.jpg)
លោក ហ៊ុន សែន ក្នុងកម្មវិធីនៅខេត្តព្រៃវែងពីម្សិលមិញ។ រូបថត AKP
ភ្នំពេញៈ លោកនាយករដ្ឋមន្ត្រី ហ៊ុន សែន បានឆ្លើយតបទៅនឹងការលើកឡើងរបស់អ្នករិះគន់ម្នាក់ឈ្មោះ រ័ត្ន សុធី ដែលថារាជរដ្ឋាភិបាលយកថវិការបស់សហភាពអឺរ៉ុប (EU) ទៅចំណាយលើកម្មវិធីផ្ដល់ប្រាក់ឧបត្ថម្ភសម្រាប់អ្នកក្រីក្រ និងអ្នកងាយរងគ្រោះពីវិបត្តិកូវីដ ១៩។ ក៏ប៉ុន្តែលោកបានបញ្ជាក់ថា រាជរដ្ឋាភិបាលមិនបានយកប្រាក់របស់ EU សូម្បី ១ សេន ទៅចំណាយនៅក្នុងកម្មវិធីនេះទេ។
ថ្លែងក្នុងពេលលោកចុះពិនិត្យមជ្ឈមណ្ឌលបង្កាត់ពូជត្រី និងសំណេះសំណាលជាមួយកសិករនៅស្រុកពាមរក៍ ខេត្តព្រៃវែងកាលពីម្សិលមិញ លោកនាយករដ្ឋមន្ត្រី ហ៊ុន សែន បានលើកឡើងថា មានមនុស្សម្នាក់ឈ្មោះ រ័ត្ន សុធី នៅខេត្តបន្ទាយមានជ័យដែលបានចោទប្រកាន់រដ្ឋាភិបាលថា បានយកប្រាក់ជំនួយរបស់សហភាពអឺរ៉ុបទៅចែកដល់ពលរដ្ឋក្រីក្រ និងងាយរងគ្រោះពីកូវីដ ១៩ ហើយបានអះអាងថា ជាថវិការដ្ឋាភិបាល។ លោកថា ការលើកឡើងរបស់អ្នករិះគន់បែបនេះខុសពីការពិតទាំងស្រុង។
លោកមានប្រសាសន៍ថា៖ «រដ្ឋាភិបាល ហ៊ុន សែន អត់ទាន់ដួលរលំទេ សូមផ្តាំទៅអ្នកថា មានអាមួយនោះ សូមផ្តាំទៅ រ័ត្ន សុធី នៅខាងបន្ទាយមានជ័យ រ័ត្ន សុធី ឯងបាននិយាយថា ផ្តល់លុយឲ្យទៅប្រជាពលរដ្ឋដោយជំនួយរបស់សហគមន៍អឺរ៉ុប ខ្ញុំប្រាប់ទៅលោក សុធី ឯងសំណាងហើយដែលខ្ញុំមិនបញ្ជាឲ្យចាប់»។
លោកថា ប្រសិនបើលោកបញ្ជាឲ្យចាប់ខ្លួន ម្ល៉េះពេលនេះឈ្មោះ រ័ត្ន សុធី ប្រហែលជានៅក្នុងគុកបាត់ទៅហើយ។ លោកថា ឈ្មោះនេះធ្លាប់បានប្រព្រឹត្តកំហុសច្រើនដងហើយ និងតែងរត់ទៅប្រទេសថៃ។ តែពេលនេះព្រំដែនថៃខ្លះត្រូវបានដាក់បន្លាលួសដើម្បីទប់ស្កាត់ការចូលទៅថៃខុសច្បាប់។
លោកបញ្ជាក់ថា រដ្ឋាភិបាលរបស់លោកមិនទាន់បានចំណាយប្រាក់បរទេសសូម្បី ១ សេនសម្រាប់ដោះស្រាយបញ្ហាសង្គមរបស់ពលរដ្ឋកម្ពុជា។
លោកផ្ដាំទៅក្រុមអ្នកប្រឆាំងទូទាំងប្រទេសថា រដ្ឋាភិបាលរបស់លោកមានកម្លាំង និងធនធានគ្រប់គ្រាន់ដើម្បីទប់ទល់នឹងសភាពការណ៍កូវីដ១៩។
លោកបានបន្តថា៖ «១ សេន ក៏អត់ទាន់ប្រើលុយបរទេសណា ដើម្បីត្រួតត្រាកូវីដ។ មន្ត្រីរាជការមិនត្រឹមតែមិនកាត់ប្រាក់ខែទេ គឺបើកប្រាក់ខែទៀងទាត់ កម្ពុជាអត់ទាន់ខ្វះសាច់ប្រាក់ទេហើយការបើកប្រាក់ខែនេះក៏មិនទាន់យកប្រាក់សល់ជាង ៣ ពាន់លានដុល្លារដែរ ចំណូលយើងទោះបីជាធ្លាក់ចុះក៏នៅជាង ៤០០ លានដុល្លារ ក្នុង ១ ខែដែរ ហើយប្រាក់ខែតែជាង ២០០ លានដុល្លារទេអាពៅស្ដាប់ឲ្យបាន»។
កាលពីកន្លងទៅសមត្ថកិច្ចខេត្តបន្ទាយមានជ័យធ្លាប់បានដាក់បញ្ចូលឈ្មោះ រ័ត្ន សុធី ទៅក្នុងបញ្ជី «ក្រុមឧទ្ទាមក្បត់ជាតិ» ដែលស្ថិតក្នុងការស្វែងរកចាប់ខ្លួនពាក់ព័ន្ធនឹងយុទ្ធនាការមាតុភូមិនិវត្តន៍នាថ្ងៃ ៩ វិច្ឆិកា ឆ្នាំ ២០១៩ របស់លោក សម រង្ស៊ី។
អ្នកនាំពាក្យអគ្គស្នងការនគរបាលជាតិលោក ឆាយ គឹមខឿន បានថ្លែងកាលពីម្សិលមិញថា ឈ្មោះ រ័ត្ន សុធី ធ្លាប់បានប្រព្រឹត្តកំហុសច្រើនដងហើយ ប៉ុន្តែសមត្ថកិច្ចនឹងមិនស្វែងរកចាប់ខ្លួនទេ ដូចប្រសាសន៍របស់លោកនាយករដ្ឋមន្ត្រី។ លោកក៏មិនអាចបញ្ចេញព័ត៌មានបន្ថែមលើសពីនេះទេ ព្រោះវាអាចប៉ះពាល់ដល់សិទ្ធិរបស់បុគ្គល។
លោកថ្លែងថា៖ «បើគ្រាន់តែស្ថិតនៅក្រោមការសង្ស័យហើយមិនទាន់មានអ្វីដែលត្រូវអនុវត្តយើងមិនអាចនិយាយបានទេ។ ប៉ុន្តែគាត់ធ្លាប់បានផ្សព្វផ្សាយព័ត៌មានប្រឆាំងដូចសម្ដេចលោកលើកអ៊ីចឹង។ មិនមែនម្ដងទេច្រើនសាហើយ បំផ្លើសបំភ្លៃអ៊ីចឹង»។
លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងថា ការចាត់វិធានការលើបុគ្គលបំភ្លៃព័ត៌មាន អាស្រ័យលើសមត្ថកិច្ច។ ប៉ុន្តែជាគោលការណ៍ច្បាប់ ប្រសិនបើសកម្មភាពនោះជាការបំផ្លើសបំភ្លៃ និងបញ្ចេញព័ត៌មានក្លែងក្លាយក្នុងចេតនាទុច្ចរិត បង្ខូចកេរ្តិ៍ឈ្មោះអ្នកដទៃ ញុះញង់ឲ្យមានចលាចល ប៉ះពាល់ដល់សន្តិសុខសង្គម សណ្ដាប់ធ្នាប់សាធារណៈនោះ គេអាចកសាងនីតិវិធីតាមផ្លូវច្បាប់បាន។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិបានថ្លែងកាលពីល្ងាចម្សិលមិញថា ពលរដ្ឋមានសិទ្ធិនិយាយ និងយល់ឃើញ និងសម្ដែងមតិយោបល់របស់ខ្លួន។ ចំណែកថ្នាក់ដឹកនាំមានតួនាទីពន្យល់ដល់ពលរដ្ឋពីប្រភពប្រាក់សម្រាប់ឧបត្ថម្ភដល់ពលរដ្ឋក្រីក្រ។ លោកយល់ថា ទោះបីជាលោក ហ៊ុន សែន មិនបញ្ជាឲ្យចាប់ខ្លួន ប៉ុន្តែអ្វីដែលលោកលើកឡើងហាក់ដូចជាការគំរាមកំហែង៕
វីដេអូ៖
