳銘剛的 Konter「港峰」已擁有六支梯隊，今季更參加賽馬會青少年聯賽；並將向足總申請會藉，征戰丙組足球聯賽。
從前的隊友都叫他「肥剛」，「我踢波真係唔叻，但我比所有人都更著緊踢波呢件事」。前季約滿理文，由港超聯轉投港甲深水埗，陳銘剛踢而優則教。他現在像校長多於教練，要為 Konter「港峰」打點一切，安排訓練場地、和家長溝通、照顧及管理一班年輕球員，更彷彿像人生導師；戰術和排陣倒較少參與。
Konter「港峰」目前已有六支梯隊
加入體院即遇足球部解散
1996年加入體院時，足球仍為精英運動員項目，跟「肥剛」同期訓練的有盧均宜、張健峰、陳思榮、呂志興、葉志豪和李恆匯等人。一班年輕球員會獲安排到日本交流，出外訓練令陳銘剛更快自立起來。
由於國際賽成績欠佳，加上資源重新分配，足球被剔除精英運動員項目。有一天，體院教練李展鵬對學員說：「足球部要取消了，遲幾年我哋會有將軍澳足球基地。」結果，那一遲足足遲了22年，賽馬會香港足球總會足球訓練中心在2018年9月啟用。
在2012年，陳銘剛曾接受《獨媒》訪問，講述創辦工廈足球場 Isoccer，「個陣啲人問我點解搞呢度，就係因為仲未有將軍澳。」
體院足球部解散，那些年不比今天，沒有太多甚麼足球學校。 13歲的陳銘剛在一年後加入流浪青年軍，命運自有安排。透過體院，聖約瑟書院的校長相中了陳銘剛，他一下子由屋邨仔成為名校生。
由石硤尾轉校到半山，一下子由地球升上火星，初時的課堂，陳銘剛一句英文都聽不明，最後重讀中一。在中四那年，陳銘剛跟教練踢丙組地區聯賽的「香港學界」，兩年後向李展鵬自薦加入「香港08」。
陳銘剛是教練，但更像是年輕球員的人生導師
讀到書就有得揀 曾到南華任學徒
媽媽曾跟他說：「你讀到書就有得揀，你讀唔到書，就一定要出嚟做嘢。」陳銘剛踢了一年「香港08」，替球隊取得乙組聯賽冠軍，但足總說這隊不升班，並和康文署推出職業學徒計劃，一眾球員被分配到不同球隊。
謝德謙、梁振邦被派到公民，陳銘剛則獲派到南華，終於一睹大佬級偶像岑國培、丘建威等人，「老實講，去到只係教你點做一個細路，連剛剛上山嘅鄭少偉都係跟操，我唔入流吧」。每逢星期六的練習後，一眾學徒涼都未沖便要去煮早餐給大佬們食，然後便是打掃、洗衫等，「諗返轉頭，係學識紀律同尊重」。
重讀中五升上中六，陳銘剛只為南華踢了幾場預備組，適逢香雪製藥退出，足總重新召集一眾學徒球員接手；這是「香港08」的威力加強版，並由黎新祥任主教練。17歲的陳銘剛初次在旺角大球場登場，他走堂去跟首場職業足球聯賽，正選兼贏公民，「一分1,000蚊，三分就3,000啦，3,000蚊對一個中六學生嚟講係好多」。
升讀城大工商管理副學士，陳銘剛如同全職踢波，兼職讀書。讀了五年大學，亦踢足五年足球，他第一年副學士近乎沒有上堂，「香港08」、奧運和城大校隊，每日練三課；讀到書真係有得揀，聽媽媽的話，果然沒錯。
「香港08」一代撐起球壇 「年輕球員唔會自己爆出嚟」
在奧運外圍賽中，「香港08」同組的對手是敘利亞、日本和馬來西亞，香港最後只在作客擊敗馬來西亞，其餘比賽均落敗收場。日本隊中球員是本田圭佑、水野晃樹、李忠成和家長昭博等人，香港更遭本田圭佑罰球直射入網，陳銘剛還記憶猶新。
陳銘剛提到，全華班的「香港08」很開心，一眾年輕球員齊上齊落。「入籍兵唔係唔好，技術體能可能係好，但成個戰術同體系係要建立啲咩先？呢個係要問。有時會問，華人同你搏，定入籍兵會同你搏？大家心知肚明。足球係一件凝聚力嘅事情，唔係淨係贏波，而係 gather 到一班人。我有時會諗，都衰咗咁多年，點解唔釜底抽薪呢？當然我可能 small potato，但唔試又點知呢？」
作為過來人，陳銘剛認為青年隊的意義很大：「無呢個平台（香港08），歐陽耀冲、阮健文、劉念溢、曾錦濤甚至陳文輝係無機會踢；其實係撐起咗球壇。香港21、22歲叫年輕球員？其實好奇怪，16、17歲已經係吧。根本香港球隊唔會配合代表隊，人哋日本嘅 U23 已經係球會正選。」
「你永遠唔知一件事之後嘅影響，我覺得李志堅同呢幾年愉園都係嘗試複製呢件事（香港08）。你要明白，年輕球員唔會自己爆出嚟。」
載浮載沉 天水圍飛馬奠名聲
離開「香港08」，陳銘剛和馮啟匡轉投公民，月薪有6,000元，「完全另一個世界，要爭囉」。初出茅廬的陳銘剛在公民沒有上場機會，這對他一下子很大打擊。
翌季轉投由鄺曉明接手的愉園，「我覺得真係要踢，再坐就係係咁多」。陳銘剛輕鬆成為愉園正選，有一日的練習後，球隊上下被邀請到足總辦公室，原來廉政公署人員早已在恭候。調查主任問到，球隊有何古怪和為甚麼常常輸波，陳銘剛又是苦笑：「其實都聞到陣味，但我真係要踢。」
在該賽季後，陳銘剛去了西藏旅行散心，回家便接到恩師黎新祥去世的消息。陳曉明致電給陳銘剛，邀請加盟天水圍飛馬。兩季下來，為飛馬四出比賽，陳銘剛奠下了名聲。對於職業足球員這個身份，他樂在其中。
9年前創辦工廈足球隊和拍檔接受獨媒訪問
失意南區 辦全港首個工廈足球場
在這其間，陳銘剛完成學位課程，家人認為大學畢業等如「玩夠啦」，喚他不如搵份工。陳銘剛去過應徵消防隊目，到了第三關的筆試時，他沒有去考試。「嗯，我覺得都係想踢。」
然而，天水圍飛馬最後只奪得三亞王，領導層離場，陳銘剛又得思考去向。那邊廂和南區簽約，太陽集團這邊便宣布接手飛馬。
福無雙至，禍不單行，陳銘剛和南區意見不合，人事問題令他悶悶不樂，他便膽粗粗和朋友跑了去搞全港首個工廈的室內5人足球場，「嗰年衰咗，覺得自己要多把刀」。這個工廈足球隊，贏得不俗的口碑。球場運作了兩年多，業主提出加租三倍，「我其實爭少少就打和」。
縱使 Isoccer 最後停運，但陳銘剛念念不忘，他在2016年和朋友成立「Konter」，構建能讓球員、教練和家長一起發展可持續足球的平台。
和南區解約後，越想越不甘心，陳銘剛主動向流浪叩門，又給他成功延續職業足球員生命。「重返」流浪第一季的表現不俗，第二季卻又失去正選，或許人生就是如此。陳銘剛跑了去做銀行櫃檯，匯豐的上司還問過他「升唔升職」，誰知他一口拒絕：「我想5點收工，6點半去教波，你一升我就要遲收工。」
離開匯豐接受馮凱文邀請加盟理文
「我唔想成為一個無故事的人」
在一個球季後，馮凱文找他加盟理文流浪，球隊更替他賠一個月人工，他用了兩小時考慮便立刻答應：「嗯，我同自己講，31歲啫，試多次啦。我忍受夠白燈。」
「『你都算奇，你咁 junior 嘅 post 都賠錢走。』」上司話雖如此，但都替他感到高興。「三出三入，我揀多次都會咁做。如果做銀行，我可以做廿年㖭。但我唔想穩定呀，我想 make something different。」
「我唔想成為一個無故事的人，淨係朝九晚五打工仔。喺球場搵到存在意義，覺得有價值，喺匯豐只會係一個齒輪。」
「計錢真係唔會揀踢波，俗啲講，撈偏都多過踢波吧。」「我唔大洗，無惡習又無乜嗜好，嗰人都幾悶，勉勉強強夠用囉。」肥剛早在小學記念冊已寫上，希望能做職業足球員。「其實係 born to be，出過去做嘢，再返嚟呢個行業，你係會知道自己真係好鍾意呢個行業（足球）。」
毋忘黎新祥教誨 家長支持捱過疫情
陳銘剛自小便不想成為別人眼中的波牛，「我其實唔係咁球員」，紋身亦是近幾年的事。現為亞洲足協B級教練，陳銘剛一直希望到外地考取A牌。
「作為教練唔係淨係教，黎 sir 係會將你擺入心。如果無個心，係唔會咁著緊去做。佢最肉緊就係歐沖。佢對球員係苦口婆心，錫你但又唔講出嚟。」「魔鬼教練」黎新祥一直影響陳銘剛至今，他一直不敢忘記恩師的教誨，尤其做人必須敢言，「啱就係啱，唔啱就唔啱」。
去年一場疫情，足球教練手停口停，陳銘剛一度零收入，他曾想過要轉行，試過揸 Uber，又試過送貨。「今次如果離開，就真係走。市道咁差。我同自己講，如果捱到呢次，就係食到呢行飯。」最後令他堅持下去的，是家長的勉勵和支持。
關心時事 「如果走咗，就咩都改變唔到」
陳銘剛一直關心時事，雨傘和反送中運動均有他的影子，他對記者強調，「我係出去睇吓發生咩事，唔想信電視，所以要出去睇。」陳銘剛不諱言，曾想過離開香港，近年的教育令他尤感沮喪，「但如果我喺度，可能改變到一啲嘢。如果走咗，就咩都改變唔到。」
「依家社會發生緊嘅嘢，唔好再同自己講係正常喇。我哋不如試下改變一啲我哋能力範圍以內嘅嘢。」
教練工作排得密密麻麻，陳銘剛每星期就是往來九龍仔、將軍澳等球場，他既攰但又感享受，認為工作很有使命感。「好天曬，落雨淋。前排返到屋企先知自己 overload 咗，但真係唔會覺得唔開心。OK，我可以。」
記者：麥馬高、周頌謙