រដ្ឋមន្ត្រីក្រសួងការងារជាតិ រំឭកឱ្យក្មេងជំនាន់ក្រោយចងចាំពីតម្លៃមិត្តភាពជាមួយវៀតណាម ហើយថាកម្ពុជានៅតែរក្សាមិត្តភាពយូរអង្វែងជាមួយប្រទេសជិតខាងនេះ ដោយមិនត្រូវចាញ់បោកការញុះញង់របស់ក្រុមអគតិមួយចំនួនដែលចង់មកបំបែកបំបាក់ប្រទេសទាំងពីរបាននោះទេ។
ក្នុងពិធីរំលឹកខួបលើកទី៤៣ឆ្នាំ (២០ មិថុនា ១៩៧៧-២០ មិថុនា ២០២០) ក្រោមការតស៊ូរបស់លោកនាយករដ្ឋមន្ត្រីហ៊ុន សែន ដែលតស៊ូរដោះជាតិចេញពីរបបប្រល័យពូជសាសន៍ ប៉ុល ពត គឺរដ្ឋមន្ត្រីក្រសួងការពារជាតិ លោក ទៀ បាញ់ ថ្លែងថា កន្លងមកមានជនអគតិមួយចំនួនចង់បំបែកបំបាក់កម្ពុជានិងវៀតណាមតាមគ្រប់រូបភាព ដោយញុះញង់ថា កម្ពុជាស្ថិតនៅក្រោមការបង្គាប់បញ្ជារបស់វៀតណាម កម្ពុជាបាត់បង់ទឹកដីដោយសារវៀតណាម និងបញ្ហាផ្សេងៗទៀតជាដើម។
ករណីនេះ លោក ទៀ បាញ់ រំឭកដល់ក្មេងៗជំនាន់ក្រោយថា វៀតណាមតែងតែជួយកម្ពុជា ដូច្នេះមិនត្រូវបែកបាក់មិត្តភាពតាមការញុះញង់នោះទេ។
លោកថ្លែងដូចនេះថា៖ «បំបែកបំបាក់រវាងកម្ពុជាវៀតណាមគឺជាគោលដៅធំបំផុតរបស់ពួកជនអគតិ អ្វីដែលយើងក៏សាងជាតឹកតាង ច្បាស់លាស់ ថាគ្មានទេ គ្មានជាដាច់ខាត គ្មានការបំបែកបំបាក់នោះទេ ក្មួយៗជំនាន់ក្រោយត្រូវតែដឹងគ្មានទេ ទោះបីជាលំបាកយ៉ាងណាក៏ដោយ គឺកម្ពុជាវៀតណាមនៅតែរួបរួមគ្នា មូលហេតុប្រវត្តសាស្ត្រ ភូមិសាស្ត្រ គឺជួយគ្នាទៅវិញទៅមកគ្មានដាច់ខ្សែរយៈទេ មិនឲ្យពួក[ជនអគតិ]មួយចំនួនចោទថា ថ្ងៃ៧មករា បាត់ទឹកដី បាត់អធិបតេយ្យ[កម្ពុជា]ជាដើម »។
ក្នុងពីធីប្រារព្ធខួប៤៣ឆ្នាំ នៃថ្ងៃទី២០ ខែមិថុនា (២០ មិថុនា ១៩៧៧-២០ មិថុនា ២០២០) នៅថ្ងៃនេះដែរ លោកនាយករដ្ឋមន្ត្រី ហ៊ុន សែន ក៏បានសរសេរលើហ្វេសប៊ុក រំលឹកពីការលះបង់ជីវិតរបស់លោកកាលពី៤៣ឆ្នាំមុន ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ ដើម្បីតស៊ូរំដោះប្រជាជនកម្ពុជាចេញពីរបបប្រល័យពូជសាសន៍ ប៉ុល ពត ទើបនាំមកនូវសេចក្តីសុខ និងការរីកចម្រើនរហូតសព្វថ្ងៃនេះ៕
