ក្រុមស្រាវជ្រាវសត្វព្រៃ នៃមន្ទីរបរិស្ថានខេត្តមណ្ឌលគិរី ក្រសួងបរិស្ថាន និងអង្គការ WWF នៅសប្តាហ៍នេះ បានបង្ហាញរូបថតដ៏កម្រមួយរបស់ខ្លារខិនញីឥណ្ឌូចិន ពីការអង្កេតតាមកាមេរ៉ារបស់ពួកគេ ដែលធ្វើឡើងនៅក្នុងព្រៃនៃវាលទំនាបភាគខាងកើតនៃប្រទេសកម្ពុជា។
យោងតាមសេចក្តីប្រកាសព័ត៌មានរបស់អង្គការ WWF នៅលើប្រព័ន្ធផ្សព្វផ្សាយសង្គមរបស់ខ្លួន ខ្លារខិនឥណ្ឌូចិន ដែលត្រូវបានចុះបញ្ជីថាជាសត្វជិតផុតពូជនៅក្នុងបញ្ជីក្រហមរបស់អង្គការ IUCN បានបាត់ខ្លួនពីស្ទើរតែគ្រប់ពូជរបស់វានៅទូទាំងអាស៊ីអាគ្នេយ៍។
ទីវាលទំនាបភាគខាងកើតរបស់ប្រទេសកម្ពុជានៅតែជាជម្រកចុងក្រោយសម្រាប់ចំនួនចុងក្រោយដែលត្រូវបានគេស្គាល់តិចតួចប៉ុណ្ណោះ។ ទោះបីជាយ៉ាងណាក៏ដោយ សត្វមំសាសីដ៏កម្របំផុតនេះត្រូវបានគំរាមកំហែងនឹងការផុតពូជដោយវិបត្តិអន្ទាក់ ដែលជំរុញដោយការជួញដូរសត្វព្រៃខុសច្បាប់។
ខ្លារខិនឥណ្ឌូចិនអាចប្រឈមមុខនឹងវាសនាដូចគ្នានឹងខ្លាឥណ្ឌូចិនដែលផុតពូជរួចទៅហើយ ដោយសារចំនួនតិចតួចបំផុតរបស់វាដែលនៅសល់ក្នុងប្រទេសកម្ពុជា ប្រឈមនឹងហានិភ័យខ្ពស់នៃការជាប់អន្ទាក់ដែលលាក់នៅក្នុងជម្រកព្រៃរង់ចាំស្ទាក់ចាប់ហ្វូងសត្វ និងប្រភេទសត្វព្រៃធំៗដែលរងការសម្លាប់ដោយមិនរើសមុខ។
ក្រៅពីនេះ លទ្ធផលអង្កេតក៏បានបង្ហាញពីវត្តមានសត្វព្រៃមួយចំនួនដែលរួមមានជ្រូកព្រៃ ក្តាន់ និងសត្វក្តាន់សំាបា ដ៏កម្រ ព្រមទាំងសត្វស្លាប និងសត្វស្វា។
ដើម្បីដោះស្រាយវិបត្តិនេះ តួអង្គសំខាន់ៗមកពីក្រសួងពាក់ព័ន្ធរបស់រដ្ឋាភិបាល និងអង្គការអភិរក្សអន្តរជាតិបានចាប់ផ្តើមយុទ្ធនាការអន្ទាក់សូន្យ (Zero-Snaring) នៅក្នុងតំបន់ការពាររបស់កម្ពុជាកាលពីដើមខែមីនា ឆ្នាំ២០២២ ហើយបានប្តេជ្ញាចិត្តរួមគ្នាក្នុងការបញ្ចប់វិបត្តិការដាក់អន្ទាក់ និងការជួញដូរសត្វព្រៃខុសច្បាប់សម្រាប់អនាគតរបស់ប្រជាជនកម្ពុជា និងសត្វព្រៃ។ ហេង បញ្ញា – ទីភ្នាក់ងារសារព័ត៌មានកម្ពុជា AKP