.jpg)
អាជ្ញាធរពាក់ព័ន្ធខេត្តមណ្ឌលគិរីចុះពិនិត្យដីចំការស្រល់ដែលនឹងត្រូវចុះបញ្ជីជាដីរដ្ឋ។ រូបថត មន្ទីរព័ត៌មានខេត្តមណ្ឌលគិរី
មណ្ឌលគិរី៖ អាជ្ញាធរខេត្តមណ្ឌលគិរីបានវាស់វែង តំបន់ដែលអតីតព្រះមហាក្សត្រព្រះបាទ នរោត្តម សីហនុ ធ្លាប់យាងទៅធ្វើជាព្រះរាជអធិបតីក្នុងព្រះរាជពិធី រុក្ខទិវា ដាំដើមស្រល់ លើផ្ទៃដីទំហំប្រមាណ ៤០ ហិកតា ស្ថិតក្នុងក្រុងសែនមនោរម្យ ដើម្បីចុះបញ្ជីជាដីរបស់រដ្ឋ។
កាលពីថ្ងៃទី ២៩ ខែមិថុនា លោក ស្វាយ សំអ៊ាង អភិបាលខេត្តមណ្ឌលគិរីរួមទាំងមន្រ្តីនៅតាមមន្ទីរពាក់ព័ន្ធបានចុះទៅពិនិត្យទីតាំងដីចម្ការស្រល់នេះ ដោយលោក សំអ៊ាង បញ្ជាក់ថា ខាងមន្ទីរដែនដីខេត្ត កំពុងចុះវាស់វែងកំណត់ទីតាំង និងស្រង់ចំនួនពលរដ្ឋ ដែលកំពុងរស់នៅលើដីនេះ។ លោកបញ្ជាក់ថា ការជំរុញដំណើរការចុះបញ្ជីដីចម្ការស្រល់របស់អតីតព្រះមហាក្សត្រនេះ ឲ្យទៅជាដីរបស់រដ្ឋ គឺមានការពាក់ព័ន្ធជាមួយបងប្អូនប្រជាពលរដ្ឋមួយចំនួន ដែលចូលទៅនៅលើដីនេះ ហើយអាជ្ញាធរកំពុងស្រង់ចំនួនប្រជាពលរដ្ឋ ដោយពលរដ្ឋដែលកាន់កាប់ខុសច្បាប់ គឺមិនត្រូវបានអនុញ្ញាតឱ្យបន្តកាន់កាប់ទៀតឡើយ។
លោកថា៖ «នៅពេលយើងរក្សាដីនេះឱ្យបានគង់វង្ស គឺនៅថ្ងៃក្រោយទៅ គឺយើងដាំដើមស្រល់ឡើងវិញទាំងអស់ ហើយវាគឺជាការទាក់ទាញភ្ញៀវទេសចរមកទស្សនាកម្សាន្តនៅទីនេះ ដោយសារទីតាំងហ្នឹងមានអាកាសធាតុល្អ។ អ៊ីចឹងសំខាន់ គឺត្រូវការពារកន្លែងហ្នឹងឱ្យបាន បើមិនអ៊ីចឹងទេ វាអាចធ្វើឱ្យបាត់បង់កន្លែងហ្នឹងសម្រាប់សាធារណៈ»។
ភ្នំពេញប៉ុស្ដិ៍ មិនអាចសុំការបញ្ជាក់បន្ថែម ពីលោក ម៉ៅ ចំរើន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរីបានទេកាលពីថ្ងៃទី ៣០ ខែមិថុនា ដោយលោកថ្លែងថា កំពុងជាប់ប្រជុំ ខណៈលោក ហៀក សុផាន នាយករដ្ឋបាលខេត្តមណ្ឌលគិរី បានជំរុញឱ្យទៅសួរខាងមន្ទីរកសិកម្ម ដែលជាស្ថាប័នជំនាញគ្រប់គ្រងដីចម្ការស្រល់នោះ។
ប៉ុន្តែលោក សុង ឃាង ប្រធានមន្ទីរកសិកម្ម ពុំបានផ្ដល់ព័ត៌មានជាក់លាក់ អំពីទំហំនៃផ្ទៃដីចម្ការស្រល់នោះឡើយ ខណៈលោក អ៊ុំ វណ្ណសុភៈប្រធានរដ្ឋបាលព្រៃឈើខេត្តបានបញ្ជាក់ថា ដីចម្ការស្រល់នេះ គឺមានទំហំប្រហែល ៤០ ហិកតា ស្ថិតក្នុងសង្កាត់សែនមនោរម្យ ក្រុងសែនមនោរម្យ ហើយលោកថា ដំណើរការចុះបញ្ជីជាដីរដ្ឋនេះ នឹងអាចបញ្ចប់ឆាប់ៗក្នុងឆ្នាំ ២០២០។ ដំណើរការចុះវាស់វែងនៅតំបន់ចម្ការស្រល់ គឺបានធ្វើឡើងតាំងពីឆ្នាំ ២០១៩។
លោកបញ្ជាក់ថា៖ «បច្ចុប្បន្ននេះ យើងកំពុងវាស់វែង ដើម្បីធ្វើបច្ចុប្បន្នភាព ថាតើដើមស្រល់ហ្នឹងនៅសល់ប៉ុន្មាន និងមានពលរដ្ឋចំនួនប៉ុន្មាន»។
លោក គ្រើង តុលា សកម្មជនការពារព្រៃឈើ នៅខេត្តមណ្ឌលគិរីបានលើកឡើងថា ដីចម្ការស្រល់នេះ គឺត្រូវបានក្រុមអ្នកមានអំណាចបោះបង្គោល ដើម្បីទន្ទ្រានគ្រប់គ្រងជាកម្មសិទ្ធិឯកជនជាច្រើនកន្លែង ហើយសុទ្ធតែមានលិខិតកាន់កាប់ ដែលត្រូវបានចុះហត្ថលេខាទទួលស្គាល់ដោយអាជ្ញាធរភូមិ ឃុំ រហូតដល់ស្រុក។
លោកថា៖ «យើងឃើញមានឯកសារពាក់ព័ន្ធដីហ្នឹង ត្រូវបានគេស៊ីញ៉េដល់ស្រុករហូត។ ខ្ញុំគិតថាការដកហូតយកដីចម្ការស្រល់ហ្នឹងមកវិញ ប្រហែលពិបាកដក ដោយសារមានផ្ទះឧកញ៉ានៅក្បែរៗហ្នឹង»៕
