仲有唔到一個月就到聖誕節啦！想同屋企人及家中毛孩一齊過一個別具意義又暖笠笠嘅聖誕節，就唔好錯過以下推介嘅社企聖誕美食同工作坊啦。
聖誕節唔想出街同人逼又唔想自己煮嘅話，揾社企幫手啦！社企良膳廚坊推出多款聖誕節美食到會（按此訂購），佢哋嘅烤焦糖菠蘿BBQ醬豬肋骨伴香辣薯角、香甜柚子蜜焗雞中翼，同埋蜜糖芥末籽燴鹹豬手就最受歡迎啦。雖然佢哋嘅食物聽落去好惹味，但係其實食物都係以少鹽少油為準則，而且價錢大眾化。套餐由4人至30人都有，配合唔同家庭、學校、公司派對嘅需求，實有一款啱你哋。
（左下）烤焦糖菠蘿BBQ醬豬肋骨伴香辣薯角，（左上）意大利雜果奶凍，（右）黑松露碎蛋沙津迷你撻
（左）香甜柚子蜜焗雞中翼，（右）蟹子火腿粟米薯仔雜果沙津
（左）蜜糖芥末籽燴鹹豬手伴香辣薯角，（右）蒜子牛肝菌雜菌忌廉燴雞
如果食完番尋味，仲可以買佢哋嘅餸菜包，有小食、主食、湯、甜品共20款選擇，全部不含防腐劑，真空保存，用滾水或者微波爐加熱就食得，咁就隨時隨地都食到美味又健康嘅食品啦。
（前）DIY薑餅人套裝包括朱古力筆，可以畀大家發揮創意，（後）亦有雜錦曲奇禮盒
聖誕節嘅節目又點少得同小朋友喺屋企一齊動動手整薑餅人呢？咁就要買良膳廚坊嘅DIY薑餅人套裝（按此訂購）啦！佢哋嘅套裝包6塊全人手製作、獨立包裝嘅薑餅人曲奇同兩支朱古力筆，想點畫就點畫。送禮就可以考慮雜錦曲奇聖誕禮盒（按此訂購），裡面有雜果仁、燕麥、朱古力、綠茶四款口味嘅曲奇，同樣係人手製作，微甜鬆脆。
良膳廚坊主廚阿駒之前喺另一間社企嘅餐廳同中央工場分別工作兩年同三年，中、西菜式都難唔到佢
薑餅人同雜錦曲奇都係由一班婦女手工製作。經過良膳廚坊主廚阿駒嘅悉心指導，一班弱勢婦女及退休人士學會點樣準備食材同烹調食物，部份婦女經過訓練後，仲由初入職時嘅助理廚師逐漸升到二廚，直情可以獨當一面！良膳廚坊更有「孤長開飯」計劃，每逢星期六、日提供膳食畀獨居或有需要嘅長者，真係好有意義。
良膳廚坊喺2014年由香港循理會成立，透過提供餐飲到會服務、學校午膳供應、企業及團體餐膳、盤菜及烘焙等製作，為弱勢社群提供工作機會及在職培訓，希望幫佢哋由接受幫助轉為回饋社會，從中提升自信，體現助人自助嘅精神。
良膳廚坊
地址：屯門建泰街6號恒威工業中心A2座5樓506-508室
訂購網站：https://fantastickitchen.store/
The Project Futurus 聖誕大餐配朱古力蛋糕軟餐製作班
聖誕節嘅應節美食又點少得火雞？但對於有咀嚼或者吞嚥困難嘅老人家嚟講，可能就唔方便進食。有見及此，社企The Project Futurus旗下嘅軟餐俠就舉辦聖誕節特別呈獻：聖誕大餐配朱古力蛋糕軟餐製作班（詳情按此），當中包括軟餐文化介紹同軟餐製作兩大部分。
製作班包括軟餐文化簡介、食材計算及應用、軟餐造型技巧、親手製作軟餐等，幫助大家喺短時間內了解軟餐同製作過程
製作軟餐其好簡單，主要步驟係將食材打碎，加入軟餐酵素粉，煮至流質最後等待凝固。The Project Futurus創辦人Queenie就特別提提大家，製作軟餐前要先評估及了解患者嘅咀嚼及吞嚥能力，再決定軟餐嘅軟硬度同質感。而呢種選用酵素粉製作軟餐嘅技術喺日本已經發展咗超過20年，可以將所有食材製作成原汁原味原形嘅軟餐，只要把握好水分同酵素嘅比例去控制口感，老人家都可以安心同枱享用美食。
選用日本酵素粉製作軟餐，能夠盡可能還原食材原汁原味，賣相亦更吸引
聖誕大餐包括燒雞、西蘭花、椰菜花同甘筍，色香味俱全，朱古力蛋糕更以果汁花點綴
製作軟餐其中一個目的係令享用嘅人可以食得更滋味，因此設計軟餐時會考慮埋賣相，盡量用多啲顏色鮮艷嘅食材，亦可以利用唔同造型嘅模具定形，增加食慾。當然同時亦要注意軟餐嘅口感及營養配搭，建議最好以少食多餐方式進食。軟餐製作後需於兩小時內食用，或裹上保鮮紙放雪櫃可保存一至兩日。
機構亦舉辦流動五感大茶樓活動，到安老院舍及長者中心提供軟餐點心
The Project Futurus社區關係副主任Simone、廚師及軟餐顧問馬永成師傅、創辦人及CEO Queenie，馬師傅從事餐飲業超過20年，更會到其他安老院舍進行軟餐相關培訓
唔單止聖誕大餐，軟餐俠成立至今已經有超過100個廣東菜軟餐食譜。The Project Futurus更舉辦名為流動五感大茶樓嘅體驗式懷舊點心活動（詳情按此），當中「五感」係指從視覺、觸覺、嗅覺、味覺、聽覺都還原返舊式茶樓嘅環境同氛圍，並提供唔同質感嘅點心（正餐、碎餐、軟餐），令長者可以重拾飲茶嘅樂趣同回憶。
The Project Futurus係2019年成立嘅社企，以探索老齡化未來為宗旨嘅合作平台同體驗工作室。旗下銀髮族飲食平台「軟餐俠」致力推廣軟餐，包括撰寫軟餐食譜、舉辦軟餐工作坊、義工培訓等，為咀嚼及吞嚥困難嘅人士提供最新健康及飲食資訊，幫助長者重拾享受美食嘅樂趣、提升整體生活質素。
The Project Futurus
地址：荃灣德士古道72-76號興業中心地下
網店網址：https://theprojectfuturus.boutir.com/
寵愛軒培訓及實踐中心 養生寵物鮮食工作坊-聖誕篇
食聖誕大餐，又點少得屋企嘅毛孩呢? 寵愛軒喺今年聖誕就舉辦咗養生寵物鮮食工作坊（詳情按此），由富有經驗嘅導師親自教授整寵物小食嘅步驟同秘訣，快啲報名參加，親手整個聖誕大餐同深愛嘅毛孩共渡佳節啦！學識之後，就可以隨時自己整更多製作方便又養生嘅小食畀屋企嘅毛孩啦。
參加工作坊唔單止可以親自整小食畀寵物，更可以從中學習更多飼養寵物嘅貼士
導師示範製作免焗藍莓芝士凍餅，導師唔單止已經有飼養寵物十幾年嘅經驗，經常研究對寵物有益嘅天然食材，兩年前更自創寵物養生小食品牌，經驗相當豐富
因為貓狗唔適宜食任何調味料，所以連芝士都會教埋點從牛奶開始自家製
季節限定嘅寵物聖誕小食工作坊會由導師親自逐個步驟教大家點整，有任何問題都可以隨時發問。不過各位主人要留意返自己寵物嘅身體情況，例如有無食物敏感、疾病等。而整寵物小食嘅秘訣之一係要多啲留意寵物嘅體型同平時食主食嘅習慣，有提供小食當日就要調整返主食嘅分量。想知更多小知識？就要親自嚟參加工作坊啦！
中心亦有多款寵物產品零售，包括美容工具、零食、衫仔、手作精品、滅蟲蝨劑
除咗聖誕寵物小食工作坊之外，中心亦有定時舉辦犬隻行為治療工作坊同狗狗基本美容及護理課程。犬隻行為治療工作坊由香港犬隻訓練總會認可導師教導，而狗狗基本美容及護理課程亦由專業導師教授有關狗狗嘅護理及照顧須知。咁今個聖誕，實行同你嘅毛孩一齊扮靚靚啦！
香港聖公會麥理浩夫人中心部門主任Gilbert推介多個工作坊同課程，畀各位寵物主人或有志投身寵物相關事業嘅朋友參加
如果想投身寵物美容嘅朋友，就要留意中心嘅寵物美容助理基礎證書課程啦！再讀埋寵物美容及店務助理基礎證書，後者仲有店務工作實習添！另外亦有寵物護理員基礎證書課程。以上三個課程都可以申請僱員再培訓局嘅津貼，成功嘅話課程費用全免。
社企寵愛軒為香港聖公會麥理浩夫人中心2004年創立嘅寵物美容培訓及實踐中心，除咗提供就業培訓課程，更會為畢業學員提供相關嘅見習計劃或就業轉介，幫助有特殊需要人士例如失學或待業青少年培養一技之長，重新建立自信、投入勞動市場。
寵愛軒培訓及實踐中心
地址：九龍大南街138號地下連閣樓
查詢：（電話）2381 8500，（WhatsApp）6577 3732
Facebook：https://www.facebook.com/skhpetzone/