កាលពីថ្ងៃសៅរ៍ កម្ពុជាទទួលបានវ៉ាក់សាំង Sinovac ចំនួន ១២៤.៨០០ ដូស។ រហូតមកដល់ពេលនេះ កម្ពុជាទទួលបានវ៉ាក់សាំងសរុបចំនួន ២,៥ លានដូសនៃការគ្រោងទុកចំនួន ៦,៦ លានដូសពីយន្តការ COVAX។
លោកស្រី Foroogh Foyouzat តំណាងអង្គការយូនីសេហ្វប្រចាំកម្ពុជា និងតំណាង COVAX Facility បាននិយាយថាផែនការនេះគឺនឹងផ្តល់វ៉ាក់សាំងសរុបចំនួន ៦,៦ លានដូសដល់ប្រទេសកម្ពុជា។
លោកស្រីបន្តថា Covax នឹងបន្តផ្តល់ការដឹកជញ្ជូនវ៉ាក់សាំងទៅតាមការគ្រោងទុករបស់រដ្ឋាភិបាល។
លោកស្រីបានឲ្យដឹងថា៖ «ដូចដែលយើងបានដឹងហើយថារដ្ឋាភិបាលបានចាក់វ៉ាក់សាំងការពារជំងឺកូវីដ-១៩ ដល់ប្រជាជនមួយចំនួនធំរួចទៅហើយ ដូច្នេះជំហានបន្ទាប់គឺផ្តល់វ៉ាក់សាំងប្រភេទផ្សេងៗគ្នាសម្រាប់ប្រើប្រាស់ក្នុងយុទ្ធនាការចាក់វ៉ាក់សាំងដូសជម្រុញតាមផែនការរបស់រដ្ឋាភិបាល។ ដូច្នេះ វ៉ាក់សាំងបន្ទាប់គឺជាការសហការគ្នាក្នុងការសម្របសម្រួលជាមួយរដ្ឋាភិបាល ក៏ដូចជាក្រសួងសុខាភិបាល»។
លោកស្រីបន្ថែមថា៖ «យើងមើលឃើញថារដ្ឋាភិបាលកម្ពុជាបានវិនិយោគទៅលើការបញ្ជាទិញវ៉ាក់សាំងការពារជំងឺកូវីដ-១៩ ពីប្រទេសផ្សេងៗព្រមទាំងជំនួយទ្វេភាគីជាមួយប្រទេសដទៃទៀត។ ជាលទ្ធផល យើងឃើញថាប្រជាជនជាង ៩០% បានចាក់វ៉ាក់សាំងប្រឆាំងនឹងជំងឺកូវីដ-១៩ ដូច្នេះនេះគឺជាការជោគជ័យដ៏ធំមួយ»។
លោកស្រី Li Ailan តំណាងអង្គការសុខភាពពិភពលោក (WHO) បាននិយាយថាកម្ពុជាបានបំពេញការងារយ៉ាងល្អក្នុងការប្រយុទ្ធប្រឆាំងនឹងជំងឺកូវីដ-១៩ រួមទាំងការផ្តល់វ៉ាក់សាំងដល់ប្រជាជន។
លោកស្រីបន្តថាកម្ពុជាជាប្រទេសឈានមុខគេមួយក្នុងពិភពលោក និងតំបន់អាស៊ីប៉ាស៊ីហ្វិកក្នុងការផ្តល់វ៉ាក់សាំងដល់ប្រជាជនងាយរងគ្រោះ និងជាពិសេសដល់ក្រុមងាយរងគ្រោះ រួមទាំងបុគ្គលិកសុខាភិបាលនៅជួរមុខ ដែលប្រឈមនឹងការឆ្លងជំងឺកូវីដ-១៩ ជារៀងរាល់ថ្ងៃ។
លោកស្រីបន្ថែមថាយន្តការ COVAX បានផ្តល់វ៉ាក់សាំងដែលមានសុវត្ថិភាព និងប្រសិទ្ធភាពដល់ប្រទេសនានារួមទាំងកម្ពុជា ដោយផ្អែកលើវ៉ាក់សាំងសកលដែលមានសក្តានុពល និងផែនការវ៉ាក់សាំងជាតិ ក៏ដូសជាសមត្ថភាពសម្រាប់ការចាក់វ៉ាក់សាំងដែលរួមមានការអនុញ្ញាតឲ្យប្រើប្រាស់បន្ទាន់ (EUL)។
លោកស្រីថារហូតមកដល់ពេលនេះ កម្ពុជាបានទទួលវ៉ាក់សាំងរបស់អង្គការសុខភាពពិភពលោកដែលមានក្នុងបញ្ជី EUL ចំនួនបីប្រភេទក្រោយយន្តការ COVAX រួមមាន AstraZeneca, Johnson & Johnson និង Sinovac។
លោកស្រីលើកឡើងថាបច្ចុប្បន្ន កម្ពុជាកំពុងប្រើប្រាស់វ៉ាក់សាំង WHO EUL ចំនួន ៤ ប្រភេទ។ ដែលជាការសម្រេចរបស់រដ្ឋាភិបាលផ្អែកលើការត្រៀម និងសម្របខ្លួនសម្រាប់វ៉ាក់សាំងដទៃទៀតនៅថ្ងៃអនាគត រួមទាំងវ៉ាក់សាំង Sinopharm ដែលមិនទទួលបានតាមរយៈយន្តការ Covax ។
លោកស្រីថា WHO ប្តេជ្ញាយ៉ាងពេញទំហឹង និងបន្តធ្វើការយ៉ាងជិតស្និទ្ធជាមួយក្រសួងសុខាភិបាល គណៈកម្មាធិការស្រាវជ្រាវកូវីដ-១៩ និងដៃគូនានា រួមទាំងអង្គការយូនីសេហ្វ ដើម្បីគាំទ្រដល់ការដាក់ឲ្យប្រើប្រាស់នូវវ៉ាក់សាំងកូវីដ-១៩ និងលើសពីនេះទៀត។
លោកស្រីនិយាយថាបច្ចុប្បន្ន កម្ពុជាកំពុងស្ថិតក្នុងដំណាក់កាលថ្មីនៃការធ្វើផែនការកែសម្រួល និងទ្រទ្រង់ការឆ្លើយតបចំពោះជំងឺកូវីដ-១៩ រយៈពេលវែងដើម្បីជួយសង្គ្រោះជីវិតជៀសពីបន្ទាត់ក្រហម និងការពារជនងាយរងគ្រោះ ខណៈអនុញ្ញាតឲ្យមានការបើកដំណើរការសេដ្ឋកិច្ច និងសង្គមឡើងវិញប្រកបដោយសុវត្ថិភាព និងការទទួលខុសត្រូវ។
លោកស្រីក៏បាននិយាយផងដែរថាដំណើររបស់ប្រទេសកម្ពុជា ដើម្បីរៀនពីរបៀបរស់នៅជាមួយមេរោគ និងរបៀបធានាទាំងជីវិត និងជីវភាពមានមហិច្ឆតា ប៉ុន្តែអាចទៅរួច។ ដោយវាទាមទារការប្រឹងប្រែងរបស់អ្នករាល់គ្នា។
លោកស្រីបន្តថា៖ «យើងទាំងអស់គ្នាចូលរួមចំណែករបស់យើង ដើម្បីបន្តការចាក់វ៉ាក់សាំងឲ្យបានពេញលេញ និងអនុវត្តវិធានការសុខភាពសាធារណៈដើម្បីទប់ស្កាត់ជំងឹកូវីដ-១៩។ ជំងឺរាតត្បាតមិនទាន់បញ្ចប់នៅឡើយទេ ហើយមេរោគនេះនៅតែបន្តរីករាលដាលនៅក្នុងសហគមន៍ទាំងនៅកម្ពុជា និងប្រទេសជាច្រើនទៀត»៕