La descobèrta d’una gigantassa vila jos la sabla egipciana ongan, amb lo nom d’Ascension d’Aton, entraïna divèrsas qüestions fins ara jamai pensadas per l’arqueologia mondiala. La fondacion d’aquela vila pel paire d’Akhenaton, tanben conegut coma lo faraon eretge, Amenhotep III, fariá pas necessària la fondacion d’una autra capitala pr’amor de la sieuna situacion geografica e dimensions. Pasmens, Akhenaton decidiguèt se n’anar amb tota la sieuna familha e fondar una nòva capitala lèu lèu ; Amarna. Ara çò que déu respondre l’arqueologia es perqué se passèt aquò.
Car lo govèrn egipcian confirmèt la setmana passada la descobèrta d’un vila estonanta jos la sabla del desèrt prèp de la vila de Luxor. Semblariá que la vila trapada seriá la celèbra vila “L’Ascension d’Aton”, perduda fins a uèi lo jorn e jamai trobada pels arqueològs de la planeta. La vila auriá una edat minimala de 3 000 ans e segon lo govèrn d’Egipte es la descobèrta pus importanta dins lo mond de l’arqueologia egipciana dempuèi la tròba del tombèu de Tuntankamon en 1922.
Per ansin, la vila foguèt la coneguda Ascension d’Aton, fondada pel faraon Amenhotep III, de la dinastia XVIII, e auriá demorat encara divèrses ans coma capitala d’aquel país de l’edat antica pendent la vida del sieu filh, lo faraon Akhenaton, tanben conegut coma lo faraon erètge. La vila, segon los arqueològs egipcians tanben seriá encara plan viva pendent los darrièr ans del reialme d’Akhenaton e tanben del sieu filh, Totankhamòn.
“Es lo centre administratiu e industrial màger de l’Empèri Egipcian a l’oèst de Loxòr, çò confirmèt lo Ministeri del Torisme egipcian. Es la vila mai granda jamai trapada en Egipte. Las carrièras son totas amb d’ostals e i a de muralhas de pèira de mai de 3 mètres de nautor”. La descobèrta de l’Ascension d’Aton se pasèt pendent l’an 2020 per una còla d’arqueològs egipcians dirigits per l’arqueològ tanben egipcian Zahi Hawass.
Segon Hawas “i aguèron fòrça expedicions internacionals qu’assagèron de la trapar, mas poguèron pas o far. La vila demorèt pasmens cossí èra pendent milièrs d’annadas. Semblariá que los proprietaris abandonèron lors ostals ièr. La muralha de la vila es plan conservada e los ostals son totes amb d’objèctes de la vida vidanta qu’ajudèron plan a situar la vila en la siá epòca”.
Lo paire del rei erètge
La vila Ascension d’Aton foguèt bastida pendent lo faraon Amenhotep III , tanplan conegut coma Amenhotep lo Magnific, noven faraon de la 18 dinastia egipciana. Uèi lo jorn encara i a de cercaires qu’afirman que foguèt faraon entre las annadas 1386 e 1349 dle còp que d’autres dison que foguèt rei d’egipte entre los ans 1388 e fins a 1350.
Segon divèrsas cronicas anticas Egipte visquèt una epòca d’aur pendent lo faraon Amenhotep III e lo país arrivèt a un nivèl de desvolopament artistic e de govèrn pas conegut fins alara. Amenhotep moriguèt en tot donar lo poder al sieu filh, que començariá lo reialme amb lo nom d’Amenhotep IV mas que lèu cambiariá lo sieu nom pel d’Akhenaton.
Lèu lo nòu faraon e la siá familha marchèron a la vila d’Amarna ont bastiguèron una nòva capitala que demorariá, sonque, fins la mòrt de la familha e puèi seriá abandonada e totalament desbrembada, pr’amor qu’Akhenaton foguèt considerat un faraon erètge. La descobèrta de la nòva vila d’Ascension d’Aton confirmèt qu’èra una vila gigantassa e estonanta e per aquò ara los arqueològs demandan perqué Akenaton abandonèt Ascension d’Aton amb la siá familha e fondèt la nòva capitala d’Amarna. Un question nòva dubèrta per l’arqueologia e que la descobèrta d’Ascension d’Aton ara entraïna.
La Redaccion
